រាជធានីភ្នំពេញ ៖ យុវជន២នាក់នាំគ្នាចូលក្លឹប ចេញពីក្លឹបវិញ ត្រូវជនសង្ស័យប្រដាប់អាវុធមួយក្រុមដេញកាប់ប្លន់យកម៉ូតូម៉ាក MSX បានសម្រេច បង្កឲ្យមានការភ្ញាក់ផ្អើលកាលពីវេលាម៉ោង០២និង២០នាទីរំលងអធ្រាត្រ ឈានចូលថ្ងៃទី២៣ ខែវិច្ឆិកា ឆ្នាំ២០១៧ នៅចំណុច ពន្លឺ វ៉ាពេជ្រ ទទួលផ្ញើរថយន្ត និងម៉ូតូ២៤ម៉ោង តាមបណ្តោយផ្លូវ២០១១ ជិតថ្នល់រថភ្លើង ភូមិតាងួន១ សង្កាត់កាកាប ខណ្ឌពោធិ៍សែនជ័យ ។
ជនរងគ្រោះជាម្ចាស់ម៉ូតូឈ្មោះ ប៊ីន ម៉ានី ហៅអាខ្មៅ អាយុ១៩ឆ្នាំ មុខរបរកម្មករសំណង់ ស្នាក់នៅការដ្ឋានសំណង់ ស្ថិតនៅភូមិដំណាក់ សង្កាត់គោគឃ្លាង ខណ្ឌសែនសុខ មានស្រុកណើតនៅភូមិគគីរសោម ឃុំគគីរសោម ស្រុកកំពោតទូក ខេត្តស្វាយរៀង ។ ជនរងគ្រោះដែលជិះពីក្រោយឈ្មោះ រឿន រ៉ាត់ ភេទប្រុស អាយុ១៨ឆ្នាំ មុខរបរកម្មករសំណង់ ស្នាក់នៅជាមួយគ្នា មានស្រុកកំណើតនៅស្រុកព្រះស្តេច ខេត្តព្រៃវែង ម៉ូតូដែលជនសង្ស័យវាយកាប់ប្លន់ម៉ាក MSX ពណ៌លឿង អ៊ុតពណ៌ខ្មៅ ពាក់ស្លាកលេខ ភ្នំពេញ ១FO-៧១៤២ ។
ជនរងគ្រោះបានឲ្យដឹងថា មុនពេលកើតហេតុ រូបគាត់ និងមិត្តភក្តិរូមការងារម្នាក់ បាននាំគ្នាទៅលេងក្លឹបអាវ៉ាឡូញ នៅសង្កាត់ទឹកថ្លា ខណ្ឌសែនសុខ ។ បន្ទាប់ពីផឹកស៊ីរាំលេងសប្បាយ ហើយដល់ម៉ោងកើតហេតុបាននាំគ្នាត្រលប់ទៅការដ្ឋានសំណង់វិញ ខណៈពេលជិះម៉ូតូមកដល់ចំណុចកើតហេតុ នៅចំណុចក្លិបរីលេក តាមផ្លូវ២០១១ ស្រាប់តែមានជនសង្ស័យមានគ្នា៦នាក់ជិះម៉ូតូ៣គ្រឿង ម៉ាកស្មាសវីមួយគ្រឿង និងម៉ាកហុងដាឌ្រីម២គ្រឿង ប្រដាប់ដោយដាវមួយដើម និងកាំបិតបុ័ងតោមួយ បានជិះដេញពួកគាត់ លុះដេញមកដល់ចំណុចកើតហេតុខាងលើ ជនសង្ស័យបានទាញកាំបិតបុ័ងតោកាប់ទៅលើជនរងគ្រោះជិះពីក្រោយចំនួន២កាំបិត ចំដៃខាងឆ្វេង និងចំចង្កេះផ្នែកខាងឆ្វេង ដែលរបណ្ដាលឲ្យរងរបួសធ្ងន់រយះដៃខាងឆ្វេង ហើយជនសង្ស័យជិះម៉ូតូមួយគ្រឿងទៀត បានទាញដាវកាប់ទៅលើជនរងគ្រោះអ្នកបើកម៉ូតូ តែជនរងគ្រោះឃើញទាន់បានផ្តួលម៉ូតូរត់គេចខ្លួន ក៏ត្រូវជនសង្ស័យលើកម៉ូតូជិះគេចខ្លួនបាត់ដោយសុវត្ថិភាព ។
ក្រោយពេលកើតហេតុ ជនរងគ្រោះរងរបួសធ្ងន់ជិះក្រោយត្រូវបានបងប្អូនដឹកតាមម៉ូតូយកទៅសង្គ្រោះភ្លាមៗ ចំណែកជនរងគ្រោះម្ចាស់ម៉ូតូវិញ បានទៅមកដាក់ពាក្យបណ្តឹងនៅប៉ុសិ៍្តនគរបាលសង្កាត់កាកាប ដើម្បីឲ្យសមត្ថកិច្ចជួយស្រាវជ្រាវរកមុខសញ្ញាខាងលើ យកមកផ្តន្ទាទោសតាមច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
