រាជធានីភ្នំពេញ ៖ ក្នុងពិធីបុណ្យខួបគម្រប់៧ថ្ងៃរបស់តារាចម្រៀងសាន ស្រីឡៃ ដែលរៀបចំឡើងនៅវត្តទួលទំពូងកាលពីល្ងាចថ្ងៃទី២១ តុលា ឆ្នាំ២០១៧ ម្តាយរបស់នាងបានបញ្ជាក់ពីបញ្ហាមួយចំនួនដែលបន្សល់ទុក ។
អ្នកស្រីជាម្តាយឲ្យដឹងថា គាត់ និងសាន ស្រីឡៃ កន្លងមករស់នៅផ្ទះខ្លួនឯង តែស្ថិតនៅលើដីសហគមន៍ក្នុងភូមិ១ សង្កាត់សែនសុខមិនដឹងថាពេលណាគេឱ្យរើចេញទេ ។ សាន ស្រីឡៃ បានទិញរថយន្តមួយគ្រឿងបង់រំលស់ក្នុងមួយខែជាង៤០០ដុល្លារ ។ រឿងនេះស្ត្រីជាម្តាយមិនដឹងដោះស្រាយបែបណាទេព្រោះស្រីឡៃ បាត់បង់ជីវិតទៅហើយ ។ អ្វីដែលគួរលៃលកគឺមានតែផ្ទេរឱ្យកូនស្រីប្អូន ហើយសុំសងគេក្នុង១ខែជាង១០០ដុល្លារ។
ចំពោះសុខភាពអ្នកស្រីជាម្តាយសាន ស្រីឡៃ នៅមិនទាន់ប្រសើរឡើយ គឺនៅឈឺក្បាលម្តងម្កាលកន្លែងអតីតប្តីកាប់ចំថ្ងាស និងដៃពិការនៅឈឺព្រោះដែកមិនទាន់វះយកចេញវិញ ។ បើវះគាត់ត្រូវសម្រាកមួយខែទៅពីរខែ ដូច្នេះហើយមិនអាចរកស៊ីបាន ។
ម្តាយសា ស្រីឡៃ ស្ទើរតែមិនជឿថាគ្រួសារគាត់ជួបប្រទះមហាទុក្ខបែបនេះ ។ គាត់រំឭកថា ផ្ទះនៅប៉ោយប៉ែតលក់អស់ហើយ។ ចំណែកសាន ស្រីឡៃ មានហាងអ៊ុតសក់នោះ គឺជាហាងជួលគេប៉ុណ្ណោះ ។ នៅប៉ោយប៉ែតស្រីឡៃ ធ្លាប់ខ្ចីលុយធនាគារទិញដីធ្វើផ្ទះ តែសម្រេចចិត្តលក់ផ្ទះនោះវិញយកបង់ធនាគារអស់ហើយ ។
ពាក់ព័ន្ឋនឹងការលើកឡើងថា សាន ស្រីឡៃត្រូវប្តីដែលសម្លាប់នោះជួយឧបត្ថម្ភទ្រព្យសម្បត្តិនិងលុយកាក់ច្រើន តែអ្នកស្រីជាម្តាយថាមិនពិតទេ ។ «សម្រាប់ខ្ញុំជាម្តាយ ពាក្យណានិយាយពិតគឺពិត មិនពន្លើសអ្នកណាទេ ។ នៅប៉ោយប៉ែតស្រីឡៃ ចង់បើកកន្លែងអ៊ុតសក់ ខ្ញុំជាម្តាយយកប្លង់ដីដាក់អង្គការយកលុយបើកហាងអស់៥០០០ដុល្លារ ។ ពេលមានកូនចៅ ប្តីស្រីឡៃជួយចិញ្ចឹមធម្មតា ហើយបានទាំងទិញដីនៅប៉ោយប៉ែតចែកឱ្យកូនប្រុសទាំង២បានម្នាក់មួយឡូត៍ តែដល់ពេលប្តីស្រីឡៃថាអត់លុយក៏សម្រេចចិត្តលក់ដីដែលចែកឱ្យកូននោះអស់ទាំង២ឡូត៍វិញ ។ គេថាស្រីឡៃបានប្តីមន្ត្រីគយពិតជាធូរធារ អ្នកនិយាយបានតែនិយាយ គេមិនដឹងច្បាស់ជាងក្រុមគ្រួសារខ្ញុំទេ ។
កូនខ្ញុំតាំងពីបានប្តីមកគ្នាទ្រាំ ហើយចេះតែថ្ងូរប្រាប់ខ្ញុំថា ពិបាកណាស់ម៉ាក់អើយ! មិនដឹងគិតយ៉ាងណានោះទេ លែងក៏ទារសម្លាប់ មិនលែងក៏រស់នៅវេទនា ។ មិនដឹងធ្វើបែបណាជួយកូនបានបើខ្ញុំពិការទៀត ក្តីប្រច័ណ្ឌនោះ ខ្លាំងៗទាល់តែអស់កូនស្រីជាបង្គោលគ្រួសាររបស់ខ្ញុំផុតពីលោកនេះ ។
តាំងពីទាក់ទងជាមួយស្រីឡៃមកប្រពន្ឋដើមមិននិយាយអ្វីទាំងអស់ ហើយប្តីស្រីឡៃក៏លាក់ស្រីឡៃថា អត់មានប្រពន្ឋ ទាល់តែស្រីឡៃមានទម្ងន់បានប្រាប់ តែមានប្រពន្ឋ និងកូន៤នាក់ ។
សរុបទៅការសម្លាប់ស្រីឡៃ ព្រោះតែការបែងចែកទ្រព្យសម្បត្តិជារឿងមិនពិតនោះទេ ។ ទ្រព្យមានពីប្តី គឺដីឡូត៍ចែកកូនបានម្នាក់១ក្បាល៤បណ្តោយ២០ម៉ែត្រ ស្រីឡៃអររំភើប តែលក់វិញ ពោលគឺអស់ហើយ ។ កាលនៅជាប្តីប្រពន្ឋដំបូងស្រីឡៃបានប្តីឱ្យមួយថ្ងៃបួនដប់ម៉ឺនចាត់ចែងតម្រូវការ ហើយកូនគ្នាអរព្រោះថា គ្នាបានប្តីចិញ្ចឹមប៉ុណ្ណឹងច្រើន ។ ពីមុនអត់ទើបគ្នាគិតថាប្តីនេះជាបង្គោលសំខាន់ ។ យ៉ាងណាពេលនេះគ្នាទៅបាត់គ្មានវិលទេ»។
អ្នកស្រីជាម្តាយរបស់សាន ស្រីឡៃ ចង់រកកន្លែងមានមនុស្សច្រើនដើម្បីលក់បបរ និងបាយគុយទាវព្រោះសព្វថ្ងៃលក់នៅទីតាំងសហគមន៍ ។
ការជួយរបស់ពេជ្រ សោភា និងផលិតកម្មហង្សមាស អ្នកស្រីជាម្តាយសាន ស្រីឡៃ ចាត់ទុកជាមហាគុណសម្រាប់ក្រុមគ្រួសារអ្នកស្រីគ្រាមានទុក្ខលំបាក ។ ចំពោះបច្ច័យបុណ្យដែលសេសសល់អ្នកស្រីជាម្តាយនឹងយកទុកនៅធនាគារដើម្បីដោះស្រាយគម្រោងជាច្រើនទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]