ខេត្តព្រៃវែង ៖ ស្ត្រី២នាក់ម្តាយកូន ខណៈជិះម៉ូតូឌុបគ្នាមកពីទិញផ្លែឈើសម្រាប់ពិធីភ្ជាប់ពាក្យ បានជួបគ្រោះអកុសលត្រូវរថយន្តកុងតឺន័រកិន បណ្តាលឲ្យម្តាយធ្លាយខួរស្លាប់យ៉ាងអាណោចអាធ័ម ចំណែកកូនស្រីរងរបួសស្រាល ។គ្រោះថ្នាក់បណ្តាលមកពីម៉ូតូបែកកង់មុខ កាលពីវេលាម៉ោង២និង៣០នាទីរសៀលថ្ងៃទី១៤ ខែតុលា នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ៦២និងលេខ៦៣ ក្បែរគល់ស្ពានត្សឹបាសា(ស្ពានអ្នកលឿង) ស្ថិតក្នុងភូមិឧត្តម ឃុំព្រែកខ្សាយ«ក» ស្រុកពាមរក៍ ។
សមត្ថកិច្ចឱ្យដឹងថា ស្ត្រីជាម្តាយដែលស្លាប់ឈ្មោះ ជួប សុផល អាយុ៤២ឆ្នាំ មានទីលំនៅក្នុងភូមិព្រែកដាច់ ឃុំព្រែកដាច់ ស្រុកលើកដែក ខេត្តកណ្តាល ចំណែកកូនស្រីឈ្មោះ ធី គន្ធា អាយុ២២ឆ្នាំ ។ មុនពេលកើតហេតុ ទាំង២នាក់ម្តាយ-កូនបានជិះម៉ូតូឌុបគ្នាទៅទិញផ្លែឈើនៅផ្សារអ្នកលឿង ដើម្បីយកទៅទុករៀបចំពិធីភ្ជាប់ពាក្យនៅថ្ងៃទី១៥ ខែតុលា លុះទិញបានហើយត្រឡប់ទៅផ្ទះវិញក៏ជួបគ្រោះថ្នាក់តែម្តង ។
ប្រភពព័ត៌មាននិយាយថា ជនរងគ្រោះទាំង២នាក់ជិះម៉ូតូមួយគ្រឿងម៉ាកឌ្រីមសេ១២៥ ពណ៌ខ្មៅ ពាក់ផ្លាកលេខភ្នំពេញ ១FL-៧១៧៩
ធ្វើដំណើរពីត្បូងទៅជើងបម្រុងឆ្លងស្ពានត្សឹបាសា ត្រឡប់ទៅផ្ទះនៅឯស្រុកលើកដែក ខេត្តកណ្តាល ។ លុះទៅដល់ចំណុចខាងលើ ស្រាប់តែម៉ូតូបែកកង់មុខ ធ្វើឱ្យរេចង្កូតគ្រវាត់ចុះឡើង រហូតដួលបោកទាំងម៉ូតូនិងអ្នកជិះទៅលើថ្នល់ ។ គាប់ជួនពេលនោះ មានរថយន្តកុងតឺន័រមួយគ្រឿង ពាក់ផ្លាកលេខ ភ្នំពេញ ៤A-០៤៥៨ មកដល់ពីក្រោយក៏កិនស្ត្រីជាម្តាយចំក្បាលបណ្តាលឱ្យបែកខ្ចាយខួរស្លាប់នៅនឹងកន្លែង ចំណែកកូនស្រីគ្រាន់តែរបួសស្រាល ។ ប៉ុន្តែដោយសារឃើញម្តាយបែកក្បាលធ្លាយខួរស្លាប់នៅនឹងមុខស្រស់ៗ
បែបនេះ ធ្វើឱ្យនាងទៅជាគាំងរឹងខ្លួនប្រាណទាំងមូលកម្រើកក៏មិនកើតនិយាយក៏មិនរួច ទើបសមត្ថកិច្ចដឹកយកទៅកាន់មន្ទីរពេទ្យភ្លាមៗដើម្បីជួយសង្គ្រោះ ។
ប្រភពដដែលឱ្យដឹងទៀតថា ក្រោយពីកើតហេតុភ្លាម អ្នកបើកបររថយន្តកុងតឺន័របានឈប់ចតរថយន្តទុកចោលនិងរត់គេចខ្លួនបាត់ស្រមោល ហើយមួយសន្ទុះក្រោយមកសមត្ថកិច្ចក៏មកដល់ជួយអន្តរាគមន៍សម្រួលចរាចរណ៍ និងទាក់ទងហៅសាច់ញាតិជនរងគ្រោះ ព្រមទាំងរថយន្តសាមុយមកដឹកសពជនរងគ្រោះយកទៅលំនៅឋាន ដើម្បីឱ្យក្រុមគ្រួសាររៀបចំធ្វើបុណ្យតាមប្រពៃណី។ ចំណែកម៉ូតូនិងរថយន្តត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកពាមរក៍ រង់ចាំភាគីទាំងសងខាងចូលខ្លួនទៅដោះស្រាយនៅពេលក្រោយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
