ខេត្តក្រចេះ ៖ បុរសម្នាក់តូចចិត្តនឹងក្រុមគ្រួសារដែលឈានដល់ការលែងលះប្រពន្ធ-កូន បានសម្រេចចិត្តចាក់សាំងដុតខ្លួនឯងតែម្តង រហូតឆេះខ្លោចរោលខ្មៅ តាំងពីក្បាលរហូតដល់ចុងជើងរបួសធ្ងន់ធ្ងរ ។ ឧប្បត្តិហេតុនេះកើតឡើងកាលពីវេលាម៉ោង១១ថ្ងៃត្រង់ ថ្ងៃទី១៦ វិច្ឆិកា នៅក្នុងការដ្ឋានសំណង់មួយដែលទើបនឹងចាប់ផ្តើមសាងសង់នៅខេត្តក្រចេះ ។
បុរសដុតខ្លួនឯងធ្វើអត្ដឃាតនោះមានឈ្មោះអ៊ិន កម្សាន្ដ អាយុ២៦ឆ្នាំ ស្រុកកំណើតនៅភូមិស្រះស្រង់ ឃុំសែនដី ស្រុកសំរោងទង ខេត្ដកំពង់ស្ពឺ មានប្រពន្ធឈ្មោះគង់ គា អាយុ២៥ឆ្នាំ ព្រមទាំងមានកូនស្រីម្នាក់អាយុ៥ឆ្នាំ បានលែងលះគ្នាជិត៥ឆ្នាំមកហើយដែរ ។
តាមការឱ្យដឹងពីឈ្មោះចាន់ រ៉ន ភេទប្រុស អាយុ៣០ឆ្នាំ មុខរបរជាងសំណង់ ត្រូវជាបងជីដូនមួយបុរសរងគ្រោះប្រាប់ថា បុរសរូបនេះទើបតែមកធ្វើការជាមួយគាត់បាន៣ថ្ងៃប៉ុណ្ណោះ នៅក្នុងការដ្ឋានមួយដែលទើបនឹងចាប់ផ្ដើមសាង សង់នៅខេត្ដក្រចេះក្នុងតំបន់ព្រៃ។ នៅថ្ងៃកើតហេតុពេលចេញពីធ្វើការនៅម៉ោង១១ថ្ងៃត្រង់ មិនឃើញជនរងគ្រោះទៅហូបបាយ គាត់ក៏ដើររកស្រាប់តែឃើញដើរចេញពីក្នុងព្រៃ ដៃម្ខាងកាន់ដបសាំង ដៃម្ខាងទៀតកាន់ដែកកេះ ។ ភ្លាមនោះជនរងគ្រោះក៏ស្រែកផ្ដាំថា «បងអើយជួយមើលថែប្រពន្ធកូនខ្ញុំផង ខ្ញុំលាហើយ»គ្រាន់តែថាមិនទាន់រួចពីមាត់ផង ក៏កេះដែកកេះដុតខ្លួនឆេះសន្ធោសន្ធៅតែម្ដង ធ្វើឱ្យផ្អើលដល់កម្មករសំណង់ខ្លះរត់ទៅកាច់មែកឈើយកមកវាយពន្លត់ភ្លើង ខ្លះចាប់ជនរងគ្រោះចាប់ននៀលដី ទម្រាំតែភ្លើងរលត់ ឆេះខ្លោចខ្មៅអស់ទៅហើយ។ បន្ទាប់មកបញ្ជូនក៏ទៅព្យាបាលនៅមន្ទីរពេទ្យខេត្ដក្រចេះ តែមន្ទីរពេទ្យពុំមានសម្ភារគ្រប់គ្រាន់ក៏បញ្ជូនបន្ដទៅព្យាបាលនៅមន្ទីរពេទ្យព្រះកុសុមៈ ។
គួររំលឹកផងដែរថា នេះជាករណីទីពីរហើយ ដោយកាលពីប៉ុន្មានខែមុននេះ ក៏មានបុរសម្នាក់ខឹងប្រពន្ធលែងលះសុំត្រូវរ៉ូវគ្នាវិញ ប្រពន្ធមិនព្រម បានចាក់សាំងដុតខ្លួនឯងនៅកណ្តាលថ្នល់ក្នុងសង្កាត់បឹងសាឡាង ខណ្ឌទួលគោក ហើយដឹកយកទៅសង្គ្រោះនៅមន្ទីរពេទ្យព្រះកុសុមៈបាន២ថ្ងៃក៏ស្លាប់បាត់បង់ជីវិតទៅ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]