អ្នកធ្លាប់បានដឹងរួចមកហើយថា ខ្ញីមានសារសំខាន់ខ្លាំងណាស់ សម្រាប់ការទទួលទានជំនួយសុខភាព និងជាគ្រឿងថែរក្សាសម្រស់ ដោយវិធីច្រើនបែបច្រើនសណ្ឋានខុសប្លែកគ្នា។
ជាការពិតណាស់ ក្រៅពីយកខ្ញីកែសុខភាព និងសម្រស់ដោយការយកធ្វើជាគ្រឿងទទួលទានហើយ គេក៏អាចយកខ្ញីមកផលិត ជាប្រេងរក្សាសុខភាពបានផងដែរ។ ចំណែកអត្ថប្រយោជន៍វិញ ក៏មានច្រើនស្ទើរតែរាប់មិនអស់ សម្រាប់សុខភាពរាងកាយដូចជា៖ ប្រើជាប្រេងលាបបំបាត់ការឈឺចុកចាប់រាងកាយ និងសាច់ដុំផ្សេងៗ។ ហើយប្រសិនជាអ្នកយកប្រេងខ្ញី មកលាយនៅក្នុងម្ហូបអាហារផងនោះ អាចជួយដល់ប្រព័ន្ធរំលាយអាហារ ព្យាបាលនិងការពារជំងឺរាគរូស បំបាត់អាការឈឺចុកចាប់ពោះ ក្រពះដែលពិបាកធ្វើការរំលាយអាហារ បំបាត់អាការក្អួតចង្អោរ និងអាការវិលមុខ ធីងធោងជាដើម។
ចំណែកវិធីប្រើប្រាស់ប្រេងខ្ញី គឺមានច្រើនយ៉ាងផ្សេងៗខុសពីគ្នាដូចខាងក្រោម៖
# ការប្រើប្រាស់ប្រេងខ្ញីសម្រាប់សុខភាពផ្នែកខាងក្រៅ (ជាប្រេងរឹតលើស្បែក)
- យកប្រេងខ្ញី ២ ទៅ៣ដំណក់យកមកហិត នឹងជួយធ្វើឱ្យរាងកាយរបស់អ្នកមានកម្លាំងកំហែង បន្ធូរបន្ថយការនឿយហត់ពីភាពកម្លាំងទាំងផ្លូវកាយ និងផ្លូវចិត្ត(អារម្មណ៍)
- បន្តក់ប្រេងខ្ញី លាបលើបរិវេណពោះ ដើម្បីសម្រាលការឈឺចាប់ និងតឹងពោះដោយសារចំណីអាហារ និងជាតិហ្គាសក្នុងក្រពះ។ លើសពីនេះទៅទៀត ថែមទាំងអាចព្យាបាលអាការរាគរូសបានផងដែរ។
- អ្នកអាចដាក់ប្រេងខ្ញីចូលទៅក្នុងអាងត្រាំទឹក ឬក៏អាចដាក់ប្រេងខ្ញី លើដុំក្រណាត់ ឬបង់បិទរបួស បិទនៅលើរាងកាយកន្លែង ដែលអ្នកកំពុងតែមានការឈឺចុកចាប់បានផងដែរ
- អ្នកអាចហិត ឬស្រូបក្លិនពីប្រេងខ្ញី ដើម្បីសម្រួលអាការតឹងច្រមុះ ផ្តាសាយ ហៀរសម្បោរ និងឈឺបំពង់-ក
- អ្នកគ្រាន់តែលាយប្រេងខ្ញី ២ ទៅ ៣ ដំណក់ ទៅក្នុងប្រេងសម្រាប់ម៉ាស្សាដងខ្លួន ២ស្លាបព្រាបាយ (ប្រភេទអ្វីក៏បាន) ។ បន្ទាប់មក យកប្រេងនោះមកធ្វើការម៉ាស្សាលើរាងកាយដែលកំពុងតែមានការឈឺចុកចាប់ដូចជា ឈឺត្រង់សាច់ដុំ ឈឺសន្លាក់ ឈឺឆ្អឹង ឈឺខ្នង ថែមទាំងអាចអាចបង្កើនសមត្ថភាពផ្លូវភេទ និងធ្វើឱ្យប្រព័ន្ធចលនាលំហូរឈាមរត់ស្រួលសព្វរាងកាយផងដែរ។
# ការប្រើប្រាស់ប្រេងខ្ញីសម្រាប់ទទួលទានជំនួយសុខភាពផ្នែកខាងក្នុង
ការទទួលទានប្រេងខ្ញីជាប្រចាំ ក៏អាចជួយដល់សុខភាពរាងកាយផ្នែកខាងក្នុងផងដែរដូចជា៖ ប្រឆាំងនិងព្យាបាលរលាកក្នុងរាងកាយ ជាថ្នាំប្រឆាំងនឹងមេរោគបាក់តេរី ថ្នាំបំបាត់ការឈឺចុកចាប់ ជំនួយប្រព័ន្ធរំលាយអាហារឱ្យដំណើរការបានល្អ និងអាចការពារព្យាបាលជំងឺផ្សេងៗបានជាច្រើនមុខផងដែរដូចជា៖
- សម្រាប់ជំងឺរ៉ាំរ៉ៃផ្សេងៗ៖ ការទទួលទានខ្ញី ឬប្រេងខ្ញីមួយថ្ងៃ ២ ទៅ៤ក្រាមក្នុងមួយថ្ងៃ អាចជួយប្រឆាំង និងព្យាបាលជំងឺរ៉ាំរ៉ៃជាច្រើនមុខ។
- ការពុលចំណីអាហារ៖ ដោយសារតែខ្ញីមានសារធាតុប្រឆាំងនឹងមេរោគផងដែរនោះ ការទទួលទានប្រេងខ្ញីថែមទាំងអាចបំបាត់អាការក្អួតចង្អោរ និងពុលចំណីអាហារផ្សេងៗ។ ជាពិសេសនោះថែមទាំងអាចព្យាបាល និងសម្លាប់មេរោគបាក់តេរីរោគមួលដែលមាននៅក្នុងក្រពះពោះវៀនផងដែរ។
- ជំងឺបេះដូង៖ ការប្រើប្រាស់ខ្ញី និងប្រេងខ្ញី ជាទៀងទាត់អាចកាត់បន្ថយហានិភ័យនៃជំងឺសសៃអាក់ទែបេះដូង ជំងឺទាក់ទងនឹងកំណកឈាម ថែមទាំងអាចកាត់បន្ថយកម្រិតជាតិខ្លាញ់មិនល្អក្នុងរាងកាយដែលអាចប្រឈមនឹងហានិភ័យនៃជំងឺខ្លាញ់រុំបេះដូង ជំងឺគាំងបេះដូង និងជំងឺដាច់សសៃឈាមខួរក្បាលផងដែរ។ ដូច្នេះទទួលទានខ្ញី និងប្រេងខ្ញីជាប្រចាំអាចជំនួយសុខភាពបេះដូង និងកាត់បន្ថយហានិភ័យនៃជំងឺបេះដូងបានដល់ទៅ ១៣ភាគរយឯណោះ។
- ជំងឺលើសឈាម៖ ការប្រើប្រាស់ប្រេងខ្ញីថែមទាំងអាចធ្វើឱ្យសម្ពាធឈាមដំណើរការល្អ និងកាត់បន្ថយហានិភ័យនៃជំងឺឡើងឈាមដល់ទៅ ៨ភាគរយ។
- ជំងឺគ្រុនចាញ់ និងខាន់លឿង៖ ប្រេងខ្ញីអាចបណ្តេញសារធាតុ Anopheles culicifacies mosquitoes ដែលជាមូលហេតុចម្បងធ្វើឱ្យកើតជំងឺគ្រុនចាញ់ និងខាន់លឿង។
- ជំងឺផ្លូវដង្ហើម៖ ប្រេងខ្ញីអាចព្យាបាលជំងឺទាក់ទងនឹងផ្លូវដង្ហើមផ្សេងៗដូចជា៖ អាការក្អកស្ងួត ឬក្អកស្លេស ជំងឺផ្តាសាយ រលាកទងសួត និងជំងឺហឺត។ ជាពិសេសប្រេងខ្ញីថែមទាំងអាចបំបាត់ស្លេសចេញពីសួត និងបំពង់-កបានផងដែរ ដោយគ្រាន់តែលាយវាជាមួយទឹកតែទទួលទានជាប្រចាំប៉ុណ្ណោះ។
- បំបាត់ការឈឺចុកចាប់៖ ការទទួលទានខ្ញី និងប្រេងខ្ញីអាចការពារ និងព្យាបាលអាការឈឺចុកចាប់ផ្សេងៗនៅក្នុងរាងកាយ។
- បញ្ហាក្រពះ-ពោះវៀន៖ ប្រេងខ្ញីអាចជំនួយដល់ប្រព័ន្ធរំលាយអាហារឱ្យដំណើរការល្អ ថែមទាំងជាឱសថបុរាណដែលមានលទ្ធភាពព្យាបាល អាការក្រពះពិបាករំលាយអាហារ អាការកន្ត្រាក់សាច់ដុំ អាការហើមពោះ និងអាការឈឺក្រពះពោះវៀនផ្សេងៗផងដែរ។ អ្វីដែលសំខាន់នោះ ការទទួលទានប្រេងខ្ញីអាចជួយបង្កើនចំណង់អាហារសម្រាប់អ្នកដែលចង់ឡើងទម្ងន់ទៀតផង។
# វិធីធ្វើប្រេងខ្ញី
គ្រឿងផ្សំ
- ខ្ញីស្រស់មួយពែង
- ប្រេងអូលីវ ១ពែងកន្លះ
- ប្រដាប់ឈូស
ការអនុវត្ត
- ជាដំបូងយកខ្ញីស្រស់ៗទាំងសម្បកមួយពែងទៅហាលថ្ងៃឱ្យស្ងួត ២ ទៅ៣ម៉ោង
- បន្ទាប់មកយកប្រេងអូលីវទៅដាំនៅក្នុងឆ្នាំង
- យកខ្ញីដែលហាលរួច ឈូសជាសសៃល្អិតៗ រួចដាក់ចូលទៅក្នុងប្រេងអូលីវដែលកំពុងតែពុះ ហើយកូរចូលគ្នាឱ្យសព្វ
- ធ្វើការរំងាស់ដោយប្រើភ្លើងតិចៗ រយៈពេល ២ម៉ោងឱ្យចេញជាតិ។
- ក្រោយរយៈពេល២ម៉ោង ប្រេងឡើងពណ៌ក្រហមហើយ បិទភ្លើងទុកឱ្យត្រជាក់ចាំត្រងយកតែទឹក ដាក់នៅក្នុងដបបិទមាត់ជិត
- អ្នកអាចរក្សាប្រេងខ្ញីនេះក្នុងដប ដាក់នៅកន្លែងដែលស្ងួត និងផុតពីកម្តៅថ្ងៃ ទុកប្រើប្រាស់បានដល់ទៅរយៈពេល៦ខែ។
ចំណាំ៖
- សម្រាប់ស្ត្រីមានផ្ទៃពោះ និងកូនក្មេងមិនគួរប្រើប្រាស់ប្រេងខ្ញីនេះទេ ប្រសិនជាមានការចាំបាច់អាចពិភាក្សាជាមួយវេជ្ជបណ្ឌិតជំនាញជាមុនសិន។
- មានមនុស្សមួយចំនួនអាចមានប្រតិកម្មស្បែកជាមួយនឹងប្រេងខ្ញី ដូច្នេះដើម្បីប្រាកដចិត្តនៅក្នុងចិត្ត និងដើម្បីសុវត្ថិភាពក្នុងការប្រើប្រាស់ អ្នកគួរតែធ្វើតេស្តសាកល្បងលាបនៅលើខ្នងដៃជាមុនសិន។
- ការប្រើប្រាស់ប្រេងខ្ញីនេះ អាចបង្កឱ្យមានផលប៉ះពាល់ដល់ស្បែកដូចជាកន្ទូល រមាស់ និងមានអាការក្អួតចង្អោរខ្លះៗផងដែរ។ ប្រសិនជាមានករណីធ្ងន់ធ្ងរអ្នកគួរតែប្រញាប់ទៅមន្ទីរពេទ្យជាបន្ទាន់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]