ហ្គាណា៖ រូបភាពជាច្រើនសន្លឹក ត្រូវបានគេចែករំលែកតៗគ្នានៅលើបណ្តាញសង្គម ដែលគ្រូបង្រៀនក្រីក្រម្នាក់ សុខចិត្តចំណាយពេលគូរផ្ទាំងកម្មវិធី Microsoft Word ទាំងដុលនៅលើក្តារខៀន ដើម្បីបង្រៀនដល់កូនសិស្ស។
គ្រូបង្រៀនរូបនេះ ត្រូវបានគេស្គាល់ឈ្មោះថា Owura Kwadwo មានប្រភពមកពីទីក្រុង Kumasi ប្រទេសហ្គាណា។ គាត់បង្រៀនលើមុខវិជ្ជាវិទ្យាសាស្ត្រព័ត៌មានវិទ្យា នៅឯសហគមន៍ជនបទមួយកន្លែង បន្ទាប់ពីបញ្ចប់ការសិក្សាលើជំនាញ «Visual Arts»។
បើយោងតាមសេចក្តីរាយការណ៍បានឲ្យដឹងថា សហគមន៍ក្រីក្រខាងលើ ពុំមានធនធានគ្រប់គ្រាន់ ដើម្បីផ្គត់ផ្គង់លើការបង្រៀននោះទេ។ ទោះបីគ្មានកំព្យូទ័រក៏ដោយ ក៏វិធីបង្រៀនរបស់លោក Owura ហាក់បីដូចជាមានប្រសិទ្ធភាព ព្រោះកូនសិស្សរបស់គាត់ ត្រូវបានគេមើលឃើញថា មានចំណង់ចង់រៀនជាខ្លាំង ក៏ដូចជាទទួលបានចំណេះដឹងយ៉ាងច្រើន ពីការបង្រៀនរបស់គាត់ផងដែរ។
លោក Owura បានឲ្យដឹងយ៉ាងដូច្នេះថា៖
«ខ្ញុំធ្វើវា (គូរលើក្តារខៀន) ដើម្បីឲ្យសិស្សរបស់ខ្ញុំយល់ពីអ្វីដែលខ្ញុំកំពុងបង្រៀន។ យ៉ាងហោចណាស់ ខ្ញុំអាចផ្តល់រូបភាពមួយឲ្យពួកគេបានឃើញ ដោយសន្មត់ថា ពួកគេកំពុងនៅពីក្រោយកញ្ចក់កំព្យូទ័រយ៉ាងអ៊ីចឹងដែរ»។
ទាក់ទងនឹងរឿងរ៉ាវខាងលើនេះ អ្នកនិយមប្រើប្រាស់បណ្តាញសង្គមមួយចំនួន មានការកោតសរសើរយ៉ាងខ្លាំង ចំពោះទឹកចិត្តរបស់គ្រូបង្រៀនរូបនេះ ហេតុតែចង់ឲ្យកូនសិស្សទទួលបានចំណេះដឹង ត្បិតខ្វះខាតសម្ភារៈមួយចំនួន ក្នុងការបង្រៀន។ ដោយក្តីអាណិត សប្បុរសជនបាននាំគ្នា បរិច្ចាគកំព្យូទ័រ ម៉ាស៊ីន Projector និងថវិកាមួយចំនួនផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]