រាជធានីភ្នំពេញ ៖ កញ្ញានី មុនីនាថ អវត្តមានចូលបំភ្លឺនៅតុលាការ ទាក់ទិនការប្តឹងរបស់អតីតគូដណ្តឹង ។ សាលាដំបូងរាជធានីភ្នំពេញ បានផ្តើមនីតិវិធីរបស់ខ្លួនលើកដំបូងលើបណ្ដឹងលោកអ៊ឹង សូឡាង ប្ដឹងអតីតគូដណ្ដឹងរបស់ខ្លួន គឺកញ្ញានី មុនីនាថ ទាមទារសំណងចំនួន១២ម៉ឺនដុល្លារ កាលពថ្ងៃទី២៩ វិច្ឆិកា ២០១៧ ។
នីតិវិធីលើកដំបូងនេះពុំមានវត្តមានតារាសម្ដែងនី មុនីនាថ ចូលរួមទេ គឺមានតែមេធាវី របស់នាងប៉ុណ្ណោះ ។ លោកមេធាវីរ៉ូ ប៊ីនណៃ និយាយថា ករណីនេះតុលាការកំពុងចាត់ការតាមនីតិវិធី ពុំទាន់មានលទ្ធផលយ៉ាងណានោះទេ តែលោកបញ្ជាក់ថា ពុំមានករណីឆបោក ឬបណ្តឹងឆបោកប្រឆាំងកូនក្តីរបស់លោក ដូចសារព័ត៌មានមួយចំនួនបានចុះផ្សាយទេ ។ ម្យ៉ាងកូនក្តីលោកក៏ពុំបានគេចវេះ ឬមិនចង់ចូលបំភ្លឺនៅតុលាការដូចសារព័ត៌មានមួយចំនួនបានចុះផ្សាយដែរ ។
លោកមេធាវីបញ្ជាក់ថាយោងតាមនីតិវិធីក្រមរដ្ឋប្បវេណី នៃព្រះរាជាណាចក្រកម្ពុជា មេធាវីតំណាងដោយអាណត្តិអាចឆ្លើយជំនួសកូនក្តីបាន ដោយពុំចាំបាច់មានវត្តមានរបស់គូភាគីទេ ដូច្នេះមេធាវីអាចចូលជំនួសកញ្ញានី មុនីនាថ គ្រប់នីតិវិធីរបស់តុលាការបាន មិនខុសច្បាប់ទេ ។
ពុំទាន់មានប្រភពច្បាស់ការណ៍ណាមួយពីសាលាដំបូងរាជធានីភ្នំពេញថា តើតុលាការនឹងកោះហៅគូភាគីលើកទី២នៅថ្ងៃណាទេ ។ យោងតាមពាក្យបណ្ដឹង គឺលោកអ៊ឹង សូឡាង បានប្តឹងទាមទារសំណងសរុបចំនួន១២ម៉ឺនដុល្លារ ពីកញ្ញានី មុនីនាថ ដោយក្នុងនោះលោកបានទាមទារឲ្យនី មុនីនាថ សងប្រាក់ចំនួន៧ម៉ឺនដុល្លារ និងសំណងជំងឺចិត្តចំនួន៥ម៉ឺនដុល្លារ ។
កញ្ញានី មុនីនាថ និងលោកអ៊ឹង សូឡាង បានភ្ជាប់ពាក្យនឹងគ្នានៅឆ្នាំ២០១៤ ហើយអ្នកទាំង២បានជួបភាពរកាំរកូសនាពេលកន្លងមក រហូតដល់មានបណ្តឹងទៅតុលាការរបស់លោកអ៊ឹង សូឡាង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
