រាជធានីភ្នំពេញ ៖ បុរសជាជនជាតិចិនម្នាក់បើកបររថយន្តមួយគ្រឿងទៅប៉ះរ៉ឺម៉កដឹកបន្លែរងការខូចខាតបន្តិចបន្តួចហើយមិនព្រមឈប់ដោះស្រាយបានព្យាយាមបើករត់គេចទៅបុកម៉ូតូមួយគ្រឿង និងរថយន្តមួយគ្រឿងទៀតរងការខូចខាតធ្វើឲ្យប្រជាពលរដ្ឋផ្ទុះកំហឹងព្រួតវាយបែកមាត់ហូរឈាម ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង៥ទៀបភ្លឺព្រឹក ថ្ងៃទី០២ ខែកុម្ភៈ ឆ្នាំ២០១៨ ត្រង់ចំណុចផ្លូវ៣៣៦កែងនឹងផ្លូវម៉ៅសេទុង ស្ថិតក្នុងសង្កាត់បឹងសាឡាង ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញបុរសជាជនជាតិចិនម្នាក់ស្រវឹងធ្លាក់ភ្នែកបើករថយន្តមួយគ្រឿងម៉ាក ហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ ២AJ-៤១០៩ ធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីត្បូងទៅជើងបើករេពេញផ្លូវលុះមកដល់ចំណុចកើតហេតុខាងលើក៏រេចង្កូតទៅខាងស្តាំទៅប៉ះនឹងរ៉ឺម៉កដឹកបន្លែមួយគ្រឿងដែលឈប់ចតនៅចិញ្ចើមផ្លូវបណ្តាលឱ្យរងការខូចខាតបន្តិចបន្តួច តែរថយន្តបង្កមិនបានឈប់ចុះមកដោះស្រាយគ្នានោះទេ គឺបានព្យាយាមបើករត់គេចត្រូវប្រជាពលរដ្ឋបើកដេញតាមពីក្រោយរហូតដល់ចំណុចផ្លូវទល់២៦១ ខាងត្បូងអធិការដ្ឋាននគរបាលខណ្ឌទួលគោកចម្ងាយ៨០០ម៉ែត្រ ស្ថិតក្នុងសង្កាត់បឹងសាឡាង ខណ្ឌទួលគោក ទើបអាចស្ទាក់ចាប់បាន ។
ពេលនោះរថយន្តបង្កបានព្យាយាមរយ៉ែរថយន្តថយក្រោយទៅបុកម៉ូតូរបស់ប្រជាពលរដ្ឋដែលបើកដេញតាមពីក្រោយមួយគ្រឿងម៉ាក គុបជ្រុង ពណ៌ខៀវ អត់មានស្លាកលេខ ដែលឈប់ខាងក្រោយរថយន្តបង្កបណ្តាលឱ្យរងខាងខូចខាតបន្តិចបន្តួច ហើយរថយន្តបង្កបានបើករត់គេចបន្តទៀតទៅតាមបណ្តោយផ្លូវ២៦១ ក្នុងទិសដៅពីត្បូងទៅជើង បានប្រមាណ១០០ម៉ែត្រពីកន្លែងនោះរថយន្តបង្កក៏បានរេចង្កូតទៅខាងឆ្វេងទៅបុកគូរថយន្តមួយគ្រឿងទៀតម៉ាក កាមរីបាឡែន ពណ៌ស ពាក់ស្លាកលេខភ្នំពេញ ២AD-៣១៣៣ ដែលបើកបរដោយបុរសម្នាក់ក្នុងទិសដៅបញ្ច្រាសទិសគ្នាបណ្តាលឱ្យធ្លាក់កាងខាងក្រោយ ហើយរថយន្តបង្កនៅតែមិនព្រមឈប់ចុះមកដោះស្រាយទេ គឺបានបើករត់គេចខ្លួនបន្តទៀតទាំងស្ថានភាពរេពេញផ្លូវហើយក៏ត្រូវប្រជាពលរដ្ឋក៏ដូចជាសមត្ថកិច្ចមូលដ្ឋានបើកដេញតាមពីក្រោយរហូតដល់ចំណុចការដ្ឋានកំពុងសាងសង់ស្ពានអាកាសនៅស្តុបផ្សារដីហុយ ស្ថិតក្នុងសង្កាត់ទឹកថ្លា ខណ្ឌសែនសុខ ស្រាប់តែរថយន្តបង្កបើកឡើងទៅខាងលើស្ពាននោះទៅបុកនឹងបង្កាន់ដៃស្ពានបណ្តាលឱ្យរថយន្តបង្កបែកកង់ទៅមុខលែងរួច ។
ភ្លាមៗនោះប្រជាពលរដ្ឋដែលបើកដេញតាមរថយន្តបង្កបានផ្ទុះកំហឹង និងបាននាំគ្នាយកដុំថ្មវាយទៅលើរថយន្តបង្កបណ្តាលឱ្យបែកកញ្ចក់ខាងមុខ និងខាងក្រោយ និងវាយទៅលើអ្នកបើកបររថយន្តបង្កបណ្តាលឲ្យរងរបួសបែកមុខបែកមាត់ហូរឈាមស្រោចខ្លួន ។ ក្រោយពេលកើតហេតុសមត្ថកិច្ចមូលដ្ឋានបានទាក់ទងហៅសមត្ថកិច្ចជំនាញឱ្យចុះមកធ្វើការវាស់វែងយករថយន្តបង្ករួមទាំងម៉ូតូរងរងគ្រោះ និងរថយន្តរងគ្រោះចំនួនពីរគ្រឿងទៀតទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរងចាំធ្វើការដោះស្រាយគ្នានៅពេលក្រោយ ចំណែករ៉ឺម៉កដឹកបន្លែខូចខាតតិចតួចមិនបានទាមទារសំណងទេ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
