រាជធានីភ្នំពេញ ៖ នៅក្នុងពេលកញ្ញាឈិន ម៉ានិច្ច កំពុងតែលូតឡើងប្រជាប្រិយភាពក្នុងពិភពសិល្បៈស្រាប់តែមានគេទម្លាយឱ្យដឹងថា មានបុរសចង់បានរូបនាងជាគូអនាគតប្រសិនបើនាងយល់ព្រម ។
ទស្សនិកជនបានសរសើរទឹកដមសំឡេងរបស់កញ្ញាឈិង ម៉ានិច្ច ពីរោះក្រអួនក្រអៅមិនចាញ់អតីតតារាចម្រៀងពៅ បញ្ញាពេជ្រ ទេ។ តាមអ្នករៀបចំកម្មវិធីប្រគំតន្ត្រីឱ្យដឹងកាលពីពេល ថ្មីៗកន្លងមកថា ទោះជាម៉ានិច្ច មិនសូវមានបទល្បីច្រើនបន្តបន្ទាប់គ្នា ដូចតារាហង្សមាស ដទៃទៀតក្តី តែតម្លៃខ្លួននាងមិនចាញ់លោកនី រតនា និងរ៉េត ស៊ូហ្សាណា ទេ។ ថ្លៃខ្លួននាងច្រៀងមួយកម្មវិធីជាង១ពាន់ដុល្លារឯណោះ ។
ប្រភពដដែលឲ្យដឹងទៀតថា នាពេល ឆាប់ៗខាងមុខនេះ កញ្ញាឈិន ម៉ានិច្ច នឹងបញ្ចេញក្រុមរាំអមផ្ទាល់ខ្លួនដើម្បីទាក់ទាញការចាប់អារម្មណ៍ថែមទៀតនៅលើឆាកតន្ត្រី ម្យ៉ាងដើម្បីប្រជែងទីផ្សាររៀមច្បងរួមផលិតកម្ម ។
អ្នកសិល្បៈមួយចំនួនដែលស្និទ្ធតារាចម្រៀង ឈិន ម៉ានិច្ច បានសរសើរថា នាង និងសង្សារស្រលាញ់គ្នាខ្លាំងណាស់ ហើយបុរសនោះតាមការពារនាងតាំងពីមុនពេលនាងលើកពានរង្វាន់ Cambodian Idol ម្ល៉េះ មិនមែនទើបតែស្រឡាញ់ខ្លាំងពេលដែលនាងល្បីទេ ។
ដោយសារឈិន ម៉ានិច្ច មានប្រជាប្រិយភាពលូតឡើងទៅមុខជាលំដាប់ទើបអាពាហ៍ពិពាហ៍មិនអាចកើតឡើងបាន ព្រោះនាងចង់ក្រសោបយកទីផ្សារឱ្យល្អ ប្រមូលលុយសន្សំទុកដើម្បីរៀបផែនការឱ្យប្រសើរតទៅទៀត ។ ម្យ៉ាងបើរៀបការគឺត្រូវបាត់ចំណូលច្រើន និងត្រូវប៉ះពាល់ផ្នែកកសាងកេរ្តិ៍ឈ្មោះ ព្រោះតារាស្រីបើរៀបការហើយពិបាកទប់ប្រជាប្រិយឱ្យនឹងណាស់ ។
ឈិន ម៉ានិច្ច ដែលសម្រេចក្តីសុបិនក្លាយទៅជាតារាចម្រៀងផលិតកម្មហង្សមាស រួចផុតពីការច្រៀងតាមបៀរហ្គាដិន នាពេលរាត្រីនោះ បានបណ្តុះបណ្តាលប្អូនប្រុសពៅរបស់នាងម្នាក់ទៀតឱ្យចូលច្រៀងដែរ គឺកុមារឈិន សីហា ។ ម៉ានិច្ច និយាយថា ប្អូនប្រុសរបស់នាងមានទេពកោសល្យល្អ អាចធ្វើជាអ្នកចម្រៀងអាជីពបាននាពេលអនាគត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]