មកពីមូលហេតុនេះសោះ ទើបបានជា Mourinho មិនទិញផ្ទះក្នុងទីក្រុង Manchester

អង់គ្លេស៖ គ្រូបង្វឹករបស់ក្រុមបិសាចក្រហម Manchester United លោក Jose Mourinho បានបង្ហើបប្រាប់រឿងមួយ ដែលខ្លួនសម្រេចចិត្ដស្នាក់នៅ ក្នុងសណ្ឋាគារ The Lowry Hotel ជាជាងការទិញផ្ទះរស់នៅក្នុងទីក្រុង Manchester ។

ចំពោះមូលហេតុនោះ គ្រូបង្វឹកឆ្នើមរូបនេះ បានលើកឡើងថា ដោយសារតែរូបលោកគិតថា វាមានភាពងាយស្រួលជាង និងអាចនៅជិតជំនួយការរបស់លោក។ 

គួរឲ្យដឹងថា តាំងពីក្លាយជាអ្នកចាត់ការក្នុងកីឡដ្ឋាន Old Trafford អស់រយៈពេល២ឆ្នាំ ក៏ពិតមែន ប៉ុន្ដែរហូតមកទល់ពេលនេះ លោក Jose Mourinho ពុំមានផ្ទះសម្រាប់រស់នៅនោះទេ។ ពោលគឺ បានស្នាក់នៅសណ្ឋាគារអស់រយៈពេលជិត ២ឆ្នាំមកហើយ។

អ្នកចាត់ការទូទៅ សញ្ជាតិព័រទុហ្កាល់ខាងលើ​ បានសម្រេចចិត្តជ្រើសរើសយកសណ្ឋាគារ The Lowry Hotel ដែលមានទីតាំងស្ថិតនៅតាមមាត់ទន្លេ Irwell ជាទីស្នាក់អាស្រ័យ ដោយត្រូវចំណាយប្រាក់ ៨១៦ផោនឯណោះ (ប្រហែលជាង ១១៣៨ដុល្លារអាមេរិក) ក្នុងមួយយប់ ។

លោក Mourinho និយាយថា៖

«ប្រសិនបើអ្នកគាំទ្រ ចង់ឲ្យខ្ញុំមានផាសុកភាព គឺបែបនេះហើយជាអ្វីដែលខ្ញុំគិតថា មានផាសុកភាពសម្រាប់ខ្ញុំ។ ខ្ញុំមិនចង់ឱ្យនរណាម្នាក់ មានការព្រួយបារម្ភទេ ព្រោះខ្ញុំរស់នៅក្នុងផ្ទះល្វែងមួយនៅខាងក្នុងសណ្ឋាគារ ដែលខ្ញុំមានភាពកក់ក្តៅ ហើយខ្ញុំមានអ្វីគ្រប់យ៉ាង ដែលខ្ញុំចង់បានដូចជាខ្ញុំរស់នៅក្នុងផ្ទះអ៊ីចឹង» ៕