រាជធានីភ្នំពេញ ៖ ការបាញ់សម្លាប់តារាចម្រៀង សាន ស្រីឡៃ ពីសំណាក់បុរសជាអតីតស្វាមី រួចឃាតកបានបញ្ចប់ជីវីតដោយបាញ់សម្លាប់ខ្លួនឯង បណ្តាលឲ្យដេកស្លាប់ក្នុងថ្លុកឈាមទន្ទឹមគ្នា បានធ្វើឲ្យមានការចាប់អារម្មណ៍ និងរំជើបរំជួលជាខ្លាំងពីមជ្ឈដ្ឋានទូទៅ។ ហើយម្នាក់ៗបានចោទសួរថា តើ មូលហេតុអ្វី បានធ្វើឲ្យជីវីតស្នេហា របស់តារាចម្រៀងរូបនោះបានបញ្ចប់ជីវិត ដោយគ្រាប់កាំភ្លើងបន្សល់ទុកកូនប្រុស២នាក់ឲ្យនៅកំព្រាឯកាបែបនេះ។
តារាចម្រៀង សាន ស្រីឡៃ មានអាយុពិតប្រាកដ២៦ឆ្នាំ ត្រូវបានឃាតកដែលជាអតីតស្វាមីឈ្មោះ ជ័យ រិន ជាមន្ត្រីគយ និងរដ្ឋាករ បាញ់សម្លាប់ចំនួន៣គ្រាប់ នៅក្នុងមន្ទីរសម្រាកព្យាបាល វ៉ាយតាឡុងហ្គា ដែលជាគ្លីនិក កែកែសម្ជស្ស មានទីតាំងស្ថិតនៅផ្ទះលេខ៥២អា ផ្លូវលេខ៣៦០ កែវផ្លូវ៥៧ ក្នុងសង្កាត់បឹងកេងកងទី១ ខណ្ឌចម្ការមន។បន្ទាប់ពីបាញ់សម្លាប់នាង សាន ស្រីឡៃ ឃាតកដែលជាអតីតស្វាមី ក៏បានបាញ់សម្លាប់ខ្លួនឯងមួយគ្រាប់ចំក្បាលបណ្តាលឲ្យដេកស្លាប់ទន្ទឹមគ្នា។ ហេតុការណ៍ បង្កឲ្យមានការភ្ញាក់ផ្អើលកាលពីវេលាម៉ោង ៣និង៤៥នាទី រសៀលថ្ងៃទី១៦ ខែតុលា ឆ្នាំ២០១៧។
ការបាញ់សម្លាប់តារាចម្រៀងរូបនោះ ត្រូវបានគេដឹងថា បន្ទាប់ពីបុរសជាប្តីបានលួងលោមសុំរស់នៅជាមួយគ្នា តែនាងមិនព្រម ហើយក៏បានបញ្ចប់ទាំង២នាក់តែម្តង។ សពអ្នកនាង សាន ស្រីឡៃ ត្រូវបានក្រុមគ្រួសារបញ្ជូនទៅតម្កល់ធ្វើបុណ្យ នៅវត្តសែនសុខ ស្ថិតនៅ ភូមិសែនសុខទី១ សង្កាត់ឃ្មួញ ខណ្ឌសែនសុខ ដោយមានការជួយជ្រោមជ្រែង ចាត់ចែង រៀបចំធ្វើបុណ្យ ដោយក្រុមហ៊ុន ហង្សមាស និងអ្នកនាង ចន ច័ន្ទលក្ខិណា ប្រធានសមាគមន៍សិល្បៈខ្មែរ។
ចំណែកសពអតីតស្វាមី ត្រូវបានបញ្ជូនទៅធ្វើបុណ្យនៅស្រុកកំណើត នៅភូមិ ពានី ឃុំល្វា ស្រុកព្រះស្តេច ខេត្តព្រៃវែង។ តាមព័ត៌មានឲ្យដឹងថា នៅព្រឹកថ្ងៃ ទី១៧ ខែតុលានេះ នៅក្នុងវត្តសែនសុខ គូរឲ្យសង្វេគណាស់ បងប្អូនក្រុមគ្រួសារស្ត្រីមេម៉ាយម្នាក់ ដែលជាម្តាយតារាចម្រៀង សាន ស្រីឡៃ បានយំសោកអោបមឈូសកូនស្រី ហើយរៀបរាប់ដោយក្តីក្តុកក្តួលថា «ការបាត់បង់កូនស្រី គឺជាការបាត់បង់មេគ្រួសារមួយ ដែលជាជំហររឹងមាំរ៉ាប់រង ក្នុងការជួយចិញ្ចឹមកូនប្រុស និងប្អូន ស្រីតូចឲ្យរៀនសូត្រ។
ស្ថិតក្នុងស្ថានភាពសោកសង្រេងនេះ ម្នាក់ៗរួមជាមួយអ្នកសិល្បៈ អ្នកសារព័ត៌មាន ក៏ទប់ចិត្តមិនបាន បានសម្រក់ទឹកភ្នែកជាមួយក្រុមគ្រួសារ និងបងប្អូនរបស់តារាចម្រៀង។ ដោយឡែកកូនប្រុស២នាក់ ដែលពុំទាន់ដឹងទាន់ដឹងក្តី ក៏បានស្រក់ទឹកភ្នែកជាមួយម្តាយមីង និងជីដូនផងដែរ។
នៅព្រឹកនោះដែរ ក៏មានអ្នកសិល្បៈរួមជាមួយមិត្តភក្តិរួមអាជីពបាននាំគ្នាទៅចូលបុណ្យរំលែកទុក្ខដល់សពតារាចម្រៀងទាំងក្តីត្តុកក្តួល។ អ្នកនាង ចនច័ន្ទ លក្ខិណា ក៏ដូចជាក្រុមកាងាររបស់ផលិតកម្ម រស្មីហង្សមាស បានឲ្យដឹងថា ស្ថានភាពគ្រួសាររបស់តារាចម្រៀង សាន ស្រីឡៃ លំបាកណាស់ កុំតែបានការជួយជ្រោមជ្រែងពីក្រុមហ៊ុន ហង្សមាសទេ។ តាមព័ត៌មានឲ្យដឹងទៀតថា នៅពេលបច្ចុប្បន្ននេះ សាន ស្រីឡៃ កំពុងតែថតចម្រៀងអាល់ប៊ុមថ្មី គ្រោងនឹងចេញនៅពេលឆាប់ៗនេះ។
ស្ថិតក្នុងទឹកមុខស្រងូតស្រងាត់ ស្ត្រីម៉េម៉ាយឈ្មោះ ឡុង ចាន់ធី អាយុ៤៦ឆ្នាំ ត្រូវជាម្តាយ បានឲ្យដឹងថា គាត់ជាស្រីម៉េម៉ាយមានកូនស្ត្រីចំនួន៤នាក់ ដែល សាន ស្រីឡៃ មានអាយុពិត២៦ឆ្នាំ មានស្រុកកំណើតនៅភូមិទួលប្រសាទ ឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ ជាកូនច្បងក្នុងចំណោមបងប្អូនស្រី៤នាក់ ដែលប្អូនស្រីពៅមានអាយុ១០ឆ្នាំ។ តាមស្ត្រីជាម្តាយបានឲ្យដឹងទៀតថា ខ្សែជីវីតកូនស្រី សាន ស្រីឡៃ កម្សត់ណាស់ លំបាកវេទនាណាស់តាំងពីតូច ហើយរកស៊ីចិញ្ចឹមគាត់ជាម្តាយតាំងពីអាយុ១២ឆ្នាំរហូតដល់ធំពេញវ័យ។
តាំងពីតូច សាន ស្រីឡៃ ដើរធ្វើក្រចក និងដើរច្រៀងតាមរោងការ ដើម្បីរកប្រាក់ចិញ្ចឹមម្តាយ និងប្អូនៗតូច។ នៅពេលធំពេញវ័យ សាន ស្រីឡៃ មានទំនាក់ទំនងស្នេហាជាមួយបុរសម្នាក់ឈ្មោះ ជ័យ រិន ជាមន្ត្រីគយ និងរដ្ឋាករប្រចាំច្រទ្វារប៉ោយប៉ែត ដែលបុរសរូបនោះអះអាងថា ជាបុរសពោះប៉ាយ មានកូនចំនួន៤នាក់។
ក្នុងដំណើរជីវិតស្នេហា មន្ត្រីគយ និងរដ្ឋាកររូបនោះក៏បានទិញដីធ្វើផ្ទះនាំគ្នាសាងស្នេហ៍ក្នុងផ្ទះថ្មីស្ថិតនៅក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ នៅក្នុងឆ្នាំ២០១៦ នាង សាន ស្រីឡៃ ក៏បានមកដាក់ពាក្យប្រលងក្នុងកម្មវិធី The Voice Cambodia រដូវកាលទី២ និងជាកូនក្រុមរបស់អ្នកនាង ពេជ្រ សោភា ហើយក៏មានឈ្មោះបោះសំឡេងរួមនឹងរួបសម្បត្តិស្រស់សោភា ប្រុសណាក៏ប៉ងប្រាថ្នា ជាហេតុធ្វើឲ្យជីវិតស្នេហាប្តីប្រពន្ធរង្គោះរង្គើដែលផ្តើមឡើងពីរឿងប្រចណ្ឌ។
តាមស្ត្រីជាម្តាយ បានឲ្យដឹងទៀតថា កូនស្រីគាត់ និងឈ្មោះ ជ័យ រិន បានរស់នៅជាមួយគ្នាជាប្តីប្រពន្ធ រយៈពេលប្រមាណជិត១០ឆ្នាំ បានកូនប្រុសចំនួន២នាក់ ដែលកូនច្បងអាយុ៨ឆ្នាំ និងកូនប្អូនអាយុ៤ឆ្នាំ។
ការរស់នៅជាមួយ គ្នា មួយរយៈចុងក្រោយ មិនសូវត្រូវគ្នានោះទេដោយសារតែប្រចណ្ឌ ហើយពួកគេក៏បានបែកផ្លូវលែងលះគ្នាប្រមាណ១ឆ្នាំ តែមិនទាន់ដាច់ស្រេចនៅឡើយ។ លុះក្រោយមកប្តីបានមកសុំជាគ្នាវិញតែកូនស្រីមិនព្រម។ ទន្ទឹមនោះប្តីក៏បានបោះពាក្យគំរាមកំហែង មិននឹកស្មានថា ចិត្តដាច់បាញ់សម្លាប់ប្រពន្ធស្លាប់ចោលកូន២នាក់បែបសោះ។
លោកស្រី ឡុង ចាន់ធី បានរៀបរាប់ទាំងទឹកភ្នែកថា ខ្សែជីវីតគាត់ និងកូនស្រីដូចគ្នា រស់នៅលំបាក់វេទនាជួបតែរឿងបែកបាក់គ្រួសារ ព្រោះតែប្រចណ្ឌ ហើយគាត់ជាម្តាយក៍ត្រូវបានប្តីកាប់សម្លាប់រហូតដល់ពិការដៃ។
ស្ត្រីជាម្តាយបានរៀបរាប់ពីជីវិតកម្សត់ឲ្យដឹងថា បន្ទាប់ពីបែកបាក់គ្រួសារ បន្សល់ទុកនូវកូនស្រីកំព្រា៤នាក់ ក្រោយមកគាត់បានប្តីក្រោយ ព្រោះតែប្រចណ្ឌគាត់ក៏បានប្តីកាប់ពិការដៃ ហើយក៏បានបែកបាក់គ្រួសារ ក៏បាននាំកូនស្រីមករស់នៅផ្ទះលេខ១៩១ ផ្លូវលេខ២៣០ ភូមិសែនសុខទី១ សង្កាត់ឃ្មួញ ខណ្ឌសែនសុខ ដោយប្រកបមុខរបស់លក់បបរ និងបាយនៅមុខផ្ទះ។
តាមតាអាចារ្យបានឲ្យដឹងថា សពតារាចម្រៀង សាន ស្រីឡៃ ត្រូវបានបូជានៅវេលាម៉ោង៩ព្រឹកថ្ងៃទី១៨ ខែតុលា ដោយធ្វើមេនបូជា នៅមុខវត្តសែនសុខតែម្តង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
