រាជធានីភ្នំពេញ ៖ បុរស៤នាក់បានស្លាប់នៅក្នុងអណ្តាតភ្លើង ក្នុងនោះមានម្នាក់ជាថៅកែ ខណៈពួកគេកំពុងដេកលង់លក់ក្នុងដំណេកយ៉ាងស្កប់ស្កល់ ដោយចាក់សោទ្វារជាប់ខាងក្នុង ដែលផ្ទះថ្មមានកំពស់២ជាន់កន្លះ រងការខូចខាតយ៉ាងខ្លាំង និងសម្ភារៈខាងក្នុងអស់ទាំងស្រុងផងដែរ កើតឡើងកាលពីវេលាម៉ោង១១យប់ថ្ងៃទី១៦ តុលា ស្ថិតហាងលក់កុំព្យូទ័រយីហោ អេស ធី ស៊ី (SCT COMPUTER) ផ្ទះលេខ៣B ផ្លូវលេខ៧០ ក្នុងសង្កាត់ស្រះចក ខណ្ឌដូនពេញ ។
ប្រភពពីមន្ត្រីអាជ្ញាធរមូលដ្ឋានបានឱ្យដឹងថា ជនរងគ្រោះដែលស្លាប់ទាំង៤នាក់ ១-ឈ្មោះសន ទិត អាយុ២៩ឆ្នាំ (ជាថៅកែ) មានស្រុកកំណើតនៅក្រុងសួង ខេត្តត្បូងឃ្មុំ ២-ឈ្មោះអ៊ុត សារៀង អាយុ៣២ឆ្នាំ មានស្រុកកណើតនៅភូមិកាប៉ូ ឃុំអូឬស្សី ស្រុកក្រចេះ ខេត្តក្រចេះ ៣-ឈ្មោះគា ចន្ថា អាយុ២៣ឆ្នាំ មានស្រុកកំណើតនៅក្រុងសួង ខេត្តត្បូងឃ្មុំ និងទី៤-ឈ្មោះ យ៉េន គន្ធា អាយុ២៤ឆ្នាំ មានស្រុកកំណើតនៅភូមិសែត ឃុំសែត ស្រុកកំពង់រោទិ៍ ខេត្តស្វាយរៀង ។
មុនពេលកើតហេតុ ប្រជាពលលរដ្ឋដែលរស់នៅក្បែរខាង ជាពិសេសគឺអ្នកប្រកបរបលក់ដូរនៅពេលយប់ក្បែរកន្លែងកើតហេតុនោះ បានឃើញផ្សែងខ្មៅហុយទ្រលោមឃ្មួលខ្មាញ់ និង មានក្លិនស្ងៀមយ៉ាងខ្លាំងចេញពីក្នុងហាងលក់កុំព្យូទ័រខាងលើនេះផងដែរ ទើបបង្កឱ្យមានការភ្ញាក់ផ្អើលកើតឡើងទៅដល់ពួកគាត់ស្រវ៉េស្រវ៉ារត់ទៅមើល តែផ្ទះត្រូវបានម្ចាស់ចាក់សោរទ្វារខាងក្នុងជិតឈឹង ដោយពួកគេគ្រប់គ្នាកំពុងតែលង់លក់ក្នុងដំណេកយ៉ាងស្កប់ស្លល់ និងមិនដឹងថា មានភ្លើងឆេះនោះ។
តាមប្រភពដដែលបន្តទៀតថា ពេលនោះ ក៏មានការភ្ញាក់ផ្អើលយ៉ាងខ្លាំងទៅដល់ប្រជាពលរដ្ឋ និងអាជ្ញាធរមូលដ្ឋានជាច្រើននាក់ចុះដល់ និងហៅរថយន្តពន្លត់អគ្គិភ័យជាច្រើនគ្រឿង ឱ្យចុះមកធ្វើអន្តរាគមន៍ជួយបាញ់ទឹកពន្លត់ផងដែរ តែរកកន្លែងចូលទៅបាញ់ទឹកពន្លត់មិនបានដោយសាតែទ្វារផ្ទះត្រូវបានចាក់សោរបិទជិតនោះ ។ ពេលដែលភ្លើងឆាបឆេះកាន់តែខ្លាំងឡើងៗនោះ កម្លាំងមានសម្ថកិច្ចក៏បាននាំគ្នាវាយកម្ទេចទ្វារចូលទៅខាងក្នុងផ្ទះ ដើម្បីធ្វើការបាញ់ទឹកពន្លត់បានតែនៅជាន់ផ្ទាល់ដីប៉ុណ្ណោះ ខណៈពេលនោះគេក៏បានឃើញមានបុរសម្នាក់ចុចភ្លើងទូរស័ព្ទចេញពីជាន់ទី២ ទំនងស្រែកអោយគេជួយផងដែរ។ តែជាអកុសលនៅពេលដែលកម្លាំងមានសម្ថកិច្ចវាយកម្ទេចទ្វារចូលទៅអន្តរាគមន៍បាញ់ពន្លត់ជួយនោះវាយឺតពេលទៅហើយ ដោយសារតែភ្លើងបានឆាបឆេះយ៉ងពេញទំហឹង ដោយសារតែខាងក្នុងមានស្តុកទុកនូវកុំព្យូទ័រ និង សម្ភារៈផ្សេងៗខាងក្នុងជាច្រើនទៀតនោះ។
លុះដល់ពេលដែលធ្វើការបាញ់ពន្លត់ភ្លើងឱ្យរលត់ទាស្រុងនោះ នៅខាងក្នុងគេបានប្រទះឃើញបុរសទាំង៤នាក់ដែលនៅខាងក្នុងនោះ ដោយម្នាក់ ត្រូវបានភ្លើងឆាបឆេះខ្លោចរាងកាយរួញកាញ៉ុលអស់ទៅហើយ និងអ្នកខ្លះទៀតនៅមានដង្ហើមតិចៗ និងស្លាប់នៅពេលបញ្ជូនទៅសង្គ្រោះនៅមន្ទីរពេទ្យជាបន្តបន្ទាប់គ្នាទាំងអស់តែម្តង និងបណ្តាលឱ្យមន្ត្រីនគរបាលផ្នែកពន្លត់អគ្គិភ័យម្នាក់រងរបួស ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]