Money Tree ផ្ដល់ជូនអាហាររូបករណ៍៥០% និង១០០% ដល់អង្គការមូលនិធិកុមារកម្ពុជា

ភ្នំពេញ ៖ កាលពីថ្ងៃទី១២ ខែកុម្ភៈ ឆ្នាំ២០១៨ នេះ ក្រុមហ៊ុន Money Tree បានផ្ដល់ជូនអាហាររូបករណ៍ ៥០% និង១០០%ទៅដល់សិស្សានុសិស្សនៃអង្គការមូលនិធិកុមារកម្ពុជា និងសាលាភាពជាអ្នកដឹកនាំឡៃហ្គឺ ដើម្បីសិក្សាចំណេះដឹងផ្នែកហិរញ្ញវត្ថុកម្មវិធី Money Tree។

នាយកប្រចាំប្រទេសរបស់សាលាភាពជាអ្នកដឹកនាំឡៃហ្គឺ លោក Dom Sharpe បានថ្លែងថា កម្មវិធីសិក្សានេះ មានបញ្ជូលជីវិតជាក់ស្ដែង និងជីវិតរស់នៅរបស់សិស្ស ហើយសិស្សានុសិស្សនឹងទទូលបានចំណេះដឹងច្រើនបំផុត ដែលរស់នៅក្នុងសង្គម ។

លោកបន្ដថា កម្មវិធីសិក្សាដែលមានលក្ខណៈបែបនេះ សិស្សានុសិស្សនឹងមានឱកាសការរៀនសូត្របានល្អផងដែរ ។ កម្មវិធីសិក្សារបស់សាលាឡៃហ្គឺ តែងតែធ្វើឲ្យសិស្សឆ្ងល់ និងចង់ដឹង តើស្អែកមុខវិជ្ជារៀនបន្ទាប់គឺអ្វី? ទាំងអស់នេះបានផ្សារភ្ជាប់យ៉ាងសំខាន់ ជាមួយជីវិតជាក់ស្ដែងរបស់សិស្សានុសិស្ស ។

ចំណែកលោក Michael Reyes ស្ថាបនិក និងជានាយកក្រុមហ៊ុន Money Tree Asia Pacific បានលើកឡើងថា ក្រុមហ៊ុន Money Tree បាននឹងកំពុងសហការជាមួយសាលារៀន ដើម្បីពង្រឹងទៅលើចំណេះដឹងសិស្សានុសិស្ស ហើយកម្មវិធីនឹងមានអត្ថប្រយោជន៍ដល់សិស្សានុសិស្សទាំងអស់។

គួរបញ្ជាក់ថា អង្គការមូលនិធិកុមារកម្ពុជា ត្រូវបានបង្កើតឡើងនៅឆ្នាំ២០១៤ ដោយលោក ស្ដុត និសិន អតីតនាយកប្រតិបត្តិផ្នែកទីផ្សារហូលីវូត ។ សព្វថ្ងៃនេះ សាលានេះមានសិស្សដល់ទៅ ២១០០នាក់ ដែលតម្រូវឲ្យសាលាត្រូវបង្កើនការប្រឹងប្រែងកាន់តែខ្លាំងថែមទៀត ដើម្បីធានាឲ្យបាននូវភាគជោគជ័យសម្រាប់ពួកគេ ៕