ខេត្តកំពត ៖ បន្ទាប់ពីទទួលបានព័ត៌មានថាមានជនបរទេសម្នាក់ និងស្ត្រីខ្មែរជាដៃគូម្នាក់ បានសម្ងំលាក់ខ្លួនធ្វើសកម្មភាពជួញដូរ និងប្រើប្រាស់ថ្នាំញៀននៅក្នុងផ្ទះជួលមួយកន្លែង ក្នុងភូមិសាស្ត្រភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ។
លោកឧត្តមសេនីយទោ ម៉ៅ ច័ន្ទមធុរិទ្ធ ស្នងការខេត្ត ដោយមានការសហការ និងសម្របសម្រួលនីតិវិធីពីលោក ឯក ឆេងហ៊ួត ព្រះរាជអាជ្ញាអមសាលាដំបូងខេត្ត បានបញ្ជាកម្លាំងសមត្ថកិច្ចចម្រុះមានកងអន្តរាគមន៍ពិសេសឈុតខ្មៅស្នងការខេត្ត នគរបាលអន្តោប្រវេសន៍ ការិយាល័យប្រឆាំងបទល្មើសគ្រឿងញៀនស្នងការខេត្ត និងកម្លាំងនគរបាលក្រុង សង្កាត់ផងដែរ ដែលដឹកនាំបញ្ជាដោយ លោកវរសេនីយ៍ទោ លក ញ៉ាវ ប្រធានការិយាល័យព្រហ្មទណ្ឌកំរឹតស្រាល នៃស្នងការដ្ឋាននគរបាលខេត្ត បានចុះឆែកឆេរនៅចំណុចផ្ទះជួលនោះ ។ ករណីចុះប្រតិបត្តិការនេះបានធ្វើឡើងកាលពីរសៀលថ្ងៃទី១៥ ខែធ្នូ ឆ្នាំ២០១៧ នៅត្រង់ចំណុចភូមិសាស្ត្រខាងលើ ។
លោកវរសេនីយ៍ទោ លក ញ៉ាវ បានថ្លែងប្រាប់អ្នកយកព័ត៌មានថា ក្នុងករណីចុះបង្ក្រាបសម្បុកជួញដូរ និងប្រើប្រាស់គ្រឿងញៀននាពេលនេះ គឺប្រើកម្លាំងសរុបដើម្បីសហការគ្នាបានល្អ និងសម្រេចកិច្ចការបានជោគជ័យដែរ ។
លោកបានបន្តទៀតថា ក្នុងករណីចុះបង្ក្រាបនេះដែរ ជាលទ្ធផលក្រោយពេលឆែកឆេរ កម្លាំងសមត្ថកិច្ចបានរកឃើញថ្នាំញៀនជាច្រើន និងសម្ភារសម្រាប់បម្រើសេវាកម្មជួញដូរ និងប្រើប្រាស់មួយចំនួនធំផងដែលដូចជា ថ្នាំគ្រាប់ពណ៌ផ្កាឈូកចំនួន៥ថង់ (ប្រភេទយ៉ាម៉ា) ថ្នាំម្សៅថ្លាក្រាមប្រភេទម៉ាទឹកកកចំនួន៦កញ្ចប់ ក្នុងនោះ៤កញ្ចប់ធំ ជញ្ជីងសម្រាប់ថ្លឹងថ្នាំ១គ្រឿង ឧបករណ៍ជក់ចំនួន ទូរស័ព្ទដៃចំនួន៥គ្រឿង ថ្នាំសម្រើបនារី៩ប្រអប់ លិង្គសិប្បនិម្មិត១ ឡែនថត២គ្រឿង ថង់សម្រាប់វេចខ្ចប់មួយចំនួនធំ ប្រាក់រៀលចំនួន៥០ម៉ឺនរៀល ប្រាក់ដុល្លារចំនួន៣០០ដុលារអាមេរិក ។
លោកបានឲ្យដឹងទៀតថា ជនបរទេសដែលកម្លាំងសមត្ថកិច្ចចម្រុះចាប់ឃាត់ខ្លួនពីបទប្រើប្រាស់ និងជួញដូរគ្រឿងញៀននេះមានឈ្មោះ KNOWLES GARY RO BERT ភេទប្រុស អាយុ៧២ឆ្នាំ ជនជាតិអូស្ត្រាលី កាន់លិខិត្តឆ្លងដែនលេខ PA៦២១៣៨៨៦ ។ ចំណែកស្ត្រីម្នាក់ជាដៃគូមានឈ្មោះ មាស ថារី ភេទស្រី អាយុ២៨ឆ្នាំ ទីលំនៅមិនពិតប្រាកដ និងគ្មានអត្តសញ្ញាណប័ណ្ណសំគាល់ខ្លួនថែមទៀត ។
ក្រោយពីពិនិត្យវត្ថុតាងថ្នាំញៀន និងសម្ភារសម្រាប់បម្រើបទល្មើសរួចមក កម្លាំងសមត្ថកិច្ចចម្រុះបានធ្វើការឃាត់ខ្លួនជនសង្ស័យទាំងពីរនាក់ ហើយនាំមកកាន់ស្នងការនគរបាលខេត្ត ដើម្បីបន្តនីតិវិធីសាកសួរ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]