រាជធានីភ្នំពេញ ៖ តារាសម្តែងនាងនី មុនីនាថ បានលាតត្រដាងពីភាពស្និទ្ធស្នាលជាមួយបុរសថ្មី ប្លែកមុខម្នាក់ជាសាធារណៈក្នុងពេលដែលរឿងក្តីជាមួយអតីតគូដណ្តឹងកំពុងតែស្ថិតនៅក្នុងដៃតុលាការនៅឡើយ ។
នី មុនីនាថ បានបង្ហាញរូបថតស្និទ្ធស្នាលជាមួយបុរសនោះតាមរយៈការបង្ហោះលើហ្វេសប៊ុកនៅថ្ងៃទិវានៃក្តីស្រឡាញ់ ។ បុរសម្នាក់នោះឈ្មោះរិទ្ធីវុធ រ៉ាដា ដែលតែងតែមានវត្តមានជាញឹកញាប់ជាមួយនី មុនីនាថ ពេលចូលរួមកម្មវិធី ផ្សេងៗរបស់អ្នកសិល្បៈដូចគ្នា ។
រូបភាពដែល នី មុនីនាថ បានបង្ហោះនោះត្រូវមហាជនមួយចំនួនមានការចាប់អារម្មណ៍យ៉ាងខ្លាំង និងបានលាន់មាត់ថា ពិតជាសក្តិសមនឹងគ្នាណាស់ ។ អ្វីដែលជាការកត់សម្គាល់ជាងនេះទៅទៀតនោះលោករិទ្ធីវុធ រ៉ាដា បានប្រើប្រាស់រូបថតស្និទ្ធស្នាលជាមួយនី មុនីនាថ ធ្វើជា Profile ហ្វេសប៊ុករបស់ខ្លួនផងដែរ នាំឲ្យគេរឹតតែសង្ស័យថា អ្នកទាំងពីរលើសពីមិត្តធម្មតាជាមួយគ្នា ។
ឆ្លើយតបជាមួយនឹងប្រិយមិត្តគាំទ្ររបស់ខ្លួន នី មុនីនាថ ហាក់មិនបានប្រកែកបដិសេធចំពោះចំណងស្នេហ៍ជាមួយបុរសម្នាក់នោះឡើយ ប៉ុន្តែនាងគ្រាន់តែបានសារភាពដោយខ្លីថា នាង និងបុរសម្នាក់នោះជាមិត្តភក្តិ រាប់អានគ្នាយូរឆ្នាំហើយ ។
សំណុំរឿងកញ្ញានី មុនីនាថ ដែលត្រូវអតីតគូដណ្ដឹងលោកអ៊ឹង សូឡាង ប្ដឹងទាមទារប្រាក់១២ម៉ឺនដុល្លារកាលពីពេល ថ្មីៗកន្លងមក បន្តលើកពេលដោយមិនកំណត់ថ្ងៃ ។ការបន្តលើកពេលនេះ គឺដោយសារកាលពីថ្ងៃទី៧ ខែកុម្ភៈ ឆ្នាំ២០១៨ សាលាដំបូងរាជធានីភ្នំពេញ បានបើកសវនការជំនុំជម្រះលើសំណុំរឿងតារាសម្តែងនី មុនីនាថ តែសវនការនោះត្រូវបានលើកពេលវិញ ដោយសារតែភាគីលោកអ៊ឹង សូឡាង មិនចូលខ្លួនតាមដីកាកោះរបស់តុលាការ ។ មូលហេតុដែលនាំឲ្យមានការលើកពេលសវនការនេះ ដោយសារមេធាវីរបស់លោកអ៊ឹង សូឡាង បានដាក់ពាក្យសុំពន្យារពេលដោយមូលហេតុថា មេធាវី មិនអាចទាក់ទងទៅលោកអ៊ឹង សូឡាងបាន ។
លោកអ៊ឹង សូឡាង បានប្តឹងកញ្ញានី មុនីនាថ ទៅសាលាដំបូងរាជធានីភ្នំពេញទាមទារប្រាក់សរុបមានចំនួន១២ម៉ឺនដុល្លារ ក្នុងនោះលោកបានទាមទារឲ្យ នី មុនីនាថ សងប្រាក់ចំនួន៧ម៉ឺនដុល្លារ និងសំណងជំងឺចិត្តចំនួន៥ម៉ឺនដុល្លារ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
