សាកលវិទ្យាល័យ លីមកុកវីង ប្រារព្ធពិធីប្រគល់សញ្ញាបត្រ ដល់និស្សិតចំនួន១៥៦នាក់ ក្រោមអធិបតីភាពរបស់ឯកឧត្តម យក់ ង៉ុយ!

ភ្នំពេញ៖ កាលពីព្រឹកថ្ងៃសុក្រ ទី២២ ខែធ្នូ ឆ្នាំ២០១៧ នៅឯសណ្ឋាគារ ហ្គាឌិន ស៊ីធី (Garden City Hotel) សាកលវិទ្យាល័យ លីមកុកវីង (Limkokwing University of Creative Technology) បានប្រារព្ធពិធីប្រគល់សញ្ញាបត្រដែលមានចំណងជើងថា “Design Your Future” ជូនដល់និសិ្សតរបស់ខ្លួនចំនួន១៥៦នាក់ ដែលបានបញ្ចប់ការសិក្សាទៅដោយជោគជ័យមកពី៤មហាវិទ្យាល័យ គឺ មហាវិទ្យាល័យគ្រប់គ្រងពាណិជ្ជកម្ម, មហាវិទ្យាល័យឌីហ្សាញ, មហាវិទ្យាល័យវិទ្យាសាស្ត្រ គណិតវិទ្យា និងវិស្វកម្ម និងមហាវិទ្យាល័យស្ថាបត្យកម្ម និងរចនា ក្រោមអធិបតីភាពរបស់ឯកឧត្តម យក់ ង៉ុយ រដ្ឋលេខាធិការក្រសួងអប់រំ យុវជន និងកីឡា ព្រមជាមួយនឹងការអញ្ចើញចូលរួមដោយ Dato’ Tiffanee Marie Lim, ដែលជាអនុប្រធាន នៅសាកលវិទ្យាល័យ លីមកុកវីង ទូទាំងពិភពលោក។

ក្រោមសម្រែក និងសម្លេងហ៊ោកញ្រ្ជៀវពីសំណាក់សាមីខ្លួន និងអាណាព្យាបាល រួមជាមួយសាច់ញាតិបងប្អូនរបស់និស្សិតទាំងអស់ ដែលបានផ្តល់កិត្តិយសចូលរួមអបអរសាទរ ភាពជោគជ័យក្នុងជំហានដំបូងនេះ យើងសង្កេតឃើញថា ក្នុងកម្មវិធីប្រគល់សញ្ញាបត្រទាំងមូលគឺពោរពេញទៅដោយភាពសប្បាយរីករាយ និងមានអត្ថន័យគួរឲ្យចងចាំបំផុត។

ក្នុងនោះ ឯកឧត្តមដែលជាថ្នាក់ដឹកនាំនៃសាកលវិទ្យាល័យ លីមកុកវីង (Limkokwing University of Creative Technogy) បានមានប្រសាសន៍យ៉ាងក្បោះក្បាយថា៖ “ពីមួយឆ្នាំទៅមួយឆ្នាំគុណភាពនៃការអប់រំទាំងផ្នែកឧត្តមសិក្សាឯកជន និងរដ្ឋ គឺកាន់តែរីកចម្រើនទៅមុខ ពីព្រោះគ្រឹះស្ថានឧត្តមសិក្សាទាំងអស់ រួមទាំងក្រសួងអប់រំយុវជន និងកីឡាកម្ពុជាបានសហការណ៍ និងខិតខំយ៉ាងខ្លាំង ធ្វើយ៉ាងណាដើម្បីពង្រឹងវិសាលភាពវិស័យអប់រំឲ្យមានគុណភាពពេញលេញ ពោលគឺ និស្សិតទាំងអស់ដែលបានបញ្ចប់ការសិក្សាហើយនោះ អាចមានទាំងចំណេះវិជ្ជាគ្រប់គ្រាន់ ព្រមជាមួយចរិយាសម្បត្តិ និងសីលធម៌ក្នុងការរស់នៅល្អផងដែរ។

បន្ថែមពីនេះទៅទៀត ឯកឧត្តមក៏បានថ្លែងនូវសេចក្តីសោមនស្សរីករាយជាពន់ពេកចំពោះនិស្សិតទាំងអស់ ដែលក្នុងនោះក៏មាននិស្សិតចំនួន១៧នាក់ ទទួលបណ្ណសរសើរ ជានិស្សិតឆ្នើមខាងផ្នែក Tan Sri Dato' Sri Paduka Limkokwing Award for Academic Excellence, Creativity and Innovation, and Leadership ដែលបានពុះពារ និងខិតខំប្រឹងប្រែងកន្លងមករហូតទទួលបានជោគជ័យនៅក្នុងថ្ងៃនេះ។ ហើយលោកជឿជាក់យ៉ាងមុតមាំថា ក្រោយទទួលបានបទពិសោធន៍ពីសាកលវិទ្យាល័យ ដែលទទួលស្គាល់ជាសាកលនេះហើយនោះ ពួកគេកាន់តែងាយស្រួលក្នុងការឈរលើវិថីឆ្ពោះទៅកាន់បំណងប្រាថ្នាដែលខ្លួនចង់បាន។

គួរឲ្យដឹងផងដែរថា សាកលវិទ្យាល័យ លីមកុកវីង គឺជាសាកលវិទ្យាល័យអន្តរជាតិតែមួយគត់ បានបង្កើតឡើងនៅឆ្នាំ ១៩៩១ ដែលមាននិស្សិតមកពី ១៥០ នៃ ១៤សាខា នៅជុំវិញពិភពលោក។ ជារៀងរាល់ឆ្នាំសាកលវិទ្យាល័យ លីមកុកវីង តែងតែបង្កើតធនធានមនុស្ស ដែលជាសក្តានុពលក្នុងការអភិវឌ្ឍន៍ប្រទេសជាតិឲ្យរីកចម្រើន។ គ្រប់និស្សិតដែលបញ្ចប់ការសិក្សាតែងតែទទួលបានចំណេះដឹង និងជំនាញ ដែលសមស្របជាមួយនឺងទីផ្សារនៅក្នុងប្រទេស និងក្រៅប្រទេស។ ក្នុងនោះសាកលវិទ្យាល័យ លីមកុកវីង គឺមានកម្មវិធីសិក្សាទាំងខាងផ្នែក បរិញ្ញាបត្ររង បរិញ្ញាបត្រ រួមទាំងអនុបណ្ឌិតថែមទៀតផង៕ 

• សាលា