ខេត្តសៀមរាប ៖ ស្ត្រីវ័យក្មេងម្នាក់បានសម្រេចចិត្តជិះឡានក្រុង ពីស្រុកសូទ្រនិគម មកស្នងការនគរបាលខេត្តសៀមរាប ដើម្បីប្តឹងប្រពន្ធនគរបាលនៅស្រុកសូទ្រនិគមម្នាក់ អំពីករណីគំរាមកំហែង វាយខ្នោះ ប្រមាថចាប់ដាក់គុក និងចាក់សោមិនឱ្យចូលផ្ទះ ដោយគ្រាន់តែរឿងជំពាក់លុយ២លានរៀលប៉ុណ្ណោះ ធ្វើឱ្យមានការភ្ញាក់ផ្អើលពេញខេត្តសៀមរាប ។ ហេតុការណ៍បង្កការភ្ញាក់ផ្អើលនៅមុខស្នងការនគរបាលខេត្តសៀមរាបនេះ បានកើតឡើងនៅថ្ងៃទី១៦ ខែកុម្ភៈ ឆ្នាំ២០១៨ ។
បើតាមការរៀបរាប់ពីស្ត្រីដែលប្តឹងប្រពន្ធនគរបាលស្រុកម្នាក់នោះមាន ឈ្មោះ ម៉ៅ ណែត អាយុ២២ឆ្នាំ រស់នៅភូមិបុស្ស ឃុំដំដែក ស្រុកសូទ្រនិគម បានឱ្យដឹងនៅវេលាម៉ោង០២រសៀល ថ្ងៃទី១៦ ខែកុម្ភៈ ឆ្នាំ២០១៨ នេះថា កាលពីរសៀលថ្ងៃទី១៥ ខែកុម្ភៈ ឆ្នាំ២០១៨ ដែលមានទីតាំងនៅផ្ទះល្វែងជួលរបស់គាត់ មានស្ត្រីឈ្មោះ ពៅ ជាប្រពន្ធនគរបាលស្រុកសូទ្រនិគមម្នាក់ «បានហៅប៉ូលិសមួយក្រុមមកផ្ទះរបស់គាត់ និងយកឡានមកបិទមុខផ្ទះ ព្រមទាំងបានយកសោថ្មីមកចាក់មិនឱ្យគាត់ចូលផ្ទះថែមទៀត ព្រមទាំងគំរាមចាប់គាត់វាយខ្នោះ ដោយគ្រាន់តែគាត់ជំពាក់លុយចំនួន២លានរៀលប៉ុណ្ណោះ» ។
ស្ត្រីឈ្មោះ ម៉ៅ ណែត បានរៀបរាប់បន្តថា «រឿងជំពាក់លុយនោះគាត់ព្រមសងហើយ ប៉ុន្តែស្ត្រីប្រពន្ធនគរបាលនោះវិញ គឺទារទៅតាមអ្វីដែលគាត់បានកំណត់ គឺក្នុងមួយថ្ងៃត្រូវបង់ឱ្យគាត់២ម៉ឺនរៀល ។ ប៉ុន្តែប្រពន្ធនគរបាលនោះនៅតែមិនព្រម ដោយចង់ចាក់សោមិនឱ្យគាត់ចូលផ្ទះ និងគំរាមចាប់វាយខ្នោះ បើមិនព្រមសងលុយ» ។
ស្ត្រីរូបនេះបន្តថា រូបគាត់កើតទុក្ខមិនសុខចិត្ត ដូច្នេះហើយទើបគាត់សម្រេចចិត្តជិះឡានក្រុងមកប្តឹងប្រពន្ធនគរបាលស្រុកសូទ្រនិគមម្នាក់នោះនៅស្នងការនគរបាលខេត្ត ពីបទ «គំរាមកំហែងវាយខ្នោះ និងមិនឱ្យគាត់ចូលផ្ទះ» ហើយករណីនេះគាត់សូមទាមទារសំណងជំងឺចិត្តចំនួន៤ពាន់ដុល្លារ ព្រមទាំងសុំឱ្យសមត្ថកិច្ចចាត់ការទៅតាមផ្លូវច្បាប់ ។
តាមប្រភពពីសមត្ថកិច្ចនគរបាលស្រុកសូទ្រនិគមម្នាក់សូមមិនបញ្ចេញឈ្មោះ បានប្រាប់នៅព្រឹកថ្ងៃទី១៧ ខែកុម្ភៈ ឆ្នាំ២០១៨ នេះថា ករណីរឿងជំពាក់លុយ គឺត្រូវសងលុយ មិនមែនចេះតែដើរជេរ ឬប្រមាថចាប់វាយខ្នោះ ចាក់សោផ្ទះគេ ចេះតែអំពើរចិត្តរបស់ខ្លួននោះទេ បើតាមច្បាប់វិញ ជំពាក់លុយ គឺច្បាប់រដ្ឋបវេណី មិនមែនច្បាប់ព្រហ្មទណ្ឌទេ គ្រាន់តែរឿងលុយ២លានរៀលសោះ ធ្វើឱ្យប្តីខ្មាស់គេពេញស្រុកតែម្តង ហេតុតែមានលុយចង់ធ្វើអ្វីស្រេចតែចិត្ត ។
ជុំវិញករណីចោទប្រកាន់ខាងលើនោះដែរ កោះសន្តិភាពមិនអាចសុំការពន្យល់ពី លោកនគរបាលស្រុកសូទ្រនិគមម្នាក់នោះបានទេ នៅព្រឹកថ្ងៃទី១៧ ខែកុម្ភៈ នេះ ។
ទាក់ទិនករណីខាងលើនេះដែរ លោកវរសេនីយ៍ឯក ហង្ស សុផាតភារម្យ នាយការិយាល័យនគរបាលព្រហ្មទ័ណ្ឌកំរិតស្រាល នៃស្នងការនគរបាលខេត្តសៀមរាប បានឱ្យដឹងថា លោកបានទទួលបញ្ជាពីលោកស្នងការនគរបាលខេត្ត ឱ្យចុះទៅពិនិត្យដល់ស្រុកសូទ្រនិគមនោះឱ្យបានជាក់ស្តែង ដើម្បីជួយរកភាពយុត្តិធម៌ជូនប្រជាពលរដ្ឋ ។លោកបន្តថា រឿងនោះពិតជាមានករណីចឹងមែន ហើយលោកកំពុងស្រាវជ្រាវឱ្យច្បាស់សិន ទើបលោកចាត់ការ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]