មនុស្សគ្រប់រូបសុទ្ធតែត្រូវការការប្រាស្រ័យទាក់ទងគ្នាទៅវិញទៅមក ជារឿងដែលមិនអាចចៀសផុត ហើយអ្វីដែលកាន់តែពិសេសទៅទៀតនោះគឺជាការទំនាក់ទំនងក្នុងភាពជាដៃគូតែម្តង។ ការជ្រើសរើសដៃគូដើម្បីឲ្យត្រូវជាមួយនឹងអ្នក វាជារឿងមួយដែលលំបាក ព្រោះអ្នកត្រូវចំនាយពេលជាច្រើនដើម្បីមើលចិត្តគ្នា។
អ្វីដែលកាន់តែពិបាកទៅទៀតនោះគឺ នៅពេលដែលមើលចិត្តគ្នារួចរាល់ហើយ អ្នកនៅតែមិនច្បាស់ក្នុងចិត្តទៀតថា តើមនុស្សប្រភេទបែបនោះល្អឬអត់? ដើម្បីផ្តល់ជូនជាគន្លះខ្លះៗ ថ្ងៃនេះ ខ្មែរឡូត សូមនាំយកនូវព័ត៌មានមួយដែលនិយាយអំពី តើមនុស្សប្រភេទណាដែលអ្នកមិនគួរសេពគប់? ដើម្បីឲ្យដឹងកាន់តែច្បាស់តោះអានទាំងអស់គ្នា៖
១១. មនុស្សដែលចូលចិត្តរិះគន់ត្រាំត្រែង
មនុស្សប្រភេទនេះគឺចូលចិត្តមើលពីចំនុចមិនល្អរបស់អ្នកណាស់ ហើយគេព្យាយាមនិយាយអំពីចំនុចដែលគេមិនចូលចិត្ត ដើម្បីឲ្យអ្នកធ្វើការកែប្រែតាមអ្វីដែលគេចង់បាន ដោយគេមិនខ្វល់ថាអ្នកចូលចិត្តអ្វីឡើយ។
ប្រសិនបើអ្នករាប់អានជាមួយមនុស្សប្រភេទនេះ អ្នកកំពុងតែដើរផ្លូវខុសហើយ ព្រោះថ្ងៃណាមួយអ្នកធ្វើអ្វីមិនត្រូវចិត្តគេ គេនឹងបោះបង់អ្នកចោលភ្លាម។
១០. មនុស្សដែលប្រច័ណ្ឌខុសរឿង
មានមតិមួយចំនួនលើកឡើងថា ការប្រច័ណ្ឌកាន់តែខ្លាំង បង្ហាញថាគេស្រលាញ់យើងកាន់តែខ្លាំង។ ក៏ប៉ុន្តែចូរអ្នកសាកស្រមៃបន្តិចមើលថា ប្រសិនបើគាត់ប្រច័ណ្ឌអ្នកសូម្បីតែជាមួយគ្រួសារ ជាមួយមិត្តភក្តិ ឬក៏ជាមួយអ្នកធ្វើការ តើអ្នកអាចទ្រាំបានទេ?
ការប្រច័ណ្ឌជាសញ្ញាមួយដែលបង្ហាញថាគាត់យកចិត្តទុកដាក់ចំពោះយើង តែប្រសិនបើការប្រច័ណ្ឌនោះវាខ្លាំងពេក វានឹងក្លាយជាអាវុធបំផ្លាញទំនាក់ទំនងអ្នកទៅវិញ។
៩. មនុស្សកុហកច្រើន
មនុស្សកុហកគឺចូលចិត្តនិយាយពាក្យពិរោះពិសាណាស់ ព្រោះគេគិតថាធ្វើយ៉ាងណាដើម្បីឲ្យអ្នកជឿជាក់លើគេ។
ប្រសិនបើអ្នកជួបមនុស្សដែលចូលចិត្តនិយាយល្អ ចូលចិត្តបង្ហាញការយកចិត្តទុកដាក់ខ្លាំងពេក ចូរអ្នកចំនាយពេលបន្តិចដើម្បីសង្កេតមើលគាត់ ថាតើគាត់ជាមនុស្សល្អមែន ឬក៏កុហក។
៨. ព្រះអង្គម្ចាស់ និងព្រះនាង ចូលចិត្ត ដ្រាម៉ា (Drama)
ព្រះអង្គម្ចាស់ និងព្រះនាង ដែលចូលចិត្តដ្រាម៉ា គឺគាត់មិនសូវមានការទុកចិត្តដៃគូនោះទេ។ គាត់តែងតែប្រើប្រាស់អារម្មណ៍ស្រមើស្រមៃរបស់គាត់ដើម្បីវិភាគទៅលើដៃគូរបស់គាត់។ អ៊ីចឹងហើយ នៅពេលដែលគាត់ស្រមើស្រមៃច្រើនពេក វានឹងក្លាយទៅជាការបង្កើតជាបញ្ហាទៅវិញ។
៧. មនុស្សដែលគ្មានភាពម្ចាស់ការលើខ្លួនឯង
មនុស្សប្រភេទនេះ គឺគេគ្មានភាពម្ចាស់ការលើខ្លួនគេនោះទេ គេតែងតែពឹងផ្អែកទៅលើគ្រួសារ បងប្អូន មិត្តភក្តិ ឬក៏មិត្តប្រុស មិត្តស្រីរបស់គេជានិច្ច។ ហើយប្រសិនបើគ្រប់ពេលដែលគេត្រូវការអ្នក តែអ្នកមិននៅក្បែរគេ នោះនឹងមានបញ្ហាភ្លាម។ ដូច្នេះ ចូរអ្នកសាកគិតមើលបន្តិចថា តើអ្នកតែងតែអាចនៅក្បែរគាត់បានគ្រប់ពេលទេបានទេ?
៦. មនុស្សញៀននឹងការងារ
មនុស្សប្រភេទនេះគឺគេស្រលាញ់ការងារណាស់។ គេនឹងមិនសូវខ្វាយខ្វល់ពីអ្នកប៉ុន្មាននោះទេ ដោយគេតែងតែទុកការងារគេសំខាន់ជាងអ្នកជានិច្ច។
៥. មនុស្សដែលមានធាតុផ្ទុយគ្នា (ទឹកនិងប្រេង)
ជាការពិតណាស់ មនុស្សគ្រប់រូបមិនអាចមានភាពដូចគ្នាបាននោះទេ ហើយពួកគេក៏មិនអាចនៅជាមួយគ្នាបានដែរប្រសិនបើពួកគេមានលក្ខណៈខុសគ្នាខ្លាំងពេក។ ដូចសុភាសិតខ្មែរបានលើកឡើងថា ទឹកនឹងប្រេងមិនអាចនៅជាមួយគ្នាបានទេ។
៤. មនុស្សដែលយកលុយជាធំ
មនុស្សប្រភេទនេះគឺល្អជាមួយអ្នកតែនៅពេលអ្នកមានលុយចាយឡូយឆាយនោះទេ តែប្រសិនបើអ្នកធ្លាក់ខ្លួនក្រ គេនឹងមិនស្គាល់អ្នកឡើយ។
៣. មនុស្សញៀន
មនុស្សប្រភេទនេះគឺគេមិនខ្វាយខ្វល់ពីអ្នកណាទាំងអស់ និយាយឲ្យខ្លីទៅគឺគេខ្វល់តែរឿងស្រា បារី ថ្នាំ។ល។ ដូច្នេះ ប្រសិនបើអ្នកសេពគប់ជាមួយមនុស្សប្រភេទនេះ អ្នកច្បាស់ជារងទុក្ខធ្ងន់ហើយ។
២. មនុស្សអាត្មានិយម
មនុស្សប្រភេទនេះគឺគេគិតតែពីខ្លួនឯងទេ ហើយពេលខ្លះសូម្បីតែខ្លួនឯងក៏គេមិនសូវខ្វល់ប៉ុន្មានដែរ។ ដូច្នេះហើយ វាគ្មានហេតុផលអ្វីដែលគេត្រូវចំនាយពេលខ្វាយខ្វល់ពីអ្នកឡើយ។
១. មនុស្សចូលចិត្តតាមដានអ្នក
មនុស្សប្រភេទនេះគឺគេមិនទុកចិត្តអ្នកនោះទេ ព្រោះថាគេតែងតែតាមដានអ្នក សូម្បីតែសារ ការនិយាយទូរស័ព្ទ វេបសាយដែលអ្នកចូលមើល ឬក៏កិច្ចការអ្វីដែលអ្នកបានធ្វើ គឺគាត់តាមដាន និងចង់ដឹងទាំងអស់។
វាមិនខុសអ្វីទេដែលគ្រាន់តែធ្វើបែបនេះ តែដល់ពេលយូរៗទៅ អ្នកនឹងមានអារម្មណ៍ថាធុញមិនអាចទទួលយកបាន ព្រោះអ្នកគិតថា អ្នកគ្មានភាពជាឯកជនឡើយ ពេលនោះចំណងមិត្តភាពរបស់អ្នកនឹងប្រេះឆា។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]