អតីតគ្រូ Everton ដែលត្រូវបានក្លិបទាត់ចោលកាលពីដើមរដូវកាល ពេលនេះក្លាយជាគ្រូជម្រើសជាតិ....

ហូឡង់៖ អតីតគ្រូបង្វឹកក្រុមស្ករគ្រាប់ Everton លោក Ronald Koeman ត្រូវបានតែងតាំងជាគ្រូបង្វឹកក្រុមជម្រើសជាតិ ហូឡង់ កាលពីម្សិលមិញនេះ។ 

Koeman ដែលនៅទំនេរពីការងារមួយរយៈ ក្រោយពី Everton បណ្ដេញចេញកាលពីខែតុលា កន្លងទៅ នឹងត្រូវដឹកនាំក្រុមជម្រើសជាតិហូឡង់ ជាលើកដំបូងទល់នឹងក្រុមតោកំណាច អង់គ្លេស នៅថៃ្ងទី២៣ ខែមីនា ខាងមុននេះ។

អតីតអ្នកចាត់ការរបស់ក្លិប Southampton រូបនេះ បានចុះកុងត្រាជាមួយជើងឯករង World Cup ឆ្នាំ២០១០ រយៈពេល ៤ឆ្នាំកន្លះ។ ពោលគឺ រហូតដល់ព្រឹត្ដិការណ៍ World Cup ឆ្នាំ២០២២។

Koeman ត្រូវបានគេចាត់ទុកថា ជាវីរបុរសមួយរូបរបស់ហូឡង់ តាំងតែជំនាន់លោកនៅជាកីឡាករ ដែលក្នុងនោះ រូបលោកធ្លាប់លេងឲ្យបាន៧៨ប្រកួត និងជួយជម្រើសជាតិលើកពានទ្វីបអឺរ៉ុបកាលពីឆ្នាំ១៩៨៨។

គួរឲ្យដឹងផងដែរថា គ្រូបង្វឹកវ័យ៥៤ឆ្នាំរូបនេះ នឹងឡើងជំនួសតំណែងលោក Dick Advocaat ដែលបានលាឈប់ ដោយសារតែ មិនអាចនាំហូឡង់ឡើងទៅ World Cup នៅរុស្ស៊ីបាន ៕