ខេត្តព្រះវិហារ ៖ ព្រឹកថ្ងៃទី១០ មីនា ២០១២ ថ្មីៗនេះ មានឧបទ្ទវហេតុគ្រោះថ្នាក់ចរា ចរណ៍២ករណីផ្ទួនៗគ្នា បណ្តាលឱ្យមនុស្ស៦នាក់រងរបួសធ្ងន់ និងស្រាល ចំណែកឯរថយន្តខូចខាតធ្ងន់ធ្ងរក្រពឹតរួញមើលទៅគួរឱ្យញាក់សាច់។
ករណីគ្រោះថ្នាក់ទី១ គឺរថយន្ដ១គ្រឿងម៉ាក LEXUS 470 ពណ៌ទឹកប្រាក់ បានក្រឡាប់ កាលពីវេលាម៉ោង៨ព្រឹក ក្នុងពេលធ្វើដំណើរទៅចូលរួមពិធីជាមួយលោក ឧបនាយករដ្ឋមន្ដ្រីគាត ឈន់ និងលោកជំទាវ ហ៊ុន ម៉ាណា អគ្គនាយិកាវិទ្យុ និងទូរទស្សន៍បាយ័ន នាំអំណោយទៅចែកជូន និងសួរសុខទុក្ខកងទ័ពសម្ព័ន្ធមេត្រីភាពក្នុងតំបន់មុំបី។ អ្នកជិះក្នុងរថយន្ដខាងលើមាន ១-លោកឧត្ដមសេនីយ៍ទោ យឹម ពឹម មេបញ្ជាការកងពលតូចអន្ដរាគមន៍លេខ៨ រងរបួសស្រាល ២-លោកវរសេនីយ៍ឯក មាស មេធ មេបញ្ជាការរងកងពលតូចអន្ដរា គមន៍លេខ៨ជាអ្នកបើកបរនៅលើផ្លូវក្រាលក្រួសក្រហម លេខ២៦២៨ ស្ថិតក្នុងភូមិវាលធំ ឃុំជាំក្សាន្ដ ស្រុកជាំក្សាន្ដ រងរបួសស្រាល។ មូលហេតុដែលបណ្ដាលឱ្យរថយន្ដឡិចស៊ីស៤៧០ក្រឡាប់ គឺពេលដល់ចំណុចផ្លូវកែង អ្នកបើកបរជាន់ហ្វ្រាំងបង្ខំរេចង្កូតបោកក្រឡាប់៣ ត្រឡប់ធ្លាក់ពីលើផ្លូវ បះជើងច្រងាងៗ នៅសល់ប្រហែលតែពីម៉ែត្រទៀតត្រូវធ្លាក់ចូលទឹកប្រឡាយទៅហើយ។
ក្រោយគ្រោះថ្នាក់ក្រឡាប់រថយន្ត លោកឧត្ដមសេនីយ៍ទោ យឹម ពឹម បានវាយកញ្ចក់រថយន្ដលូនចេញមកក្រៅជាមួយអ្នកបើកបរដែលជាការបង្ហាញថា ពួកគាត់រងរបួសស្រាល។ ខណៈនោះមានអ្នកសារព័ត៌មានជាតិប្រចាំប្រាសាទព្រះវិហារដែលបានធ្វើ ដំណើរជាប់គ្នានោះ មានកោះសន្ដិភាព ទូរទស្សន៍ហង្សមាស និង CTN ជួយសង្គ្រោះបញ្ជូនតាមរថយន្ដនាយទាហានផ្សេងទៀតរបស់អង្គភាព កងពលតូចលេខ៨ ទៅសង្គ្រោះនៅក្នុងគិលាណដ្ឋានទីបញ្ជាការនៃអគ្គបញ្ជាការប្រចាំ ជួរមុខ។
ករណីទី២ វេលាម៉ោង១១និង៣០នាទី មានរថយន្ដ១គ្រឿងទៀតម៉ាក PAJERO ពណ៌ស្លែ ជិះគ្នា៤នាក់សុទ្ធជាមន្ដ្រីក្នុងមន្ទីរហិរញ្ញវត្ថុខេត្ដបើកបរ ដោយលោកនូ តារា អនុប្រធានមន្ទីរសេដ្ឋកិច្ច ហិរញ្ញវត្ថុខេត្ដព្រះវិហារ បានក្រឡាប់ ជាច្រើនត្រឡប់លើដងផ្លូវជាតិលេខ៦២ នៅចំណុចគីឡូម៉ែត្រលេខ១៨២ ស្ថិតក្នុងភូមិរំដោះស្រែ ឃុំរំដោះស្រែ ស្រុកជាំក្សាន្ដ ខណៈដែលត្រឡប់មកពីចូលរួមពិធីលោកឧបនាយករដ្ឋមន្ដ្រី គាត ឈន់ សម្ពោធដាក់ឱ្យប្រើប្រាស់សាលាបឋមសិក្សាភូមិម្លិះ ស្រះម្លិះ និងនាំអំណោយចុះសួរសុខទុក្ខកងទ័ព អង្គភាពសម្ព័ន្ធមេត្រីភាព ក្នុងតំបន់មុំបី។
លោកនូ តារា ជាអ្នកបើកបរបាននិយាយថា ដោយសារលោកងងុយដេកមួយភាំងធ្វើឱ្យរេចង្កូតទៅបុកបង្គោលគីឡូម៉ែត្រ ខាងលើនេះ បណ្ដាលឱ្យរថយន្ដក្រឡាប់ជាច្រើនត្រឡប់រងរបួសធ្ងន់២នាក់ ស្រាល២នាក់ ហើយត្រូវបាន គេនាំទៅសង្គ្រោះនៅមន្ទីរពេទ្យបង្អែក១៦មករា៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
