Zidane អះអាងថា ខ្លួននឹងតាមការពារ Benzema ដល់ថ្ងៃអវសាន ដោយសារតែមូលហេតុទាំងនេះ!

អេស្ប៉ាញ៖ ថ្មីៗនេះទម្រង់លេងរបស់កីឡាករ Karim Benzema ដែលជាខ្សែប្រយុទ្ធជួរមុខក្នុងក្លិបយក្ស Real Madrid បានទទួលរងការរិះគន់យ៉ាងខ្លាំង ពីសំណាក់មហាជននិងអ្នកវិភាគបាល់ទាត់ ដោយសារតែកីឡាកររូបនេះ ហាក់បីដូចជា មិនសូវកាក់កបឡើយ ក្នុងការរកគ្រាប់បាល់។

យ៉ាងណាមិញ មុននេះបន្តិច គ្រូបង្វឹកក្រុម Real Madrid លោក Zinedine Zidane បានបង្ហើបពីមតិរបស់ខ្លួនថា លោកមិនយល់ស្របជាមួយនឹង ការរិះគន់ទៅលើកីឡាករ Benzema ឡើយ។ ព្រោះថាអ្វីដែលធ្វើឲ្យលោក ចាប់អារម្មណ៍លើកីឡាកររូបនេះ មិនមែនផ្តោតទាំងស្រុង ទៅលើការស៊ុតបញ្ចូលទីនោះទេ។

គ្រូបង្វឹកវ័យ៤៥ឆ្នាំរូបនេះ បានបន្តទៀតថា Karim Benzema គឺជាកីឡាករដែលប្លែកខុសពីអ្នកដទៃ បើទោះបីជាគេមិនអាចស៊ុតបញ្ចូលទី ៥០គ្រាប់ក្នុងមួយរដូវកាលក៏ពិតមែន ប៉ុន្តែគេមានគុណសម្បត្តិផ្សេងៗ ជាច្រើនទៀតសម្រាប់ក្រុមផងដែរ។

គ្រូបង្វឹកក្លិប Real Madrid រូបនេះ បន្ថែមទៀតថា «ខ្ញុំចូលចិត្តនឹងអ្វីដែល Karim បានធ្វើសម្រាប់ក្រុម ហើយគាត់គឺជាកីឡាករម្នាក់ ក្នុងចំណោមកីឡាករល្អបំផុតផងដែរ។ ដូច្នេះហើយខ្ញុំនឹងតាមការពារកីឡាករ Benzema រហូតដល់ថ្ងៃអវសាន» ៕