រាជធានីភ្នំពេញ ៖ កូនប្រុសទាំង៣នាក់របស់លោកព្រាប សុវត្ថិ គឺសុវត្ថិ មុនីវណ្ណ សុវត្ថិ មុន្នីនាគ និងសុវត្ថិ សេរីវុឌ្ឍ កំពុងធ្វើឱ្យទស្សនិកជនចាប់អារម្មណ៍ ដោយសារតែរូបរាងស្រស់សង្ហា ពិសេសក្លាយជាតារាចម្រៀង ។ ពួកគេទើបតែត្រូវផលិតកម្មរស្មីហង្សមាស ប្រកាសជាតារាចម្រៀងប្រចាំផលិតកម្មកាលពីដើមខែមករា ឆ្នាំ២០១៨នេះ ។
សុវត្ថិ មុន្នីវណ្ណ មានអាយុ២០ឆ្នាំ សុវត្ថិ មុន្នីនាគ វ័យ១៨ឆ្នាំ និងសុវត្ថិ សេរីវុឌ្ឍ អាយុ១៥ឆ្នាំ។ ពួកគេសុទ្ធតែនៅសិក្សាទាំងអស់ ។ យុវជនសុវត្ថិ មុន្នីវណ្ណ បានបញ្ចប់ថា្នក់វិទ្យាល័យរួចហើយ ខណៈដែលបច្ចុប្បន្ននេះកំពុងសិក្សាថ្នាក់បរិញ្ញាបត្រ ផ្នែកគ្រប់គ្រងជំនួញ(Business Management) ចំណែកប្អូនពីរនាក់ទៀតកំពុងសិក្សានៅថ្នាក់វិទ្យាល័យ ។
មានតារាវ័យក្មេងជាច្រើនសុទ្ធតែប្រឈមមុខចំពោះការសិក្សា ដោយការតែការងារសិល្បៈរវល់ ពួកគេមិនសូវបានចូលរៀនជាប់លាប់ទេ រហូតដល់អ្នកខ្លះត្រូវព្យួរការសិក្សាមួយរយៈដើម្បីពង្រឹងកេរ្តិ៍ឈ្មោះនៅក្នុងវិស័យសិល្បៈ ។
កូនប្រុសទាំងបីនាក់របស់កំពូលតារាចម្រៀងលោកព្រាប សុវត្ថិ បានលើកឡើងកាលពីពេល ថ្មីៗកន្លងមកថា ពួកគេនឹងធ្វើឱ្យការសិក្សា និងការងារសិល្បៈដើរទន្ទឹមគ្នា មិនឱ្យប៉ះពាល់គ្នាឡើយ ។ បើទោះបីជាបារម្ភតិចតួចចំពោះបញ្ហានេះ ប៉ុន្តែនឹងព្យាយាមបែងចែកឱ្យបានច្បាស់លាស់រវាងការសិក្សា និងសិល្បៈ ។
សុវត្ថិ មុនីនាគ និយាយថា ក្រោយចូលស៊ុបក្នុងសិល្បៈ ដោយជ្រកក្រោមទ្រនំជាមួយឪពុក គេនឹងមិនធ្វើឱ្យការងារសិល្បៈប៉ះពាល់ដល់ការសិក្សាឡើយ ។ កូនប្រុសកណ្តាលដែលមានរាងស្រស់សង្ហាររូបនេះ និយាយបន្ថែមថា «ខ្ញុំក៏មានការបារម្ភដែរ តែដោយសារខ្ញុំបែងចែកពេលវេលាការសិក្សា និងការចូលធ្វើសិល្បៈដាច់ដោយឡែកពីគ្នា ។ ហេតុនេះហើយ ទើបធ្វើឱ្យខ្ញុំមានពេលវេលាឈ្វេងយល់ និងរិះរកសម្រាប់ការសិក្សា និងសិល្បៈដូចគ្នា ។ វានឹងមិនប៉ះពាល់ដល់ការសិក្សាឡើយ » ។
ចំណែកកូនប្រុសពៅ គឺសុវត្ថិ សេរីវុឍ្ឍ ក៏បានអះអាងដូចបងប្រុសដែរថា ខ្លួននឹងមិនធ្វើឱ្យប៉ះពាល់ដល់ការសិក្សាទេ ដោយនឹងបែងចែកឱ្យច្បាស់ រវាងការសិក្សា និងសិល្បៈ ។
មុនក្លាយជាតារាចម្រៀងផ្លូវការប្រចាំផលិតកម្មរស្មីហង្សមាស គេសម្គាល់ឃើញថា ក្នុងចំណោមកូនប្រុសទាំងបី គឺមុនីវណ្ណ និងមុនី្ននាគ ធ្លាប់ឡើងច្រៀងជាច្រើនដងតាំងពីពេលពួកគេទាំង២ នៅកុមារភាពមកម្ល៉េះ ។ ជាមួយគ្នានេះដែរ ពួកគេតែងតែបង្ហាញវត្តមានរាំលើឆាកប្រគំតន្ត្រី ធំៗទាំងនៅក្រុងភ្នំពេញ និងបណ្តាខេត្តនានា ជាមួយនឹងក្រុមរាំរបស់លោកព្រាប សុវត្ថិ ។ អាចនិយាយថា ទឹកដមសំឡេងពីរោះមិនចាញ់ឪពុកដែលជាតារាចម្រៀងក្នុងដួងចិត្តទស្សនិកជនឡើយ ។
បទចម្រៀងដំបូងដែលពួកគេច្រៀងរួមគ្នាទាំងបីនាក់ ទទួលបានការចាប់អារម្មណ៍ និងកោតសរសើរខ្លាំងពីយុវវ័យ បើទោះបីមានការរិះគន់តិចតួចថា ដោយសារមានខ្សែឪពុកជាតារាល្បីប្រចាំប្រទេសក៏ដោយ ។ រហូតមកដល់ពេលនេះបទចម្រៀងរបស់ពួកគេដែលបង្ហោះនៅលើយូធូប មានអ្នកចូលទស្សនាប្រមាណជាង២លាននាក់ ។
ភរិយាលោកព្រាប សុវត្ថិ គឺលោកស្រី ឡុង ស្រីមុំ ឱ្យដឹងថា កូនប្រុសទាំងបីរបស់អ្នកស្រី និងលោកព្រាប សុវត្ថិ មាននិស្ស័យសិល្បៈនេះ តាំងពីកំណើត ។ ដោយសារតែទេពកោសល្យនេះហើយ ទើបផលិតកម្មហង្សមាសសម្លឹងឃើញពួកគេ ដោយរំពឹងថា នឹងទទួលបានប្រជាប្រិយភាពដូចឪពុកដែលជាតារាចម្រៀងល្បីជាច្រើនឆ្នាំ ។ លោកស្រីឡុង ស្រីមុំ បញ្ជាក់បន្ថែម «គាត់មានដុងតាំងពីតូចមក គាត់ចូលចិត្តច្រៀង» ។
ខណៈមានវត្តមាននៅក្នុងសន្និសីទសារព័ត៌មាន ក្នុងថ្ងៃប្រកាសកូនប្រុសទាំងបីជាតារាចម្រៀងពេញសិទ្ធិរបស់ហង្សមាស កាលពីថ្ងៃទី៨ មករា ២០១៨ លោកព្រាប សុវត្ថិ បានលើកឡើងពីការដែលលោកជំរុញកូនទាំងបីឱ្យចូលក្នុងវិស័យសិល្បៈដូចខ្លួន ដោយសារតែកូនប្រុសទាំងបីមាននិស្ស័យសិល្បៈដូចលោកពីធម្មជាតិមក ។
លោកព្រាប សុវត្ថិ និយាយថា «និស្ស័យរបស់គាត់បានល្អសម្រាប់ផ្នែកសិល្បៈ អ៊ីចឹងខ្ញុំពេញចិត្ត សប្បាយចិត្តទទួលនូវលទ្ធផលបែបនេះ។ ថាខ្ញុំមិនជំរុញក៏មិនអាចថាបានដែរ ព្រោះថានៅជាមួយគ្នារាល់ពេលវេលា អ៊ីចឹងអ្វីដែលនៅជាមួយគ្នា ធ្វើឱ្យមានភាពបន្សាំុក្នុងការចូលចិត្ត និងការពេញចិត្តប្រាកដជាមានច្រើន អ៊ីចឹងអ្វីដែលជាសិល្បៈនេះ បើសិនយើងមិនដុងមានទេពកោសល្យសម្រាប់ខ្លួនឯងទេ យើងជំរុញយ៉ាងណាក៏មិនអាចទៅបានដែរ» ។
កូនប្រុសច្បងសុវត្ថិ មុនីវណ្ណ មិនត្រឹមតែអាចច្រៀងបានពីរោះនោះទេ លោកថែមទាំងចេះលេងភ្លេងផងដែរ ។
សមត្ថភាពគឺជារឿងមួយដែលធ្វើឱ្យលោកព្រាប សុវត្ថិ និងលោកស្រីឡុង ស្រីមុំស្រលាញ់កូនប្រុសទាំងបីលើសពីកែវភ្នែក និងជំរុញកូនឱ្យចូលកាន់តែជ្រៅក្នុងវិថីសិល្បៈ ។ ដោយឡែកអត្តចរិតរបស់ពួកគេក៏ល្អផងដែរ ដោយលោកស្រីស្រីមុំ សរសើរថា កូនទាំងបីនេះមិនដែលធ្វើឱ្យលោកស្រី និងប្តីពិបាកចិត្តឡើយ ។
ភរិយារបស់លោកព្រាប សុវត្ថិ បានអះអាងបន្ថែមប្រាប់កោះសន្តិភាពថា «គាត់ចេះស្រលាញ់និងគោរពគ្នាទៅវិញទៅមក ពេលធ្វើអីពេលខ្លះទៅក៏ត្រូវពិភាក្សាគ្នា អត់ដែលអន់ចិត្ត ឬនិយាយពាក្យអីដែលមិនល្អទេ គាត់ស្រលាញ់គ្នា អប់រំគ្នាទៅវិញទៅមក ផ្តល់កិត្តិយសឱ្យគ្នា មិនមែនខ្លះបងប្អូនគ្នា អាងតែបងទៅស្តីបន្ទោស វាយប្អូនអីអត់ទេ និយាយទៅ គឺគោរពស្រលាញ់គ្នាទៅវិញទៅមក បើបងធ្វើខុសសុំទោសប្អូន ហើយបើប្អូនធ្វើខុស ក៏ត្រូវសុំទោសបងវិញដូចគ្នា »។
មិនមែនតែម្តាយដែលសរសើរពីចរិតរបស់តារាចម្រៀងវ័យក្មេងទាំងបីដួងទេ កាលពីពេលកន្លងទៅអ្នកនាង ពេជ្រ សោភា ក៏បានសរសើរពីចរិតនៅខាងក្រៅរបស់ពួកគេទាំងបីដែរ ដោយបានសរសេរបង្ហោះលើហ្វេសប៊ុករបស់អ្នកនាង ។
នៅមុខមហាជន គេសង្កេតឃើញថា កូនប្រុសទាំងបីរបស់លោកព្រាប សុវត្ថិ មិនសូវមាត់សូវកទេ តែម្តាយរបស់ពួកគេនិយាយថាពេលនៅផ្ទះពួកគេលេងសើចច្រើន គ្រាន់តែថា ពួកគេនៅក្មេង ហើយជាលើកទី១ដែលពួកគេឡើងនិយាយជាសាធារណៈ ។
ចំណែកលោកព្រាប សុវត្ថិវិញ លើកឡើងថារវាងលោក និងកូន ប្រៀបដូចជាឪពុកផង និងជាមិត្តភក្តិផង ដែលភាគច្រើនតែងតែពិភាក្សារាល់ការសម្រេចចិត្តអ្វីមួយ ហើយលោកគោរពការសម្រេចចិត្តរបស់កូន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
