អ្នកជំនាញកំពុងបារម្ភ ខ្លាចបច្ចេកវិទ្យា AI នឹងធ្វើឲ្យមនុស្ស បាត់បង់ការងារធ្វើនាពេលអនាគត

បរទេស៖ សព្វថ្ងៃនេះដោយសារបច្ចេកវិទ្យាទំនើប មនុស្សយន្ត និងគ្រឿងអេឡិចត្រូ​និច​ផ្សេងៗ ត្រូវបានគេផលិតឡើង ដោយបំពាក់នូវបច្ចេកវិទ្យាវៃឆ្លាត AI ។

ផ្ទុយទៅវិញ លោកបណ្ឌិត Subhash Kak ជាសាស្ត្រាចារ្យខាងវិស័យបច្ចេកវិទ្យាកុំព្យូទ័រ បានព្រមានថា ភាពវៃឆ្លាត AI នេះ នឹងធ្វើឲ្យពិភពលោក ជួបប្រទះភាពអត់ការងារធ្វើ ជាក់ជាពុំខាន។

លោកបណ្ឌិតបានប្រាប់សារព័ត៌មាន NBC ថា បច្ចេកវិទ្យា AI ត្រូវបានគេយកមកប្រើប្រាស់ ក្នុងប្រព័ន្ធសេដ្ឋកិច្ច ដូចជា ក្នុងផលិតកម្មចំណីអាហារ ឧស្សាហកម្ម និងការគិតបញ្ជីជាដើម ដើម្បីជំនួសនូវការងាររបស់មនុស្ស។

លោកបានបន្តថា នៅរយៈពេលប្រហែល ១២ឆ្នាំខាងមុខ មនុស្សប្រមាណ ៨០០លាននាក់ នឹងបាត់បង់ការងារធ្វើ ដោយសារកំណើននៃបច្ចេកវិទ្យានេះ។ នេះក៏ព្រោះការប្រើប្រាស់​​បច្ចេកវិទ្យា AI ក្នុងវិស័យការងារ ​មាន​ភាព​ងាយស្រួល និង​ចំណាយ​តិច​ ជាងការជួល​កម្លាំង​ពលកម្មរបស់មនុស្ស។

គួររម្លឹកថា នាពេលថ្មីៗកន្លងទៅនេះ ក្រុម Hanson Robotics ដែលមានទីស្នាក់ការនៅទីក្រុងហុងកុង បានបង្ហាញនូវមនុស្សយន្តមួយប្រភេទ ដែលគេដាក់ឈ្មោះឲ្យថា Sophia។

Sophia ត្រូវបានគេផលិតឡើង ដោយបំពាក់នូវបច្ចេកវិទ្យាវៃឆ្លាត AI ដែលអនុញ្ញាតឲ្យមនុស្សយន្តប្រភេទនេះ អាចរៀនយល់ និងប្រាស្រ័យ​​ទាក់ទងជាមួយមនុស្ស ក្នុងលក្ខខណ្ឌដ៏ពិសេសជាច្រើន។ ហើយត្រូវ​បានគេ​ជឿជាក់ថា អាច​ដណ្តើម​ការងាររបស់មនុស្សបានទៀតផង។

ជុំវិញបញ្ហានេះ អ្នកវិទ្យាសាស្ត្រមួយចំនួន បានអំពាវនាវឲ្យស្ថាប័នពាក់ព័ន្ធ ចាត់វិធានការណ៍យ៉ាងណា ទប់ស្កាត់កុំឲ្យបច្ចេកវិទ្យា AI នេះ បង្កបញ្ហាប្រឈមដល់មនុស្សជាតិ នាពេលអនាគត៕