ភ្នំភ្លើងមួយនៅជប៉ុន ដែលសម្លាប់មនុស្សយ៉ាងច្រើនកាលពី ប៉ុន្មានពាន់ឆ្នាំមុន បើផ្ទុះឡើងសាជាថ្មី អាចសម្លាប់មនុស្សប្រមាណ ១០០លាននាក់

ជប៉ុន៖ បន្ទុះភ្នំភ្លើង  គឺជាគ្រោះធម្មជាតិដ៏កាចសាហាវមួយ ដែលអាចឆក់យកជីវិតមនុស្សរាប់ពាន់ រាប់មុឺននាក់ ព្រមទាំងបង្ខំឲ្យមនុស្សជាច្រើន ជម្លៀសចាកចេញពីលំនៅឋាន ដើម្បីរកទីកន្លែងមានសុវត្ថិភាព។

ជាក់ស្តែង ភ្នំភ្លើង Kikai ដែលមានទីតាំងស្ថិតនៅភាគខាងត្បូង ប្រទេសជប៉ុន ធ្លាប់បានសម្លាប់ជីវិតមនុស្សជាច្រើន កាលពី ៧ ៣០០ឆ្នាំមុន។

បើយោងតាមសេចក្តីរាយការណ៍ បានឲ្យដឹងថា ក្រុមអ្នកវិទ្យាសាស្ត្រកំពុងមានការព្រួយបារម្ភ ខ្លាចក្រែងភ្នំភ្លើងនេះ អាចផ្ទុះឡើងជាថ្មីម្តងទៀត ខណៈដែលគេមិនអាចព្យាករណ៍បានថា វានឹងផ្ទុះឡើងនៅពេលណា ឲ្យប្រាកដឡើយ។

យ៉ាងណាមិញ តាមអះអាងបានបញ្ជាក់ថា បើភ្នំភ្លើង Kikai នេះ ផ្ទុះឡើងមែននោះ វានឹងអាចឆក់យកជីវិតមនុស្ស យ៉ាងហោចណាស់ ១០០លាននាក់ឯណោះ និងបង្កើតឲ្យមាន «Volcanic Winter» ។

គួរឲ្យដឹងថា Volcanic Winter កើតឡើងនៅពេល ដែលកម្ទេចកំទី ឬផេះ នៃបំផ្ទុះភ្នំភ្លើង ក្នុងកម្រិតបរិមាណដ៏ច្រើន រសាត់អណ្តែតទៅក្នុងបរិយាកាស។

ទន្ទឹមនឹងនេះផងដែរ អ្នកជំនាញបានរកឃើញថា បច្ចុប្បន្ននេះ ដោម (កំពូលមានសណ្ឋានក្រឡូម ឬមាត់ភ្នំភ្លើង) របស់កម្អែលភ្នំភ្លើង Kikai (Lava Dome) មានចម្ងាយត្រឹមតែ ៣០ម៉ែត្រប៉ុណ្ណោះ ពីផ្ទៃខាងលើ។

យ៉ាងណាក្តី ក្រុមអ្នកវិទ្យាសាស្រ្ត បានដឹងទៀតថា លទ្ធភាពនៃបន្ទុះភ្នំភ្លើង​ដ៏កាចសាហាវខាងលើនេះ ស្ថិតក្នុងកម្រិតភាគរយដ៏ទាបប៉ុណ្ណោះ ៕   

• ធម្មជាតិ