រាជធានីភ្នំពេញ ៖ ភ្ញាក់ពីព្រលឹមដឹកប្រពន្ធនិងកូនទៅមន្ទីរពេទ្យត្រូវម៉ូតូមួយ គ្រឿងទៀតនៅសល់ជាតិស្រវឹងពីយប់ជិះមកបុកពីក្រោយបណ្ដាលឱ្យដួល របួសធ្ងន់២នាក់ និងស្រាល២នាក់ កាលពីវេលាម៉ោង៤និង៣០នាទីទៀបភ្លឺថ្ងៃទី៩ មីនា តាមបណ្តោយផ្លូវទេពផន សង្កាត់ទឹកល្អក់ទី៣ ខណ្ឌទួលគោក ។ តាមសម្ដីរបស់ស្ដ្រីរងគ្រោះជាប្រពន្ធឈ្មោះ ដា ស៊ីណា អាយុ២១ឆ្នាំ ស្នាក់នៅសង្កាត់ទឹកល្អក់ទី៣ ខណ្ឌទួលគោក មានស្រុកកំណើតនៅភូមិថ្មគោ ឃុំតាពូង ស្រុកថ្មគោ ខេត្ដបាត់ដំបង បានឱ្យដឹងថា មុនពេលកើតហេតុប្ដីរបស់ខ្លួនឈ្មោះយិន វីត អាយុ២៣ឆ្នាំ ជាចុងភៅនៅភោជនីយដ្ឋានព្រឹកឆ្ងាញ់ល្ងាចស្រស់ បានជិះម៉ូតូឌ្រីមសេ១២៥ ពណ៌ខ្មៅ ដឹកខ្លួននិងកូនស្រីឈ្មោះយិន នីកា អាយុទើបតែ១១ខែ ទៅមន្ទីរពេទ្យ ។
ប្រភពដដែលបន្ដទៀតថា ខណៈពេលជិះទៅដល់ចំណុចកើតហេតុ ស្រាប់តែមានម៉ូតូមួយគ្រឿងទៀតម៉ាកស្មាស់ ពណ៌ខ្មៅ ជិះម្នាក់ឯងក្នុងស្ថានភាពស្រវឹងមកពីក្រោយបោះពួយលឿនស្លេវ មកដល់បុកពីក្រោយ បណ្ដាលឱ្យដួលម៉ូតូទាំងពីរគ្រឿង ហើយជនរងគ្រោះជាប្ដីរយះដាច់មុខមួយចំហៀងខាងឆ្វេង កូនស្រីតូចរលាត់ស្បែកឆ្អឹងខ្នង និងបោកក្បាលអ្នកទាំងពីររងរបួសធ្ងន់។ ឯស្ដ្រីជាប្រពន្ធរលាត់ដៃជើងរងរបួសស្រាល ចំណែកអ្នកជិះម៉ូតូស្មាស់របួសជើងនិងរបកស្បែកដៃខាងឆ្វេង របួសស្រាល ។ អ្នកបើកម៉ូតូស្មាស់ឈ្មោះវណ្ណ ភេទប្រុស អាយុ២០ឆ្នាំ ដែលគេអះអាងថានៅធំក្លិនស្រាជាប់នឹងខ្លួននោះ៕
ដោយ ៖ ធីតាកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
