រាជធានីភ្នំពេញ ៖ បុរសម្នាក់ត្រូវបានសមត្ថកិច្ចប៉ុស្តិ៍រដ្ឋបាលនគរបាលស្ទឹងមានជ័យទី៣ ចាប់ឃាត់ខ្លួនតាមបណ្តឹងរបស់ប្រជាពលរដ្ឋទាក់ទិននឹងការប្រើអំពើហិង្សាប៉ុនប៉ងសម្លាប់អ្នកដទៃ និងប្រពន្ធកូនខ្លួនឯងកាលពីវេលាម៉ោង៩និង៣០នាទីយប់ថ្ងៃទី០៩ ខែធ្នូ ឆ្នាំ២០១៧ នៅចំណុចផ្ទះជួល ភូមិឬស្សី សង្កាត់ស្ទឹងមានជ័យ៣ ខណ្ឌមានជ័យ ។
បុរសជាប់ចោទឈ្មោះចាន់ ធឿន អាយុ៣៤ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិឬស្សី១ សង្កាត់ស្ទឹងមានជ័យ៣ ខណ្ឌមានជ័យ ។ ដោយឡែកម្ចាស់បណ្តឹងដែលប្តឹងសមត្ថកិច្ចឃាត់ខ្លួនឈ្មោះសោម សាវឿន ភេទប្រុស អាយុ២៩ឆ្នាំ ទីលំនៅសង្កាត់ស្ទឹងមានជ័យ២ ខណ្ឌមានជ័យ ។
ជនរងគ្រោះ និងសាក្សីជាច្រើនបានឃើញហេតុការណ៍ឲ្យដឹងថា នៅវេលាខាងលើជនរងគ្រោះ និងប្រពន្ធកំពុងអង្គុយទទួលទានអាហារល្ងាចជាមួយប្រពន្ធ នៅខាងមុខផ្ទះរបស់ខ្លួន ខណៈនោះ ស្រាប់តែឈ្មោះចាន់ ធឿន បានយកកាំបិតប៉័ងតោមក ប៉ុនប៉ងកាប់ជនរងគ្រោះ តែត្រូវជនរងគ្រោះដឹងខ្លួនមុនក៏រត់គេចចូលទៅក្នុងផ្ទះ ហើយទូរស័ព្ទប្រាប់សមត្ថកិច្ចមកធ្វើការឃាត់ខ្លួនភ្លាមៗ ។
ប្រជាពលរដ្ឋរស់នៅក្បែរតំបន់កើតហេតុឲ្យដឹងថា ឈ្មោះចាន់ ធឿន ជាមនុស្សពាលាអាវាសែ ពេលផឹកស្រាស្រវឹងតែងតែបង្កការអុកឡុកផ្អើលស្រុកផ្អើលភូមិ ជាពិសេសបានប្រើប្រាស់ហិង្សាលើប្រពន្ធកូនញឹកញ៉ាប់ ។
តាមការរៀបរាប់របស់ជនរងគ្រោះ គឺរូបគេពុំដែលធ្លាប់មានទំនាស់អ្វីជាមួយឈ្មោះចាន់ ធឿន ឡើយ ។សូមបញ្ជាក់ថា នៅក្នុងពាក្យបណ្តឹងជនរងគ្រោះបានប្តឹងឈ្មោះចាន់ ធឿន ពីបទប៉ុនប៉ងមនុស្សឃាតដោយចេតនា ។ បច្ចុប្បន្នជនសង្ស័យកំពុងឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលស្ទឹងមានជ័យ រង់ចាំកសាងសំណុំរឿងបញ្ចូនទៅតុលាការចាត់ការតាមនីតិវិធីច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
