មិននឹកស្មានថាគ្រាន់តែទទួលទានប្រេងអូលីវមួយស្លាបព្រាពេលពោះទទេ មានអត្ថប្រយោជន៍ធំៗបែបនេះសោះ!

ប្រេងអូលីវគឺជាប្រេងសំខាន់ម្យ៉ាង ដែលសម្បូរទៅដោយសារធាតុចិញ្ចឹមដ៏ច្រើនលើសលប់ (Macronutrients), អាស៊ីតខ្លាញ់ និងវីតាមីនជាច្រើនមុខដែលមានប្រយោជន៍ជាច្រើន សម្រាប់សុខភាពទូទៅ។ ជាធម្មតាប្រេងអូលីវត្រូវបានមនុស្សភាគច្រើនយកធ្វើជាគ្រឿងផ្សំ សម្រាប់ថែទាំសុខភាពសម្រស់ ជាម៉ាស់ថែរក្សាផ្ទៃមុខ ឬថែទាំស្បែកដងខ្លួនជាដើម ប៉ុន្តែអ្នកប្រាកដជាមិនទាន់ជ្រាបទេថា គ្រាន់តែទទួលទានប្រេងអូលីវ១ស្លាបព្រាបាយរាល់ពេលពោះទទេ នៅពេលព្រឹក ក៏អាចផ្តល់អត្ថប្រយោជន៍ធំៗ ៩យ៉ាងចំពោះសុខភាពរាងកាយរបស់យើងបានដែរ។

តោះ! មកមើលពីគុណប្រយោជន៍ធំៗខាងក្រោមទាំងអស់គ្នាថាមានអ្វីខ្លះ៖  

១. ជំនួយពោះវៀនធំ

ប្រេងអូលីវមានសមត្ថភាពអាចជំនួយដល់សុខភាពពោះវៀនធំ ឱ្យដំណើរការល្អ បំបាត់អាការទល់លាមក ថែមទាំងអាចជួយប្រឆាំង និងការពារកោសិកាដែលវិវឌ្ឍន៍ទៅជាជំងឺមហារីកពោះវៀនធំបានផងដែរ។  

២.ជំនួយស្បែក,សក់,ក្រចក និងឆ្អឹង

ប្រេងអូលីវត្រូវបានគេប្រើជាគ្រឿងផ្សំធម្មជាតិធ្វើជាម៉ាស់ សម្រាប់ជំនួយសក់ឱ្យរឹងមាំ បំបាត់បញ្ហាជ្រុះសក់ ធ្វើឱ្យក្រចករឹងមាំមិនងាយបាក់ផុយស្រួយ ជំនួយសុខភាពឆ្អឹង និងធ្វើឱ្យស្បែកមានសំណើម ទន់ ម៉ដ្តរលោង បំបាត់បញ្ហាមុខផ្សេងៗដូចជាមុខមុនជាដើម។ ប៉ុន្តែការទទួលទានប្រេងអូលីវចូល ទៅក្នុងខ្លួនក៏រឹតតែអាចជួយបង្កើនប្រសិទ្ធភាពបញ្ហាអស់ទាំងនេះជាងមុនទៅទៀត។ 

៣. ជួយសម្អាតថ្លើម

ប្រេងអូលីវ មានសមត្ថភាពជួយបង្កើនមុខងារថ្លើមឱ្យដំណើរការល្អ ថែមទាំងអាចជួយសម្អាត និងបណ្តេញជាតិពុលចេញពីថ្លើមបានល្អផងដែរ។ ដើម្បីឱ្យកាន់តែមានប្រសិទ្ធភាព អ្នកគ្រាន់តែយកប្រេងអូលីវ២ស្លាបព្រា លាយជាមួយទឹកក្រូចឆ្មារសម្បកលឿង (ប្រើក្រូចឆ្មារក៏បាន) ១ភាគ៣ (ប្រហែលជា៥ស្លាបព្រា) កូរបញ្ចូលគ្នារួចទទួលទានរាល់ព្រឹកពេលពោះទទេ។  

៤. ជួយសម្រកទម្ងន់

ប្រេងអូលីវសម្បូរទៅដោយអាស៊ីតឆ្អែត ដែលអាចជួយធ្វើឱ្យអ្នកមានអារម្មណ៍ថាឆ្អែតបានយូរ មិនសូវជាមានអារម្មណ៍ ចង់ទទួលទានអាហារច្រើនដូចមុន។ បន្ថែមពីការទទួលទានប្រេងអូលីវពេលព្រឹករាល់ពេលពោះទទេ ប្រសិនជាអ្នកតែងតែប្រើប្រាស់ប្រេងអូលីវជាប្រចាំជំនួសបឺ ឬខ្លាញ់ក្នុងការចំអិនអាហារផ្សេងៗទៀតនោះ រឹតតែជំនួយដល់ការសម្រកទម្ងន់បានផងដែរ។  

៥. ធ្វើឱ្យប្រព័ន្ធភាពស៉ាំរឹងមាំ

ជាតិអាស៊ីតខ្លាញ់ឆ្អែតនៅក្នុងប្រេងអូលីវគឺជាផ្នែកដ៏សំខាន់មួយជួយធ្វើឱ្យប្រព័ន្ធភាពស៉ាំក្នុងរាងកាយដំណើរការល្អ និងមានភាពរឹងមាំដែលអាចមានសមត្ថភាពជួយការពារ និងព្យាបាលអ្នកពីជំងឺផ្សេងៗជាច្រើនមុខ ជាពិសេសជំងឺផ្តាសាយ និងជំងឺផ្សេងៗដែលវាយប្រហារលើកោសិកាប្រព័ន្ធភាពស៉ាំ ( Autoimmune)។  

៦. ការពារសុខភាពបេះដូង

កម្រិតកូឡេស្តឺរ៉លមានជាតិខ្លាញ់ល្អ (HDL) ច្រើនអាចជួយរារាំងខ្លាញ់មិនល្អ (LDL) ពីក្នុងរាងកាយ ដែលអាចជួយធ្វើឱ្យបេះដូងរបស់អ្នកមានសុខភាពល្អ បង្ការអ្នកពីជំងឺខ្លាញ់រុំសសៃឈាមបេះដូង និងជំងឺគាំងបេះដូងជាដើម។ ដូច្នេះដើម្បីបង្កើនកម្រិតខ្លាញ់ល្អក្នុងរាងកាយ គ្រាប់ធញ្ញជាតិ បន្លែ ផ្លែឈើ រួមទាំងប្រេងអូលីវអាចជួយអ្នកបាន ដោយគ្រាន់តែទទួលទានវាជាប្រចាំ ឱ្យបានទៀងទាត់តែប៉ុណ្ណោះ។  

៧. កាត់បន្ថយការរលាក

ប្រេងអូលីវមានប្រសិទ្ធភាពអាចព្យាបាល និងកាត់បន្ថយការរលាកពីក្នុងរាងកាយបានយ៉ាងមានប្រសិទ្ធភាពដូចជាការប្រើប្រាស់ថ្នាំផងដែរ។ ម្យ៉ាងទៀតវាគឺជាឱសថដែលអាចព្យាបាលតាមវិធីធម្មជាតិ ដោយមិនប៉ះពាល់ដល់សុខភាពរាងកាយនោះឡើយ។  

៨. ជួយបន្ថយកម្រិតជាតិស្ករក្នុងឈាម

ប្រេងអូលីវមិនត្រឹមតែអាចជួយកាត់បន្ថយកម្រិតជាតិខ្លាញ់មិនល្អនោះទេ ថែមទាំងជួយកាត់បន្ថយ និងគ្រប់គ្រងកម្រិតជាតិស្ករផងដែរ។ ដែលទាំងនេះសុទ្ធតែមានប្រយោជន៍សម្រាប់អ្នកដែលមានជំងឺលើសឈាម ជំងឺទឹកនោមផ្អែម និងជំនួយដល់ប្រព័ន្ធសសៃឈាមទៀតផង។  

៩. ជំនួយសុខភាពខួរក្បាល

ការទទួលទានប្រេងអូលីវ អាចជួយបង្កើនអុកស៊ីហ្សែនឱ្យកាន់តែច្រើនជាងមុនដល់ទៅ ២០% ទៅកាន់ខួរក្បាល ដែលអាចជួយទប់ស្កាត់ពីរ៉ាឌីកាល់សេរី, ការពារនិងកាត់បន្ថយជំងឺភ្លេចភ្លាំង បញ្ហាសតិអារម្មណ៍ និងជំងឺផ្លូវចិត្តផ្សេងៗ។ មិនតែប៉ុណ្ណោះថែមទាំងអាចជួយបង្កើនការចងចាំ ឱ្យមានភាពប្រសើរជាងមុនបានផងដែរ។  

ចំណាំ៖ ប្រេងអូលីវអ្នកអាចរកទិញបានដោយងាយនៅរាល់ផ្សារទំនើបនានា ជាពិសេសអ្នកគួរតែជ្រើសរើសយកប្រេងអូលីវដែលមានដាក់អក្សរថា Extra Virgin Olive Oil ទើបមានប្រសិទ្ធភាពបំផុតក្នុងការទទួលទាន និងការយកមកថែទាំសម្រស់របស់អ្នក៕