រាជធានីភ្នំពេញ ៖ ប្តីប្រពន្ធមួយគូបានជិះម៉ូតូមកឈប់អែបចិញ្ចើមផ្លូវ ក៏ស្រាប់តែមានបុរសម្នាក់ស្រវឹងស្រាទោរទន់បានបើករថយន្តបង្កម៉ាកឡិចស៊ីស RX៣០០ ជ្រុលទៅបុកពីក្រោយពេញទំហឹងរុញផ្ទប់នឹងបង្គោលភ្លើងពេញទំហឹង បណ្ដាលឲ្យមានអ្នករងរបួសធ្ងន់ម្នាក់ និងស្រាលម្នាក់ ហេតុការណ៍នេះបានកើតឡើងនៅវេលាម៉ោង១១និង៤០នាទីយប់ ថ្ងៃទី១២ ខែធ្នូ ឆ្នាំ២០១៧ ជិតនឹងស្ថានីយបូមទឹកបឹងទំពុន ផ្លូវ៣៧១ ភូមិត្នោតជ្រុំ៣ សង្កាត់បឹងទំពុន២ ខណ្ឌមានជ័យ ។
តាមប្រភពព័ត៌មានពីកន្លែងកើតបានឲ្យដឹងថា មុនពេលកើតហេតុ គេបានឃើញប្តីប្រពន្ធ២នាក់បានជិះម៉ូតូម៉ាកហុងដា Airblade ពណ៌ខ្មៅ ពាក់ស្លាកលេខ ភ្នំពេញ ១FJ-៣៨១៤ បានជិះមកឈប់អែបចិញ្ចើមផ្លូវក្នុងទិសដៅពីកើតទៅលិច ខណៈពេលនោះក៏ស្រាប់តែបុរសម្នាក់អាយុ២៥ឆ្នាំ មិនដឹងថាចេញពីផឹកស៊ីវិញនៅម្តុំណានោះទេ បានរថយន្តបង្កម៉ាកឡិចស៊ីស RX៣០០ ពណ៌ស ពាក់ស្លាកលេខ ភ្នំពេញ ២AD-១០០២ ធ្វើដំណើរតាមផ្លូវ៣៧១ ក្នុងទិសដៅស្របគ្នា បានរេចង្កូតជ្រុលទៅបុកម៉ូតូដែលឈប់លើចិញ្ចើមផ្លូវចំពីក្រោយទាំងកំរោលរុញផ្ទប់ទៅបុកនឹងបង្គោលភ្លើងបេតុងពេញទំហឹង បណ្ដាលឲ្យស្ត្រីជាប្រពន្ធព្រមទាំងមានផ្ទៃពោះផងនោះ រងរបួសឆ្អឹងខ្នងធ្ងន់ ចំណែកបុរសជាប្តីរងរបួសស្រាល ភ្លាមនោះដែរ ជនរងគ្រោះទាំងពីរត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លីនិកឯកជន ចំណែកម៉ូតូរងការខូចខាតខ្ទេចខ្ទីស្ទើរតែទាំងស្រុង ។
ដោយឡែករថយន្តបង្កវិញរងការខូចខាតក្រពិតស្រុញផ្នែកខាងមុខចំហៀងខាងស្តាំ ចំណែកអ្នកបើកបររថយន្តត្រូវបានសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលបឹងទំពន់២ ។
ក្រោយពេលកើតហេតុ រថយន្ត និងម៉ូតូព្រមទាំងអ្នកបើកបរ ត្រូវបានសមត្ថកិច្ច មកធ្វើការវាស់វែងយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]