យុវជនម្នាក់បានប្រើបច្ចេកវិទ្យា Drone ដើម្បីជួយដល់កសិករនៅអាហ្រ្វិក និងប្រទេសមួយចំនួនទៀត

អាហ្រ្វិក៖ រៀងរាល់ឆ្នាំ បណ្តាប្រទេសនៅក្នុងទ្វីបអាហ្រ្វិកតែងតែចំណាយប្រាក់យ៉ាងហោចណាស់ក៏ ៣៥ពាន់លានដុល្លារអាមេរិកដែរដើម្បីនាំចូលអាហារ។ ដូច្នេះហើយបានជាក្រុមហ៊ុនធំៗជាច្រើនព្យាយាមលើកស្ទួយផលដំណាំ នៅក្នុងប្រទេសទាំងនោះ ដើម្បីជួយកាត់បន្ថយភាពក្រីក្រ។

កាលពីពេលថ្មីៗនេះដែរ ក្រុមហ៊ុន Aerobotics ដែលបង្កើតដោយលោក James Paterson បានប្រើប្រាស់បច្ចេកវិទ្យាជាមួយឧបករណ៍ទំនើបៗ ដើម្បីលើកកម្ពស់កំណើនផលដំណាំនៅក្នុងទ្វីបអាហ្រ្វិក។

ម៉ាស៊ីន Drone របស់ក្រុមហ៊ុនខាងលើអាចផ្តល់ទិន្នន័យសំខាន់ៗ ដូចជាព័ត៌មានទាក់ទងនឹងសុខភាពដំណាំ ព្រមទាំងការវិភាគទិន្នន័យ ដែលអាចបង្ហាញពីតំបន់ណាមួយអាចមានបញ្ហាជំងឺ សត្វល្អិត និងកង្វះទឹក ឬសារធាតុចិញ្ចឹមជាដើម -ល-។

គួរឲ្យដឹងដែរថា ក្នុងពេលនេះក្រុមហ៊ុន Aerobotics កំពុងធ្វើប្រតិបត្តិការនៅក្នុង ១១ ប្រទេស និងមានផែនការពង្រីកកម្មវិធីរបស់ខ្លួន ទៅកាន់បណ្តាប្រទេសនានាផ្សេងទៀតនាពេលខាងមុខផងដែរ៕