ស្លឹកម្ទេស ត្រូវបានគេដឹងថានៅក្នុងស្រុកខ្មែរយើងតែងតែនិយមយកមកទទួលទាន ធ្វើជាបន្លែនៅក្នុងសម្លជាមួយនឹងទំពាំង ឬយកមកស្ងោរលាយជាមួយនឹងសម្លផ្សេងៗតាមដែលត្រូវការ។
អ្វីដែលអ្នកមិនធ្លាប់បានដឹងនោះ ស្លឹកម្ទេសមិនត្រឹមតែមានរសជាតិឆ្ងាញ់ប៉ុណ្ណោះទេ តែតាមការស្រាវជ្រាវបានរកឃើញដែរថា ស្លឹកម្ទេសសម្បូរទៅដោយជាតិរ៉ែ និងវីតាមីនសំខាន់ៗជាច្រើនមុខបូកផ្សំបញ្ចូលគ្នា ប្រែក្លាយជាអាចជួយដល់សុខភាពរាងកាយរបស់មនុស្សយើងផងដែរ។ មិនតែប៉ុណ្ណោះក្រៅពីមានប្រយោជន៍សម្រាប់ការទទួលទានជាម្ហូបអាហារសុខភាពហើយនោះ ស្លឹកម្ទេសក៏អាចយកមកធ្វើជាគ្រឿងជួយសម្រស់និងសុខភាពរបស់នារី និងធ្វើជាទឹកតែបំប៉នសុខភាពក៏បាន ដែលមានមនុស្សភាគតិចបំផុតដែលបានដឹង។
ដើម្បីឱ្យអស់ចម្ងល់ តោះមកតាមដានគុណប្រយោជន៍ដ៏ហួសប្រមាណរបស់ស្លឹកម្ទេស សម្រាប់សុខភាព និងសម្រស់ទាំងអស់គ្នាដូចខាងក្រោម៖
# គុណប្រយោជន៍សម្រាប់សុខភាពរបស់ « ស្លឹកម្ទេស »
១. ព្យាបាលជំងឺរលាកឆ្លឹង និងរលាកសន្លាក់
ជំងឺរលាកសន្លាក់ និងឆ្អឹងភាគច្រើនកើតនៅលើមនុស្សវ័យចំណាស់ ហើយមានអាការដូចជាហើម ឬរឹងនៅក្នុងសន្លាក់ដែលធ្វើឱ្យពិបាកក្នុងការធ្វើចលនាជាដើម។ ប៉ុន្តែប្រសិនជាអ្នកទទួលទានស្លឹកម្ទេសឱ្យបានទៀងទាត់នោះ អាការរលាកសន្លាក់ឆ្អឹងរបស់អ្នក ប្រាកដជាបានធូរស្រាលជាមិនខាន ដោយសារតែសារធាតុប្រឆាំងនឹងការរលាកដែលមាននៅក្នុងស្លឹកម្ទេស។
២.ព្យាបាលជំងឺរើម
យើងបានដឹងរួចមកហើយថា ជំងឺរើម ជាជំងឺសើស្បែកដែលបណ្តាលមកពិវីរុសបាក់តេរីមួយចំនួន។ ការប្រើប្រាស់ស្លឹកម្ទេសក្នុងរបបចំណីអាហារអាចជួយកាត់បន្ថយ និងព្យាបាលជំងឺមួយនេះបានផងដែរ។
៣.បណ្តេញ និងសម្អាតជាតិពុលចេញពីក្នុងរាងកាយ
ស្លឹកម្ទេសអាចមានសមត្ថភាពអាចជួយបណ្តេញ និងសម្អាតជាតិពុលចេញពីរាងកាយបានល្អ មិនថាជាជាតិពុលនៅក្នុងម្ហូបចំណីអាហារដែលមិនស្អាត ឬអាការពុលចំណីអាហារផ្សេងៗនោះទេ សូម្បីតែរោគសើស្បែកដូចជា ផ្សិត ស្រែង និងរបូសផ្សេងៗលើស្បែក ក៏ស្លឹកម្ទេសអាចជួយធ្វើឱ្យអ្នកឆាប់ជាសះស្បើយបានដែរ។
៤.ជួយដល់ការសម្រកទម្ងន់
ស្លឹកម្ទេសត្រូវបានគេដឹងថាមានជាតិខ្លាញ់ និងកាឡូរីទាបដែលសាកសមមានឈ្មោះជារបបចំណីអាហារសុខភាពបំផុត។ អ្នកអាចប្រើប្រាស់ស្លឹកម្ទេសជារបបអាហារសម្រាប់សម្រកទម្ងន់បានផងដែរ ដោយការទទួលទានវាជាទៀងទាត់។
វិធីម្យ៉ាងទៀតសម្រាប់ធ្វើការសម្រកទម្ងន់នោះ គឺ គ្រាន់តែអ្នកយកស្លឹកម្ទេសទៅហាលថ្ងៃឱ្យបានស្ងួត បន្ទាប់មកយកទៅដាំជាមួយទឹកឱ្យពុះជាការស្រេច។ បន្ទាប់មកអ្នកអាចទទួលទានទឹកតែស្លឹកម្ទេសនេះបានហើយរាល់ពេលព្រឹកព្រលឹម ពេលមិនទាន់ទទួលទានអ្វីសោះ ដោយអ្នកអាចបន្ថែមទឹកក្រូចឆ្មារ ឬក្រូចឆ្មារសម្បកលឿងបន្ថែមបានដើម្បីបង្កើនរសជាតិ។
៥. ជួយកាត់បន្ថយកម្រិតកូឡេស្តឺរ៉ល
កូឡេស្តឺរ៉លមិនល្អ ឬកូឡេស្តឺរ៉លជាតិខ្លាញ់ឡើងខ្ពស់ អាចធ្វើឱ្យអ្នកប្រឈមមុខនឹងការកើតជំងឺគាំងបេះដូង។ ជាសំណាងល្អ ស្លឹកម្ទេសមានជាតិខ្លាញ់ កាឡូរីទាប និងសារធាតុសំខាន់ៗជាច្រើនមុខ ដែលអាចជួយកាត់បន្ថយកូឡេស្តឺរ៉លមិនល្អនៅក្នុងរាងកាយបានផងដែរ។
៦. ជួយធ្វើឱ្យប្រព័ន្ធភាពស៊ាំរឹងមាំ
សារធាតុ Phytochemcials និងអាស៊ីត Phenolic (Phenolic acids) នៅក្នុងស្លឹកម្ទេស អាចជួយធ្វើឱ្យប្រព័ន្ធភាពស៊ាំនៅក្នុងរាងកាយកាន់តែរឹងមាំ មានលទ្ធភាពការពារអ្នកពីជំងឺផ្សេងៗ និងជំងឺឆ្លង ដូចជាជំងឺផ្តាសាយជាដើម។
៧. មានសារធាតុប្រឆាំងអុកស៊ីតកម្ម
ស្លឹកម្ទេសបានផ្ទុកទៅដោយសារធាតុប្រឆាំងនឹងអុកស៊ីតកម្ម ដែលអាចធ្វើការសម្លាប់ និងរារាំងរ៉ាឌីកាល់សេរីដែលបង្កមេរោគ និងជំងឺផ្សេងៗជាច្រើននៅក្នុងរាងកាយបាន។ ការទទួលទានស្លឹកម្ទេសជាប្រចាំអាចមានលទ្ធភាពទប់ស្កាត់រាងកាយអ្នកពីជំងឺមហារីក ជំងឺភ្នែកឡើងបាយ ជំងឺគាំងបេះដួង ជំងឺដាច់សសៃឈាមបេះដូង និងជំងឺកាចសាហាវជាច្រើនមុខបានថែមទៀតផង។
៨. ជួយផលិតអាំងស៊ុយលីនសម្រាប់អ្នកកើតជំងឺទឹកនោមផ្អែម
ស្លឹកម្ទេស មានសារធាតុសំខាន់ៗជាច្រើន ដែលអាចជួយបង្កើនការផលិតអាំងស៊ុយលីននៅក្នុងរាងកាយ។ ដោយអរម៉ូនអាំងស៊ុយលីនមួយនេះ ពិតជាមានប្រយោជន៍ខ្លាំងណាស់សម្រាប់អ្នកដែលកើតមានជំងឺទឹកនោមផ្អែមប្រភេទទី១។ ដូច្នេះអ្នកគួរតែទទួលទានស្លឹកម្ទេសជារបបអាហារប្រចាំថ្ងៃ ដើម្បីជួយកាត់បន្ថយពីផលប៉ះពាល់នៃជំងឺទឹកនោមផ្អែម ថែមទាំងកាត់បន្ថយកម្រិតកូឡេស្តឺរ៉លក្នុងរាងកាយផងដែរ។
៩.ជំនួយ និងព្យាបាលប្រព័ន្ធរំលាយអាហារ
អ្នកដែលមានប្រព័ន្ធរំលាយអាហារខ្សោយ ឬក្រពះពិបាកនឹងធ្វើការរំលាយអាហារ អ្នកគ្រាន់តែឧស្សាហ៍ទទួលទានស្លឹកម្ទេសជាប្រចាំ ឬអ្នកក៏អាចយកស្លឹកម្ទេសស្រស់ៗទៅដាំនៅក្នុងទឹកឱ្យពុះ រួចទទួលទានវា បន្ទាប់ពីទទួលទានអាហាររួច ជាការស្រេច។
១០. ព្យាបាលជំងឺគ្រុនក្តៅ
អ្នកអាចព្យាបាលជំងឺគ្រុនក្តៅដោយការទទួលទានស្លឹកម្ទេស ឬធ្វើតាមវិធីបែបបុរាណ ដោយការបុកស្លឹកម្ទេស លាយជាមួយប្រេងសាឡាត់ ហើយបិតនៅលើក្បាលជាការស្រេច។
១១. ព្យាបាលមុខរបួស
សម្រាប់អ្នកដែលមានមុខរបួស ស្នាមមុតតូចៗឬមានការឈឺចាប់ត្រង់ស្នាមរបួសណាមួយនោះ អ្នកក៏អាចយកស្លឹកម្ទេសមកបុករួចបិទពីលើស្នាមរបួសនោះបានផងដែរ ដើម្បីឱ្យបានឆាប់ជាសះស្បើយ។
១១. សម្បូរដោយអាហារូបត្ថម្ភ
ស្លឹកម្ទេសសម្បូរទៅដោយសារធាតុរ៉េ និងជាប្រភពនៃវីតាមីនសំខាន់ៗដូចជា វីតាមីន A វីតាមីន C វីតាមីន B1 B12 ជាតិដែក កាល់ស្យ៉ូម និងប៉ូតាស្យូម ដែលអាចជំនួយសុខភាពរាងកាយរបស់អ្នកបានយ៉ាងប្រសើរ។
# គុណប្រយោជន៍សម្រស់របស់ « ស្លឹកម្ទេស »
១. សម្រាប់បញ្ហាមុខមុន
បញ្ហាមុខមុនផ្សេងៗកើតឡើងដោយសារតែមេរោគ និងបាក់តេរីផ្សេងៗ។ ដូច្នេះអ្នកក៏អាចព្យាបាលមុខមុនបានផងដែរ ដោយគ្រាន់តែបុកស្លឹកម្ទេសហើយយកមកបិតនៅត្រង់ផ្ទៃមុខដែលមានបញ្ហាមុខមុនតែប៉ុណ្ណោះ។
២. ជាស្ក្រាប់ដុសសម្អាតរាងកាយ
អ្នកគ្រាន់តែយកស្លឹកម្ទេសស្រស់ៗ មកបុក ឬកិនឱ្យហ្មត់ហើយយកមកលាប /ត្រដុសលើរដៃ ជើង និងរាងកាយតែប៉ុណ្ណោះជាការស្រេច។ ការធ្វើបែបនេះអាចចិញ្ចឹម និងថែរក្សាស្បែករបស់អ្នកឱ្យមានសុខភាពល្អ សាច់ឈាមភ្លឺថ្លា និងបំបាត់ជាតិកខ្វក់បានផងដែរ។
៣.ម៉ាស់សម្រាប់ផ្ទៃមុខ
អ្នកអាចយកស្លឹកម្ទេសជាម៉ាស់ថែរក្សាផ្ទៃមុខឱ្យស្រស់ស្អាត ភ្លឺរលោង ម៉ដ្ឋខៃបានផងដែរ ដោយវិធីងាយៗ។
គ្រាន់តែបុកស្លឹកម្ទេសឱ្យហ្មត់ រួចលាយជាមួយទឹកអង្ករឱ្យក្លាយជាល្បាយល្មម មិនគោកពេក មិនរាវពេក ហើយសឹមយកមកបំពកលើផ្ទៃមុខ ទុកចោលប្រមាណជា ១៥នាទីចាំលាងទឹកចេញជាការស្រេច។
៤. សម្រាប់ជាទឹកខ្ពុរមាត់
អ្នកអាចបំបាត់បញ្ហាក្លិនមាត់ និងធ្វើឱ្យមាត់ធ្មេញមានសុខភាព រួមជាមួយក្លិនប្រហើរស្រស់ថ្លាដោយវិធីងាយៗបានផងដែរ។
គ្រាន់តែអ្នកយកស្លឹកម្ទេសស្រស់ៗទៅដាំនៅក្នុងទឹកឱ្យពុះ ទុកឱ្យរាងត្រជាក់បន្តិច ហើយយកទឹកនេះមកធ្វើការខ្ពុរមាត់ជាប្រចាំ។
៥.ស្នាមកន្ទួលផ្សេងៗនៅលើស្បែក
សម្រាប់អ្នកដែលមានស្នាមក្រហម រមាស់ ឬបញ្ហាស្បែកជាច្រើន មិនថាជា សត្វមូស ឬសត្វផ្សេងៗ ទិច និងខាំនោះទេ ស្លឹកម្ទេសអាចជួយអ្នកបាន។ អ្នកគ្រាន់តែយកស្លឹកម្ទេសមកបុកឱ្យហ្មត់ រួចលាបវាលើស្នាមរបួសក្រហម ឬសត្វទិចខាំនោះជាការស្រច។
គុណប្រយោជន៍របស់ស្លឹកម្ទេសមានជាច្រើនទៀត រាប់មិនអស់នោះទេ។ អ្នកអាចប្រើប្រាស់ស្លឹកម្ទេសបានតាមដែលចិត្តត្រូវការសម្រាប់បញ្ហាស្បែក ជាពិសេសគឺការទទួលទានវាជាមុខម្ហូបជាប្រចាំតែម្តង។
អ្វីដែលសំខាន់មួយទៀតនោះ ស្លឹកម្ទេសក៏អាចយកមកធ្វើជាទឹកតែកែសុខភាពបានផងដែរ ដោយវិធីងាយៗដូចខាងក្រោមនេះ៖
# វិធីធ្វើតែពីស្លឹកម្ទេស
គ្រឿងផ្សំ
- ស្លឹកម្ទេសស្រស់ៗ
- ទឹកស្អាត ៣០០មីលីលីត្រ
ការអនុវត្ត៖
- ជាដំបូងយកស្លឹកម្ទេស ៣ ទៅ ៤សន្លឹកលាងទឹកឱ្យបានស្អាត ទៅដាំជាមួយទឹកឱ្យពុះ
- បន្ទាប់មកយកស្លឹកម្ទេសស្រស់ៗមួយកូនចានល្មម មកកិន ឬបុកឱ្យហ្មត់ សឹមយកទៅស្ងោរនៅក្នុងទឹកដែលកំពុងតែពុះនោះបន្ថែមទៀត
- ជាចុងក្រោយនៅពេលដែលវាពុះម្តងទៀតហើយ អ្នកអាចត្រងយកតែទឹកមកទទួលទានជាការស្រេច ដោយអាចបន្ថែមទឹកឃ្មុំបានដើម្បីបង្កើនរសជាតិ។
ការប្រើប្រាស់៖ អ្នកអាចទទួលទានតែស្លឹកម្ទេសជំនួយសុខភាពនេះ មួយកែវជារៀងរាល់ថ្ងៃនៅពេលព្រឹកបានដោយគ្មានបញ្ហា៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]