រាជធានីភ្នំពេញ ៖ អ្នកណាៗក៏មានការងឿងឆ្ងល់ដែរចំពោះការបាត់មុខតារាកំប្លែងវ័យក្មេងនាយចឺម ពីលើឆាកកំប្លែងរបស់ទូរទស្សន៍ស៊ីធីអិនទីដែលធ្លាប់សាងកេរ្តិ៍ឈ្មោះរាប់ឆ្នាំ ។
ខណៈមានចម្ងល់ជាច្រើនបែបនោះ លោកតាវិចទ័រ បានបង្ហាញមូលហេតុដែលលោកបង្អាក់មិនឱ្យនាយចឺមឡើងសម្តែងនាពេលកន្លងមក ។ តើមកពីហេតុអ្វី ?
កាលពីរសៀលថ្ងៃទី២៧ វិច្ឆិកា ឆ្នាំ២០១៧ នាយចឺម និងក្រុមគ្រួសារបាននាំក្រុមគ្រួសារទៅធ្វើពិធីជូនកាដូដឹងគុណ និងសុំទោស ដោយមិនឲ្យលោកតាវិចទ័រដឹងខ្លួនជាមុនទេ ។ មានការចូលរួមពញ្ញាក់អារម្មណ៍ពីតារារួមក្រុមមួយចំនួនផងដែរ ធ្វើឲ្យលោកតាវិចទ័ររំភើបចង់ស្រក់ទឹកភ្នែក ។
ចំពោះការជូនកាដូបែបនេះ លោកតាវិចទ័រអះអាងថា មិនមែនជាលើកទី១ទេ គឺនាយចឺមតែងតែជូនជាការដឹងគុណច្រើនលើកក្នុងមួយឆ្នាំៗ ជាពិសេសក្នុងរដូវបុណ្យទាន ។ ប៉ុន្តែសម្រាប់ការជូនកាដូដោយមិនឱ្យដឹងខ្លួនជាមុននេះ លោកតាវិចទ័រថា ជាលើកទី១ ដោយសូម្បីតែលោកខ្លួនឯងក៏ទប់អារម្មណ៍រំភើបចិត្តមិនចង់បានដែរ ។
លោកតាវិចទ័របញ្ជាក់ថា «ហេតុផលដែលខ្ញុំសម្រេចឲ្យនាយចឺមផ្អាកកំប្លែងនៅCTN គឺមិនមែនដោយសារអន់ចិត្តនោះទេ គឺដោយសារតែខ្ញុំយល់ថានាយចឺមកំពុងឡើងកូដក្នុងអាជីពចម្រៀង ហើយមិនចង់ឲ្យបន្តកំប្លែងនាំឲ្យសាំភ្នែកអ្នកគាំទ្រប៉ុណ្ណោះ ។ នាយចឺមកាន់តែល្បីក្នុងអាជីពចម្រៀង ដូច្នេះមិនឲ្យកំប្លែងឡូកឡំធ្វើឲ្យមានការធ្លាក់តម្លៃនោះទេ តែខ្ញុំនឹងប្រើយុទ្ធសាស្ត្រមួយថ្មី ធ្វើឲ្យនាយចឺមកាន់តែខ្លាំងក្នុងអាជីពថ្មី »។
នាយចឺមគឺជាតារាកំប្លែងមួយដួងដែលមានឱកាសចូលរួមសម្តែងក្នុងក្រុមទូរទស្សន៍ស៊ីធីអិនតាំងពីតូចមក ។ ទោះជាយ៉ាងណាក្តីមួយរយៈចុងក្រោយនេះបាត់មុខនាយពីក្រុមកំប្លែងរបស់ខ្លួនធ្វើឲ្យមានចម្ងល់ពីមហាជន ។ អ្នកខ្លះយល់ថាតារាកំប្លែងរូបនេះប្រាកដជាមានបញ្ហាអ្វីនៅក្នុងក្រុមហើយ ។
បច្ចុប្បន្ននាយចឺម កំពុងត្រៀមចេញបទចម្រៀងថ្មីចំនួន៤បទដើម្បីបំពេញសេចក្ដីត្រូវការរបស់អ្នកគាំទ្រខ្លួន ខណៈនាយក្លាយជាតារាចម្រៀងមួយរូបដែរ ហើយមានការចាប់អារម្មណ៍ច្រើនពីទស្សនិកជន ។ ការត្រៀមចេញចម្រៀងថ្មីនេះ នាយចឺមបញ្ជាក់ថា អាចនឹងធ្វើឱ្យទីផ្សារចម្រៀងរបស់ខ្លួនលូតឡើងមួយកម្រិតទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
