ខឹងខុសខឹងខាត! ប្រពន្ធចិត្តក្តៅ ទាត់គិលានុបដ្ឋាយិកាកំពុងមានផ្ទៃពោះ ​បណ្តាលឲ្យប្តីជាមន្ត្រីធំផង ត្រូវគេដកតំណែងចោល (មានវីដេអូ)

ចិន៖ មន្ត្រីជនជាតិចិនមួយរូប ត្រូវបានគេបញ្ឈប់ពីការងារ បន្ទាប់ពីប្រពន្ធរបស់មន្ត្រីរូបនោះ បានទាត់គិលានុបដ្ឋាយិការដែលកំពុងពរពោះ៦សប្តាហ៍ ចំត្រង់ពោះ។

តាមរយៈសារព័ត៌មាន Chutian Metropolis Daily បានឲ្យដឹងថា ឧប្បត្តិហេតុនេះ បានកើតឡើងកាលពីថ្ងៃទី ០៨ ធ្នូ ២០១៧កន្លងទៅនេះ នៅឯមន្ទីរពេទ្យមួយកន្លែង នាទីក្រុង Tongshan ខេត្ត Hubei ប្រទេសចិន។

គិលានុបដ្ឋាយិការងគ្រោះមួយរូបដែលមានឈ្មោះថា Zhu បានព្យាយាមចាក់ថ្នាំឲ្យក្មេងប្រុសអាយុ៤ឆ្នាំម្នាក់ ដែលជាកូនរបស់ប្តីប្រពន្ធមួយគូ។ រឿងហេតុក្តៅគគុកបានកើតឡើងនៅពេលដែលនាងបានប្រាប់ក្មេងប្រុសនោះឲ្យឈប់កម្រើក ដើម្បីឲ្យនាងអាចចាក់ថ្នាំឲ្យគេបានដោយសុវត្ថិភាព។

នៅពេលដែលនាងចាក់ថ្នាំ ក្មេងប្រុសនោះស្រាប់តែស្រែកយំយ៉ាងខ្លាំង រហូតធ្វើឲ្យម្តាយរបស់គេ​ខឹងនឹងគិលានុបដ្ឋាយិកានោះ។ មិនបង្អង់យូរ ស្ត្រីជាម្តាយក្មេងប្រុសនោះ ក៏បានរុញ និងទាត់គិលានុបដ្ឋាយិកាដែលកំពុងពរពោះ៦សប្តាហ៍ចំត្រង់ពោះតែម្តង។

តាមរយៈវីដេអូបានបង្ហាញថា ស្ត្រីជាម្តាយរូបនោះ បានចាប់បោចសក់គិលានុបដ្ឋាយិកា ខណៈដែលមិត្តរូមការងារផ្សេងៗទៀតព្យាយាមបំបែកអ្នកទាំងពីរចេញពីគ្នា។ គេក៏បានឃើញគិលានុបដ្ឋាយិកានោះ អង្គុយចុះទៅនឹងដី ស្រែកយំផងដែរ។

បន្ទាប់ពីកើតហេតុ នារីរងគ្រោះត្រកូល Zhu បានហូរឈាមយ៉ាងខ្លាំង ហើយនាងត្រូវបានគេបញ្ជូនទៅកាន់ផ្នែកសម្ភព និងរោគស្ត្រី  ព្រោះនាងអាចប្រឈមនឹងការរលូតកូន។

បន្ទាប់ពីមានហេតុការណ៍បែបនេះកើតឡើង លោក Xu Lianglu ដែលត្រូវជាស្វាមីរបស់ស្ត្រីបង្កហេតុ ត្រូវបានគេបណ្តេញចេញពីការងារ បើទោះបីជាលោក មិនបានលូកដៃនៅក្នុងហេតុការណ៍នេះក៏ដោយ។

គួរបញ្ជាក់ថា ស្វាមីរបស់ស្ត្រីជាម្តាយ មានមុខតំណែងជាមន្ត្រីគ្រប់គ្រងទីក្រុង។ ស្របពេលដែលអត្តសញ្ញាណរបស់ជនបង្កហេតុ មិនទាន់ត្រូវបានគេបង្ហាញនោះទេ និងការស៊ើបអង្កេតនៅតែបន្តធ្វើនៅឡើយ៕

សូមទស្សនាវីដេអូខាងក្រោម៖

• គ្រួសារ
• វីដេអូ
• ផ្ទៃពោះ