មុខអ៊ីចឹង រាងអ៊ីចឹង ជឿអត់ថាកូន៧? តោះៗ មកដឹងតិចនិចថែរក្សារាងពីអ្នកម្តាយវ័យ ៤៣ឆ្នាំរូបនេះ

អាមេរិក៖ ពិតណាស់! ភាគច្រើននៅពេលដែលស្ត្រីមានផ្ទៃពោះ និងសម្រាលកូនរួចតែងតែផ្លាស់ប្តូររូបរាងកាយពីស្រឡូនទៅជាម៉ាប់ ឬមានស្បែកយាធ្លាក់ជាក់ជាពុំខាន ប៉ុន្តែសម្រាប់អ្នកម្តាយវ័យ៤៣ឆ្នាំ ដែលមានកូនដល់ទៅ ៧នាក់រូបនេះវិញ បែរជាមានរូបរាងស្រស់ស្អាតខ្លាំង រហូតទទួលបានការចាប់អារម្មណ៍ពេញក្នុងបណ្តាញសង្គមតែម្តង។

អ្នកស្រី Jessica Enslow អាយុ ៤៣ឆ្នាំ មកពីរដ្ឋ Utah សហរដ្ឋអាមេរិក បានផ្តល់កំណើតកូនដំបូងនៅក្នុងឆ្នាំ ១៩៩៤ គឺនៅពេលដែលអ្នកស្រីមានអាយុ ២០ឆ្នាំ។ បន្ទាប់មក អ្នកស្រីក៏បានពរពោះ និងសម្រាលកូនទី២នៅក្នុងឆ្នាំ ១៩៩៦ ហើយអ្នកស្រីក៏បានបង្កើនសមាជិកគ្រួសាររហូតដល់ទៅ៥ដងបន្ថែមទៀត ជាមួយស្វាមី២នាក់ផ្សេងគ្នា ទើបរហូតដល់ឆ្នាំ២០១៣ អ្នកស្រីសម្រាលបានកូនប្រុសពៅម្នាក់ទៀត។

ស្របពេលដែលស្ត្រីជាម្តាយគ្រប់រូបដែលសម្រាលកូនជាច្រើនលើក តែងតែមានសាច់យាធ្លាក់នោះ អ្នកស្រី Enslow អាចរក្សារាងបានយ៉ាងស្អាត និងក្មេងជាងវ័យខ្លាំងមែនទែន។

តាមពិតទៅ អ្នកម្តាយដ៏ស្រស់ស្អាតរូបនេះ មិនមែនមានរាងស្រឡូនតាំងពីដើមមកនោះទេ។ អ្នកស្រីបានចាប់ផ្តើមឡើងទម្ងន់បន្តិចម្តងៗ តាំងពីសម្រាលកូនដំបូងមក។ រហូតដល់ពេលដែលសម្រាលកូនពៅរួច ទើបអ្នកស្រីចាប់អារម្មណ៍ថា មិនពេញចិត្តនឹងរាងរបស់ខ្លួនឯង ហើយក៏សម្រេចចិត្តចាប់ផ្តើមផ្លាស់ប្តូររូបរាងរបស់ខ្លួន នៅក្នុងខែកុម្ភៈ ឆ្នាំ ២០១៧ កន្លងទៅនេះ។

អ្នកស្រីបានសរសេរនៅក្នុងបណ្តាញសង្គមថា៖

“ពេលខ្ញុំចេញពីមន្ទីរពេទ្យ ហើយត្រលប់មកផ្ទះវិញនោះ ខ្ញុំក៏បានយកខោខូប៊យដែលខ្ញុំធ្លាប់ស្លៀកមុនពេលពរពោះនោះមកស្លៀកម្តងទៀត ហើយទើបដឹងថា ខ្ញុំអាចសូកវាចូលបានត្រឹមពាក់កណ្តាលភ្លៅតែប៉ុណ្ណោះ។ វាគឺជាកាលៈទេសៈដ៏តក់ស្លុត និងបាក់ទឹកចិត្តតិចៗដែរ”។

អ្នកស្រី Enslow បានអះអាងថា ភាពជោគជ័យដ៏ធំធេងក្នុងការសម្រករាងនេះ ក៏ដោយសារតែមានការគាំទ្រពីសំណាក់គ្រួសាររបស់អ្នកស្រី។ 

ក្នុងនាមជាម្តាយដ៏រវល់មួយរូប អ្នកស្រីនៅតែឆ្លៀតយកការហាត់ប្រាណ ទៅបញ្ជូលជាមួយសកម្មភាពប្រចាំថ្ងៃរបស់អ្នកស្រី។

គួរបញ្ជាក់ថា មុនពេលដែលអ្នកស្រីសម្រេចចិត្តតស៊ូយករាងស្រឡូននៅក្នុងឆ្នាំ ២០១៧នោះ  អ្នកស្រីតែងតែបរិភោគ Nutella ជារៀងរាល់ថ្ងៃ ហើយតែងតែហាត់ប្រាណចម្រុះក្បាច់។

ទោះជាយ៉ាងណា ឥឡូវនេះ អ្នកស្រីតែងតែទៅក្លឹបហាត់ប្រាណ ៣ដងក្នុងមួយសប្តាហ៍ នៅម៉ោងដែលកូនរបស់អ្នកស្រីនៅសាលា ហើយអ្នកស្រីក៏តែងតែក្រោកពីព្រលឹមជារៀងរាល់ព្រឹក ដើម្បីហាត់ក្បាច់ cardio ជាប្រចាំផងដែរ។

អ្នកស្រីបានសរសេរនៅក្នុងបណ្តាញសង្គម Instagram ថា៖

“វាគឺជាការព្យាយាមកែប្រែខ្លួនឯង ប៉ុន្តែឥឡូវនេះវាទទួលបានលទ្ធផលល្អហើយ។ ខ្ញុំតែងតែនិយាយថា ‘អ្នកគួរធ្វើអ្វីដែលអ្នកអាចធ្វើបាន’។ រក្សាភាពរឹងមាំ ដើម្បីគោលដៅ និងចេះបត់បែន ក្នុងការទទួលបានលទ្ធផល”។

គួរបញ្ជាក់ថា អ្នកស្រី Enslow មានអ្នកតាមដាននៅក្នុងបណ្តាញសង្គមដល់ទៅរាប់សែននាក់ឯណោះ ហើយមានអ្នកគាំទ្រជាច្រើនបានចាត់ទុកអ្នកស្រីជាអ្នកបំផុសគំនិត ក្នុងការថែរក្សារូបរាងកាយថែមទៀតផង។

អ្នកស្រីបានផ្តល់ដំបូន្មាននៅក្នុងគណនីរបស់អ្នកស្រីថា៖

“ខ្ញុំបានកត់សម្គាល់ឃើញភាពខុសគ្នាយ៉ាងខ្លាំង អំពីការគ្រប់គ្រងចំណង់អាហារ ការស្រកទម្ងន់ និងថាមពលរាងកាយ បើប្រៀបធៀបជាមួយឆ្នាំមុន នៅពេលដែលខ្ញុំព្យាយាមកាត់បន្ថយការហាត់ប្រាណ និងការស្រកទម្ងន់អស់យ៉ាងច្រើននោះ”។

អ្នកស្រីបាននិយាយជាចុងក្រោយថា៖

“អ្នកត្រូវព្យាយាមធ្វើវាឲ្យបាន ហើយបើសិនជាអ្នកដួល អ្នកត្រូវក្រោកឈរឲ្យបានលឿនបំផុត តាមដែលអាចធ្វើបាន”៕

• ជំរុញទឹកចិត្ត
• រូបភាព