រាជធានីភ្នំពេញ ៖ មកទល់ពេលនេះ សិស្សគុន និងគ្រូគុនល្បុក្កតោ នៅតែបន្តអំពាវនាវ បន្ទាប់ពីសិស្សគុនរបស់ខ្លួនកញ្ញាពេជ្រ ចរណៃ ដែលមុនធ្លាក់ខ្លួនឈឺធ្ងន់ នាងក៏ជាតារាសម្ដែងមួយរូបផង និងជាសមាជិករបស់គ្រួសារតារាកម្ពុជាផង ដើម្បីស្វែងរកសប្បុរសជនមានទឹកចិត្តសប្បុរសឱ្យជួយសង្គ្រោះជីវិតនាងនៅក្នុងពេលនេះ ។
សាលាគុនល្បុក្កតោបានបន្តបង្ហោះវីដេអូកាន់តែច្រើន សុំឱ្យអ្នកមានប្រាក់កាសជួយផ្ដល់កម្រៃវះកាត់ជំងឺបេះដូងប្រហោង និងជំងឺដាច់សរសៃប្រើសបេះដូងក្នុងកម្រិតធ្ងន់ចុងក្រោយរបស់នាង ដែលជំងឺនេះបើគ្មានលទ្ធភាពវះកាត់ទាន់ពេលវេលាទេនឹងប្រឈមគ្រោះថ្នាក់ដល់អាយុជីវិតក្នុងពេលដ៏ខ្លីមិនខាន ។
ដំណឹងចុងក្រោយដែលទើបទទួលបានពីប្រទេសថៃ គឺតារាសម្ដែងកញ្ញាពេជ្រ ចរណៃ មិនមានលទ្ធភាពវះកាត់បេះដូងតាមការទាមទាររបស់គ្រូពេទ្យជំនាញនោះទេ ដោយសារតែពេទ្យបេះដូងនៅក្នុងទីក្រុងបាងកក បានកំណត់តម្លៃវះកាត់ជួសជុលសរសៃប្រើសបេះដូងរបស់នាង និងព្យាបាលជំងឺបេះដូងប្រហោងផងរហូតដល់ជិត៤ម៉ឺនដុល្លារ ដែលមកដល់ពេលនេះមិនទាន់មានសប្បុរសជនណាមួយហ៊ានចេញមុខជួយនាងនៅឡើយ ។
នាងត្រូវបានម្ដាយបញ្ជាក់ថា បានចាកចេញពីមន្ទីរពេទ្យធំនៅទីក្រុងបាងកក ហើយមកសម្ងំរស់នៅកន្លែងមួយស្ថិតនៅជាយក្រុង ដោយទទួលយកថ្នាំពន្យារជីវិតសិន ដើម្បីរង់ចាំដំណឹងពីខាងផលិតកររបស់ផលិតកម្មទេពនិករ ដែលនាងថតកុនឱ្យមិនទាន់ចប់ ហើយបានប្រកាសថានឹងរកអ្នកមានលុយជួយនាងឱ្យបានវះកាត់នោះ។
អ្នកស្រីសុជាតា ម្ដាយរបស់ពេជ្រ ចរណៃ និយាយថា កូនស្រីរបស់អ្នកស្រីមិនអាចបន្តស្នាក់នៅក្នុងមន្ទីរពេទ្យធំបេះដូងរបស់ប្រទេសថៃបានទៀតទេ ដោយសារតែការស្នាក់នៅ និងការចំណាយគឺមានចំនួនច្រើន មិនអាចទប់ទល់បាន។
ជាក់ស្ដែងគ្រាន់តែចូលពិនិត្យ និងប្រឹក្សាជាមួយគ្រូពេទ្យជំនាញគឺអស់ប្រមាណជាង១ពាន់ដុល្លារទៅហើយដែលប្រាក់នោះទទួលបានពីសប្បុរសជនមុនពេលនាងចាកចេញទៅថៃទើបនាង និងម្ដាយសម្រេចចិត្តសុំថ្នាំលេបពន្យារជីវិតសិនក្នុងពេលដំណឹងលុយវះកាត់មិនទាន់មាននៅឡើយ ។
អ្នកស្រីនិយាយថា ផលិតកម្មទេពនិករ ដែលបានជំរុញឱ្យអ្នកស្រីយកកូនទៅដល់ថៃសិននឹងផ្ញើលុយសប្បុរសជនទៅជួយតាមក្រោយនោះ នៅមិនទាន់អាចរកសប្បុរសជនណាមួយមកជួយកូនស្រីសម្រាប់ការវះកាត់នៅឡើយទេ ទើបអ្នកស្រី និងកូនស្រីកាន់តែអស់សង្ឃឹម ។
អ្នកស្រីនិយាយថា គ្រូពេទ្យតម្រូវឱ្យលេបថ្នាំពន្យារស្ថានភាពជំងឺមួយរយៈពេលខ្លី តែបើលេបដល់កំណត់ហើយនៅតែគ្មានប្រាក់កាសវះកាត់ទៀតគឺមិនខុសពីអស់សង្ឃឹមនោះទេ ក្នុងពេលដែលគ្រួសារអ្នកស្រីមិនមានលទ្ធភាពស្វែងរកប្រាក់ប្រមាណជា៤ម៉ឺនដុល្លារមកចំណាយលើការវះកាត់នោះបាន ។
អ្នកស្រីមានក្ដីរំពឹងតែមួយគត់ គឺនឹងទទួលបានថវិកាជំនួយពីការស្វះស្វែងរបស់ម្ចាស់ផលិតកម្មទេពនិករ តែបើគ្មាននោះទេ គឺមិនដឹងថាស្ថានភាពលេបថ្នាំពន្យារជីវិតនឹងអាចបន្តដល់ពេលណាទេ ។
គួរបញ្ជាក់ថា មកទល់ពេលនេះ តារាសម្ដែងកញ្ញា ពេជ្រ ចរណៃ បានត្រឹមទទួលជំនួយតិចតួចពីសប្បុរសជនប៉ុណ្ណោះដែលថវិកាទាំងនោះ គឺបានជួយឱ្យនាងបានចេញទៅព្យាបាលដោយលេបថ្នាំនៅក្នុងប្រទេសថៃ ហើយធូរស្រាលស្ថានភាពចុក និងថប់ដង្ហើម ដែលរាល់ពេលធ្វើទុក្ខ គឺស្ទើរតែធ្វើឱ្យនាងដាច់ខ្យល់ម្ដងៗទៅហើយ ។
ក្នុងនោះគ្រួសារតារាកម្ពុជាបានប្រមែប្រមូលកម្លាំងសប្បុរសធម៌ជួយនាងបានប្រមាណជិត២ពាន់ដុល្លារ ដោយលើកទី១ប្រគល់ឱ្យម្ដាយរបស់នាងមុនចេញទៅថៃបានចំនួន១.១៤០ដុល្លារ និង១៥ម៉ឺនរៀល និងលើកទី២ដែលមិនទាន់ប្រគល់ឱ្យនៅឡើយមានចំនួន៦៤៥ដុល្លារ និង២៨ម៉ឺនរៀល ដែលថវិកាទាំងនោះបានត្រឹមតែទប់ក្នុងការចំណាយរបស់នាងនៅក្នុងប្រទេសថៃប៉ុណ្ណោះ។
នៅលើហ្វេសប៊ុករបស់សាលាគុនល្បុក្កតោបានអះអាងថា កញ្ញាពេជ្រ ចរណៃ គឺជាកីឡាការិនីល្បុក្កតោជាច្រើនឆ្នាំមកហើយ ហើយបើទោះជានាងមានជំងឺបេះដូងប្រហោងតាំងពីអាយុ៧ឆ្នាំ ក៏នាងនៅតែបន្តការប្រឹងប្រែងហ្វឹកហាត់រហូតក្លាយខ្លួនជាកីឡាការិនីដែលមានទេពកោសល្យម្នាក់នៅក្នុងពិភពល្បុក្កតោដែរ ។
គ្រូគុននៅក្នុងសហព័ន្ធបានអះអាងថា ពេជ្រ ចរណៃ គឺជាកីឡាការិនីដែលមានស្នាដៃនៅក្នុងពិភពល្បុក្កតោមិនខុសគ្នាពីកីឡាករ និងកីឡាការិនីភាគច្រើននោះទេ ប៉ុន្តែមកពីនាងមិនសូវចេញមុខនៅលើបណ្ដាញសារព័ត៌មានទើបនាងមិនសូវល្បីឈ្មោះដូចគ្នានឹងកីឡាការិនីសម ថារ័ត្ន តែបែរជាមានការចាប់អារម្មណ៍ក្រោយពេលនាងក្លាយជាតារាសម្ដែងក្នុងឈុតវាយតប់ជំនួសវិញ ។
នាងក៏មានស្នាដៃធ្លាប់ប្រកួតក្នុងព្រឹត្តិការណ៍ធំៗក្នុងស្រុក និងបានចេញសម្ដែងនៅក្នុងសកម្មភាពរបស់សហព័ន្ធល្បុក្កតោនាពេលកន្លងមកផងដែរ ទើបនាងបានក្លាយជាសិស្សគុនល្បុក្កតោមួយរូបដែលមានការចាប់អារម្មណ៍ច្រើនពីក្រុមផលិតករភាពយន្ត ដែលចង់បានតួសម្ដែងជាអ្នកចេះក្បាច់គុន ហើយមានសម្រស់ស្រស់ស្អាត ។
នាងក៏ជារៀមច្បងម្នាក់ និងជាគ្រូបង្ហាត់ដល់អ្នកជំនាន់ក្រោយមុនពេលធ្លាក់ខ្លួនឈឺធ្ងន់ផងដែរ ទើបគេឃើញកីឡាករកីឡាការិនីច្រើនឡើងនៅក្នុងសហព័ន្ធកីឡាល្បុក្កតោកម្ពុជាបានអំពាវនាវស្វែងរកថវិកាជួយនាងដើម្បីឱ្យនាងមានលទ្ធភាពបានវះកាត់នៅក្នុងដំណាក់កាលធ្ងន់ធ្ងរនេះ ។
យ៉ាងណាមិញ នាងទទួលបានថវិកាជំនួយតិចតួចទើបនាងមានលទ្ធភាពបានចូលពិនិត្យពេទ្យថៃ និងទទួលបានត្រឹមថ្នាំពន្យារជីវិតប៉ុណ្ណោះ ប៉ុន្តែស្ថានភាពចុងក្រោយ គឺនាងមិនអាចបន្តលេបថ្នាំពន្យារជីវិតបានយូរទៀតទេ ដោយសារតែសរសៃប្រើសបេះដូងរបស់នាងមានសភាពដាច់ខ្លាំងបណ្ដាលឱ្យមានឈាមច្រាលតាមមាត់តាមច្រមុះ និងថប់ដង្ហើមចង់ស្ទះម្ដងៗរាល់ពេលធ្វើទុក្ខ។
អ្នកស្រីសុជាតា និយាយថា ពេជ្រ ចរណៃ គឺជាកូនស្រីទី២ និងជាមេគ្រួសារតាំងពីនាងបានចូលហ្វឹកហាត់ធ្វើជាសិស្សគុនរបស់សហព័ន្ធល្បុក្កតោនោះម្ល៉េះ ដោយសារតែគ្រួសារអ្នកស្រីក៏មានជីវភាពខ្វះខាតអត់ផ្ទះសម្បែងនាពេលចុងក្រោយ ។
អ្នកស្រីថា ស្វាមីរបស់អ្នកស្រីបានពុលដំឡូងស្លាប់កាលពីពេជ្រ ចរណៃ អាយុបាន៧ឆ្នាំ ហើយប៉ុន្មានឆ្នាំក្រោយមកអ្នកស្រីក៏មានជំងឺដុះសាច់ក្នុងខួរក្បាល គ្រាន់តែមើលខ្លួនទម្រាំបានធូរដូចរាល់ថ្ងៃ គឺអស់ផ្ទះមួយកន្លែង។
យ៉ាងណាមិញអ្នកស្រីប្រកាស បើពេជ្រ ចរណៃ មិនមានជំងឺធ្ងន់ធ្ងរបែបនេះ គឺអ្នកស្រី និងកូនពិតជាអាចរស់បាន ដោយសារតែអ្នកស្រីក៏បានជួលផ្ទះគេបើកលក់ដូរកន្លងមក និងចុងក្រោយគឺបានជួលផ្ទះគេបើកហាងអ៊ុតសក់ បើទោះជាហាងមួយនេះត្រូវបានផ្អាកក្រោយពេលបញ្ជូនពេជ្រ ចរណៃ ទៅព្យាបាលនៅទីក្រុងបាងកកប្រទេសថៃក្តី ។
អ្នកស្រីនិយាយថា ត្រឹមតែការហូបចុក គ្រួសាររបស់អ្នកស្រីគឺអត់ពិបាកនោះទេ ដោយសារតែពេជ្រ ចរណៃ ក៏បង្វឹកល្បុក្កតោមានចំណូលបានខ្លះ ហើយទទួលបានឱកាសថតស្ពត និងថតកុនបានលុយជាប្រចាំច្រើនដែរ ។ ប៉ុន្តែស្ថានភាពរស់នៅគឺស្មុគស្មាញខ្លាំង ដោយសារតែកូនស្រីដែលជាមេបង្គោលគ្រួសារធ្លាក់ខ្លួនឈឺធ្ងន់នោះតែម្ដង ។
អ្នកស្រីបន្តថា ពេជ្រ ចរណៃ ត្រូវបានគ្រូពេទ្យហាមតាំងពីតូចថាមិនឱ្យប្រើកម្លាំងខ្លាំង ឬធ្វើសកម្មភាពខ្លាំងនោះទេ ប៉ុន្តែដោយសារតែនាងស្រឡាញ់កីឡាល្បុក្កតោ ហើយទំនងជាបានប្រឹងប្រែងហ្វឹកហាត់តាំងពីបានក្លាយជាសិស្សគុនល្បុក្កតោខ្លាំងពេកក្នុងប៉ុន្មានឆ្នាំចុងក្រោយផង ទើបធ្វើឱ្យជំងឺបេះដូងប្រហោងតាំងពីតូចរបស់នាង ឈានដល់ដាច់សរសៃប្រើសបេះដូងហើយប្រឈមនឹងគ្រោះថ្នាក់ធ្ងន់ ។
អ្នកស្រីបន្តថា ពេជ្រ ចរណៃ នឹងមានសភាពធ្ងន់បើការលេបថ្នាំពន្យារជីវិតនៅតែមិនមានលទ្ធភាពវះកាត់ដែលគ្រោងចំណាយប្រមាណជា៤ម៉ឺនដុល្លារតាមការបញ្ជាក់របស់គ្រូពេទ្យជំនាញ ។
យ៉ាងណាមិញ អ្នកស្រីសង្ឃឹមថាម្ចាស់ផលិតកម្មទេពនិករ ដែលនាងបានថតរឿង «អាគមស្បែកដាច់» ឱ្យ និងបានធានាថានឹងជួយនាងឱ្យមានសប្បុរសជនផ្ដល់ការបរិច្ចាគជួយដល់កូនស្រីនោះ នឹងអាចរកបានអ្នកមានចិត្តធម៌សប្បុរសដើម្បីជួយសង្គ្រោះជីវិតចុងក្រោយនៅក្នុងពេលនេះ ដើម្បីឱ្យនាងបានបន្តអាជីពជាកីឡាការិនីផ្នែកល្បុក្កតោ និងតារាសម្ដែងដែលនាងស្រឡាញ់តាំងពីតូច ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
