ឡានក្រុងនៅទីក្រុងឡុងដ៍ នឹងអាចប្រើប្រាស់ជីវឥន្ធនៈ ដោយទាញចេញពីកាកសំណល់កាហ្វេប្រើរួច ឆាប់ៗនេះ

អង់គ្លេស៖ កាលពីថ្មីៗនេះ ក្រុមហ៊ុនចំនួន ៣នៅក្នុងចក្រភពអង់គ្លេសបានរួមដៃសហការគ្នាដើម្បីផលិតនូវជីវឥន្ធនៈដែលចម្រាញ់ចេញពីកាហ្វេសម្រាប់ឲ្យឡានក្រុងដឹកអ្នកដំណើរនៅក្នុងទីក្រុងឡុងដ៍ប្រើប្រាស់។

មកដល់ពេលនេះ គេបានផលិតប្រេងឥន្ធនៈដែលចម្រាញ់ចេញពីកាហ្វេចំនួន ៦ ០០០លីត្រ ដែលសមស្របសម្រាប់គម្រោងសាកល្បងដឹកអ្នកដំណើរនៅទីក្រុងឡុងដ៍ពេញមួយឆ្នាំតែម្តង។

ក្រុមហ៊ុន bio-bean ចាប់ផ្ដើមប្រមូលកាហ្វេដែលត្រូវបានប្រើប្រាស់រួច ពីហាងកាហ្វេ ភោជនីយដ្ឋាន និងរោងចក្រ ជាដើម ដើម្បីបញ្ជូនទៅកន្លែងសម្រាប់កែច្នៃនិងទាញយកជីវឥន្ទនៈពីកាហ្វេដែលប្រើប្រាស់រួចនោះ។ បន្ទាប់មកប្រេងកាហ្វេនឹងត្រូវបានលាយជាមួយនឹងប្រេងឥន្ធនៈផ្សេងមួយចំនួនទៀតដើម្បីបង្កើតជាជីវឥន្ទនៈ B20 សម្រាប់ប្រើប្រាស់នៅលើឡានក្រុងដែលប្រើប្រេងម៉ាស៊ូត ដោយមិនបាច់មានការកែឆ្នៃឡាននោះទេ។

គួរបញ្ជាក់ផងដែរថា ក្រុមហ៊ុន bio-bean បានប៉ាន់ស្មានថាចក្រភពអង់គ្លេសប្រើប្រាស់កាហ្វេចំនួន ៥០០ ០០០តោនក្នុងមួយឆ្នាំ ហើយភាគច្រើនកាកសំណល់កាហ្វេនោះត្រូវបានគេបោះបង់ចោលនៅកន្លែងចាក់សំរាម ដូច្នេះការទាញយកថាមពលពីវត្ថុដែលគេបោះបង់ចោលនឹងអាចជួយសម្រួលដល់បញ្ហាបរិស្ថាន និងបំពេញតម្រូវការរបស់មនុស្សជាតិបានជាមិនខាន៕

ប្រភព៖ CNN

• បរិស្ថាន
• ទីកន្លែង
• ឡាន