ការដេកសង្កៀតធ្មេញ កើតមានជាញឹកញាក់ មកលើមនុស្សទូទៅមិនថាកុមារ ឬមនុស្សចាស់ឡើយ អាចបង្កជាសម្លេងរំខានដល់ដំណេករបស់អ្នកដទៃ ដែលគេងនៅក្បែរ ក៏ដូចជាប៉ះពាល់ជាអវិជ្ជមានដល់សុខភាពធ្មេញរបស់អ្នកផងដែរ។
មូលហេតុនៃការសង្កៀតធ្មេញ
ការដេកសង្កៀតធ្មេញ ជាប់ពាក់ព័ន្ធនឹងចំណាត់ការគ្រប់គ្រងអារម្មណ៍ ដែលបណ្តាល មកពីភាពតាងតឹងក្នុងចិត្ត ក៏ដូចជាបញ្ហាស្រ្តេស ដែលកើតមានមកលើរូបអ្នកក្នុងជីវិតរស់នៅប្រចាំថ្ងៃ។
បន្ថែមលើនេះ វាក៏បណ្តាលមកពីធ្មេញវៀច ឬធ្មេញបាក់ជាដើម ដែលបណ្តាលឲ្យទើស។
ជារឿយៗ ចំពោះអ្នកដែលមានបញ្ហាកំឡុងពេលសម្រាន្តលង់លក់ ដែលមានអាការ ដូចជាស្រមុក ឬដេកមមើរ ទំនងអាចបណ្តាលឲ្យមាននូវការសង្កៀតធ្មេញ។
ការដេកសង្កៀតធ្មេញក៏ជាមូលហេតុនៃទម្លាប់រស់នៅ ក៏ដូចជារបបទទួលទានប្រចាំថ្ងៃផងដែរ ដែលនឹងមានបញ្ជាក់ខាងក្រោមនេះ។
ការដេកសង្កៀតធ្មេញ អាចជះនូវផលប៉ះពាល់មានដូចជា៖
- បណ្តាលឲ្យធ្មេញឆាប់សឹករិចរឹល ឬបាក់ជាផ្ទាំង។
- បង្កឲ្យមានអាការឈឺចាប់លើផ្ទៃមុខ ឈឺក្បាល ព្រមទាំងឈឺត្រចៀក។
- ប៉ះពាល់ដល់ឆ្អឹងថ្គាម ថែមទាំងអាចធ្វើខូចនូវទម្រង់មុខ ក្នុងករណីខ្លះក៏មាន។
វិធីការពារ និងព្យាបាល
ផ្តាច់ ឬកាត់បន្ថយ អាហារ និងទឹកភេសជ្ជៈទាំងឡាយ ដែលមានផ្ទុកនូវសារធាតុ កាហ្វេអ៊ីន ដូចជាកាហ្វេ សូកូឡា ឬទឹកតែ ។ល។
កាត់បន្ថយការទទួលទានសុរា ឬបារី។
កាត់បន្ថយទម្លាប់អាក្រក់់មានដូចជា ខាំវត្ថុរឹង ដូចជាប៊ិច ឬខ្មៅដៃ។ ចៀសវាងការទំពារស្ករកៅស៊ូ ដែលអាចធ្វើទៅបាន ព្រោះវាបណ្តាលឲ្យសាច់ដុំថ្គាមរបស់អ្នកសុាំ នឹងដំណើរការ បណ្តាលឲ្យឆាប់សង្កៀតធ្មេញយ៉ាងងាយស្រួល។
កុំមានទម្លាប់សង្កៀត ឬខាំធ្មេញខ្លួនឯងនៅពេលថ្ងៃ។ គួរគប្បីអនុញ្ញាតិ ឲ្យថ្គាមរបស់អ្នកសម្រាកបានខ្លះ ពោលគឺត្រូវដាក់អណ្តាតរបស់អ្នក ឲ្យនៅចំកណ្តាលបរិវេណធ្មេញទាំងសងខាង។
សម្រាន្តឲ្យបានត្រឹមត្រូវ៖ ត្រូវចូលគេងទៀងម៉ោង ហើយត្រូវប្រាកដថាបរិស្ថានជុំវិញដំណេក មានភាពល្អប្រសើរ មិនក្តៅ ឬត្រជាក់ពេក និងមិនមានសម្លេងរំខាន។
ចូរទៅពិគ្រោះជាមួយអ្នកជំនាញក្នុងការបំបាត់ស្ត្រេស ក៏ដូចជាណាត់ជួបទន្តពេទ្យដើម្បីធ្វើការពិនិត្យព្យាបាល៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]