ខេត្តបាត់ដំបង ៖ បុរសម្នាក់បានយកផ្លែឡាមអារ.កសម្លាប់ខ្លួនហើយត្រូវម្ដាយប្រទះឃើញដេកស្លាប់ជាមួយនឹងឈាមជោកជាំកាលពីវេលាម៉ោង៩នឹង៣០នាទីយប់ ថ្ងៃទី២០ ខែកុម្ភៈ ឆ្នាំ២០១៨ នៅចំណុចក្បែរមាត់ស្ទឹងសង្កែ ស្ថិតក្នុងភូមិដាំស្ពៃ សង្កាត់ស្លាកែត ក្រុងបាត់ដំបង ដែលគេសង្ស័យថា បណ្ដាលមកពីមានវិបត្តិគ្រួសារ ។
លោក ប៉ាង ហៀង អធិការក្រុងបាត់ដំបងបានឲ្យដឹងថា ជនរងគ្រោះឈ្មោះ សេន រ៉ាដា ភេទប្រុស អាយុ៣៧ឆ្នាំ រស់នៅភូមិ-សង្កាត់ខាងលើ ។ លោកថា ម្ដាយរបស់ជនរងគ្រោះជាអ្នកប្រទះឃើញសាកសពបុរសនេះដែលដេកស្លាប់នៅក្បែរមាត់ស្ទឹងសង្កែពេញទៅដោយឈាមជោកជាំ ។ ជនរងគ្រោះមានស្នាមរបួសត្រង់.កចំនួន៦កន្លែង និងបានរកឃើញផ្លែឡាមមួយដែលប្រឡាក់ឈាមធ្លាក់នៅក្បែរសព ។ លោក ប៉ាង ហៀង បានបញ្ជាក់ថា ជនរងគ្រោះអាចធ្វើអត្តឃាតខ្លួនឯងដោយយកផ្លែឡាមអារ.កដោយសារមានទំនាស់បែកបាក់ក្រុមគ្រួសារ និងផឹកស្រាស្រវឹងជាប្រចាំថ្ងៃ ។ នេះជាការបំភ្លឺបន្ថែមរបស់ម្ដាយជនរងគ្រោះ ។
ម្ដាយជនរងគ្រោះបានប្រាប់សមត្ថកិច្ចថា កូនរបស់គាត់ធ្លាប់ប៉ងសម្លាប់ខ្លួនប៉ុន្មានលើកហើយដោយសារជំងឺប្រចាំកាយនិងមានវិបត្តិគ្រួសារ ។ គាត់និយាយថា មួយរយៈនេះក្រុមគ្រួសារកូនគាត់បាននាំគ្នាទៅខេត្តស្វាយរៀងតែពេលត្រឡប់មកវិញមិនឃើញប្រពន្ធមកជាមួយទេ ហើយគាត់ក៏បានសួរនាំអំពីរឿងនេះពេលកំពុងហូបបាយជាមួយគាត់តែកូនប្រុសមិនបានរៀបរាប់អ្វីច្រើនទេ ប៉ុន្តែក្រោយពេលហូបបាយរួចក៏បាត់កូនប្រុសរូបនេះ ។ គាត់បានព្យាយាមដើររកតែមិនឃើញឡើយ លុះយប់បន្តិចទើបគាត់ប្រទះឃើញកូនប្រុសគាត់ដេកស្លាប់ក្បែរមាត់ស្ទឹងខាងក្រោយផ្ទះបង្កឲ្យមានការភ្ញាក់ផ្អើលតែម្ដង ។ ម្ដាយជនរងគ្រោះបានបញ្ជាក់ថា កូនប្រុសគាត់អាចសម្លាប់ខ្លួនដោយសារតែការបែកបាក់គ្រួសារ ។ ម្យ៉ាងដោយសារមានជំងឺប្រចាំកាយ និងផឹកស្រាស្រវឹងជាប្រចាំផងហើយក៏ធ្លាប់ព្យាយាមចង.កសម្លាប់ខ្លួនជាញឹកញាប់ដែរតែមិនបានសម្រេច ។
លោក ប៉ាង ហៀង អធិការក្រុងបាត់ដំបងបានឲ្យដឹងថា ក្រោយពេលកើតហេតុកម្លាំងជំនាញបានចុះពិនិត្យសាកសព និងកន្លែងកើតហេតុភ្លាមៗដែរនៅលើរាងកាយសពជនរងគ្រោះមានស្នាមរបួសត្រង់បំពង់.កខាងមុខ និងត្រង់កញ្ចឹង.កខាងក្រោយស្នាមដាច់រយះចំនួន៦កន្លែង ថែមទាំងរកឃើញផ្លែឡាមមួយនៅក្បែរនោះ ។ ក្រៅពីនេះគ្មានស្លាកស្នាមអ្វីគួរឱ្យកត់សំគាល់នៅកន្លែងផ្សេងឡើយ ។ ដោយយោងលើការបំភ្លឺពីម្ដាយជនរងគ្រោះអំពីប្រវត្តិជនរងគ្រោះ និងយោងទៅលើវត្ថុតាងផង យើងអាចវាយតម្លៃបានថា ជនរងគ្រោះពិតជាបានធ្វើអត្តឃាតពិតប្រាកដមែន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]