មន្ត្រីនគរបាល បំភ្លឺជុំវិញ ការចោទប្រកាន់ របស់ប្រជាពលរដ្ឋ ពាក់ព័ន្ធគ្រោះថ្នាក់ ចរាចរនៅស្តុប ទួលគោក

ភ្នំពេញៈ ក្រោយពេលមានការចោទប្រកាន់ និងរិគន់ពីមិត្តអ្នកអាន តាមរយៈគេហទំព័រព័ត៌មានដើមអម្ពិល ដែលមានចំណងជើងថា « រថយន្តចរាចរណ៍ គ្មានកំហុស ពេលប៉ះជាមួយរថយន្តអ្នកដំណើរ» នោះ មន្រ្តី នគរបាលចរាចរផ្លូវគោករាជធានីភ្នំពេញ នៅព្រឹកថ្ងៃទី៩ ខែវិច្ឆិកា ឆ្នាំ២០១២នេះ បានចេញមកបំភ្លឺ និង បដិសេធទាំងស្រុង ចំពោះចោទប្រកាន់ទាំងនេះ។

មន្រ្តីនគរបាលចរាចរណ៍ផ្លូវគោករាជធានីភ្នំពេញម្នាក់ បានថ្លែងបដិសេធនចំពោះការចោទប្រកាន់នេះថា ករណីនេះ ពុំមែនដូចការលើកឡើងរបស់ម្ចាស់រថយន្តនោះទេ លោកថា ខណៈនោះនៅគ្រាដែលភ្លើង ស្តុបពណ៌ខៀវ រថយន្តនគរបាលបានបញ្ជាដំណើរទៅមុខ ប៉ុន្តែពេលចេញដំណើរបានបន្តិចស្រាប់តែរលត់ ម៉ាស៊ីន ហើយភ្លាមៗនោះ ក៏មានរថយន្តបុកចំពីក្រោយ ។

លោកបន្តទៀតថា ក្រោយពេលកើតហេតុដូច្នោះ មន្រ្តីនគរបាលរបស់លោក បានចុះទៅសួរម្ចាស់រថយន្ត ដែលបុកពីក្រោយថា តើបើករថយន្តយ៉ាងម៉េច ហើយដឹងទេថា គំលាតពីគ្នាប៉ុន្មានម៉ែត្រ ប៉ុន្តែម្ចាស់រថយន្ត មិនបាននិយាយជាមួយទេ ហើយក៏បានបើករថយន្តថយក្រោយ និងជិះចេញទៅបាត់តែម្តង។

មន្រ្តីនគរបាលចរាចរផ្លូវគោករាជធានីភ្នំពេញ ក៏បានបញ្ជាក់យ៉ាងច្បាស់ផងដែរថា មន្រ្តីនគរបាលរបស់ លោកពុំមានទទួលទានជាតិស្រវឹង ដូចការលើកឡើងនោះទេ ព្រោះពួកគេកំពុងបំពេញការងារ សម្រាប់ ការិយាល័យរបស់លោក គឺពុំអនុញ្ញាតជាដាច់ខាតឲ្យមន្រ្តីណាម្នាក់ ទទួលទានជាតិស្រវឹងក្នុងម៉ោងការ ងារជាដាច់ខាត ។

សូមបញ្ជាក់ថា កាលពីថ្ងៃទី៨ ខែវិច្ឆិកា ឆ្នាំ២០១២ ម្សិលមិញនេះ មិត្តអ្នកអាន បានផ្ញើលិខិតមួយច្បាប់ សូមឲ្យមជ្ឈមណ្ឌលព័ត៌មានដើមអម្ពិល ធ្វើការចុះផ្សាយនូវអត្ថបទមួយមានចំណងជើងថា «រថយន្តចរា ចរណ៍ គ្មានកំហុស ពេលប៉ះជាមួយ រថយន្ត អ្នកដំណើរ» ។ នៅក្នុងខ្លឹមសារនៃលិខិតនោះសរសេថា សំណើជួយវិភាគករណីសមត្ថកិច្ច នគរបាល ចរាចរណ៍ ផ្នែកបើកបររថយន្តស្ទូច ដែលចតខុសច្បាប់ មានស្លាកលេខ នគរបាល 2-0048។ ខ្ញុំបាទ មានកិត្តិយសសូម អនុញ្ញាតគោរព ជូនជម្រាប ជូនលោក ប្រធាន មេត្តាជ្រាបថា នៅម៉ោង៨ ថ្ងៃទី៧ ខែវិច្ឆិកា ឆ្នាំ២០១២នៅស្តុបទួលគោក ទល់មុខអគ្គនាយក ដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុ។

នៅពេល ឈប់ស្តុបភ្លើង ពណ៌ក្រហម រថយន្ត នគរបាលខាងលើ និងរថយន្តរងគ្រោះបាន ឈប់ស្របទិសគ្នា។ ជាក់ស្តែង រថយន្ត នគរបាល បានបញ្ជា រថយន្តគាត់ ហើយរលត់ ថយមកប៉ះ រថយន្តនៅ ខាងក្រោយ ដែលជា រថយន្ត របស់ខ្ញុំ នៅពលេនោះ ខ្ញុំបាទដែលជាម្ចាស់ រថយន្តនៅក្រោយ ទៅប្រាប់គាត់ ដែលជាអ្នក បើកថា រថយន្តគាត់ប៉ះ រថយន្តខ្ញុំហើយ ពេលនោះគាត់ ក៏ត្រឡប់មកវិញថា រថយន្ត របស់ខ្ញុំ ចរាចរ ខុសច្បាប់ ទៅវិញ។

ខ្ញុំសូមបញ្ជាក់ថា នៅពេល ដែលគាត់ និយាយថាខ្ញុំ មានធុំក្លិនគ្រឿង ស្រវឹងនៅពេល ដែលគាត់ បញ្ឆេះម៉ាស៊ីន រួចគាត់ បញ្ជូលលេខរថយន្ត ទើបខ្ញុំឃើញ អាការៈ ស្រវឹងរបស់គាត់។ ពេលនោះ មានមន្ត្រី នគរបាលចរាចរណ៍២នាក់ មកអន្តរាគម ខ្ញុំក៏ប្រាប់បងទំាងពីរនោះ ឲ្យពួគគាត់ជួយ ឃាត់រថយន្តបង្ក តែពួកគាត់បែរ ជាបញ្ជាឲ្យ រថយន្តបង្កនោះ អែបគៀន តែរថយន្តបង្ក មិនអែបគៀនទេ បែរជាបើកទៅ មុខទៅវិញ ដោយមិនទទួល ខុសត្រូវសោះ។

ខ្ញុំសូមសួរថា ក្នុងនាមគាត់ ជាមន្ត្រីនគរបាល ចរាចរណ៍មួយរូប គាត់សេពគ្រឿងស្រវឹង ហើយបើកបរ រថយន្ត របស់អង្គភាព បង្កបញ្ហា ហើយមិនសុំទោស ប្រជាពលរដ្ឋ មិនដោះស្រាយ ដោយការ យោគយល់គ្នា បែរជាជនរងគ្រោះ ខុសច្បាប់ទៅវិញ។ តើជាការត្រឹមត្រូវដែរឬទេ?
ដូច្នេះសូម ថ្នាក់លើមេត្តាជួយ មើលមន្ត្រីបើករ រថយន្តខាងលើងផង (នគរបាល 2-0048) ៕

ដោយៈ ដើមអម្ពិល

ផ្តល់សិទ្ធដោយ ដើមអម្ពិល