ខេត្តកំពង់ស្ពឺ ៖ កូនតិរច្ឆានម្នាក់ត្រូវបានឪពុករបស់ខ្លួនប្តឹងទៅសមត្ថកិច្ចឲ្យឃាត់ខ្លួន បន្ទាប់ពីកូនរូបនេះប្រើអំពើហិង្សា និងប្រុងវាយសម្លាប់ឪពុកដោយខ្នងពូថៅ ព្រោះតែខឹងនឹងឪពុកស្តីប្រដៅកុំឲ្យឈ្លោះជាមួយអ្នកភូមិ ។ កូនតិរច្ឆានរូបនេះ ត្រូវបានឪពុកស្នើឲ្យសមត្ថកិចចាត់វិធានការតាមផ្លូវច្បាប់ ព្រោះគាត់មិនអាចទ្រាំនឹងទង្វើរបស់កូនរូបនេះបានតទៅទៀតឡើយ ។
ករណីគំរាមសម្លាប់ឪពុកពីសំណាក់កូនរបស់ខ្លួននេះ កើតឡើងកាលពីម៉ោង០៨និង០០នាទីយប់ ថ្ងៃទី១៥ ខែធ្នូ ឆ្នាំ២០១៧ នៅភូមិក្រាំងលាវ ឃុំសំបូរ ស្រុកសំរោងទង ខេត្តកំពង់ស្ពឺ ។ ជនសង្ស័យឈ្មោះ សួន ឆលីហៀង ភេទប្រុស អាយុ២៦ឆ្នាំ រស់នៅភូមិក្រាំងលាវ ឃុំសំបូរ ស្រុកសំរោងទង ខេត្តកំពង់ស្ពឺ ឪពុករបស់ខ្លួនឈ្មោះ សួន សេង អាយុ៦៤ឆ្នាំ រស់នៅផ្ទះជាមួយគ្នា នៅភូមិកើតហេតុខាងលើ ។
ប្រភពពីសមត្ថកិច្ចបានឲ្យដឹងថា ជនសង្ស័យត្រូវបានកម្លាំងព្រហ្មទណ្ឌស្រុក សហការជាមួយកម្លាំងប៉ុស្ដិ៍សំបូរ បានឃាត់បន្ទាប់ពីទទួលបណ្តឹងរបស់បុរសជាឪពុករួចមក ។ ឪពុករបស់ជនសង្ស័យបានប្តឹងកូនរបស់ខ្លួនថាគំរាមសម្លាប់រូបគាត់ដោយបានយកពូថៅប្រុងកាប់រូបគាត់ ក្រោយពីគាត់ស្តីបន្ទោសរួចមក ។
បុរសជាឪពុកបន្តថា មុនពេលកើតហេតុ គឺជនសង្ស័យជាកូនបានផឹកស៊ីជាមួយមិត្តភក្តិរហូតស្រវឹងក៏កើតជម្លោះជាមួយអ្នកភូមិម្នាក់ ពេលនោះគាត់ជាឪពុកបានទៅឃាត់ ហើយនាំគេមកផ្ទះវិញ ។ ពេលមកដល់ផ្ទះគាត់បានស្តីបន្ទោសថា «ពេញវ័យហើយ គួរណាស់តែខិតខំជួយធ្វើការឪពុកម្តាយ ដែលចាស់ជរាប្រសើរជាងនាំគ្នាទៅផឹកស្រាអត់អំពើ» ។
ប្រភពបន្តថា គ្រាន់តែឪពុកនិយាយចប់ កូនតិរច្ឆានរូបនេះបានស្ទុះមកវាយតប់លើគាត់ជាឪពុករហូតរបួសដាច់ក្បាលជង្គង់ ហើយក៏ស្ទុះទៅយកពូថៅមកគំរាមសម្លាប់គាត់ទៀត ទើបគាត់ដាក់ពាក្យបណ្ដឹងឲ្យសមត្ថកិច្ចឃាត់ខ្លួនតែម្តងទៅ ។
ក្រោយសមត្ថកិច្ចឃាត់ខ្លួនជនសង្ស័យ បានឆ្លើយសារភាពថា ខ្លួនពិតជាបានប្រើអំពើហិង្សាទៅលើឪពុកពិតប្រាកដមែន តែនេះបណ្ដាលមកពីរូបគេស្រវឹងស្រា ទើបធ្វើបែបនេះ ។
បច្ចុប្បន្ន ជនសង្ស័យដែលយកពូថៅគំរាមសម្លាប់ឪពុករបស់ខ្លួននេះ សមត្ថកិច្ចកំពុងកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តកំពង់ស្ពឺ តាមពាក្យបណ្ដឹងរបស់បុរសជាឪពុក ដោយស្នើសុំឲ្យស្ថាប័នមានសមត្ថកិច្ចចាត់ការតាមច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
