ហួសចិត្ត! ភរិយារបស់អ្នកចាំទីក្រុមជម្រើសជាតិឈីលី ចោទប្រកាន់កីឡាករមួយចំនួន ផឹកស៊ីស្រវឹង មិនហ្វឹកហាត់ ទើបធ្វើឲ្យ...

ឈីលី៖ ប៉ុន្មានឆ្នាំចុងក្រោយនេះ ក្រុមបាល់ទាត់ជម្រើសជាតិឈីលីមានភាពរីកចំរើនខ្លាំងមែនទែន ប៉ុន្តែអ្វីដែលធ្វើឲ្យពិភពលោកភ្ញាក់ផ្អើលគឺថាប្រទេសជើងខ្លាំងក្នុងពិភពបាល់ទាត់មួយនេះបែរជាបាត់បង់កៅអីសម្រាប់លេងនៅក្នុងព្រឹត្តិការណ៍ពានរង្វាន់ World Cup នៅក្នុងប្រទេសរុស្ស៊ីនាឆ្នាំក្រោយ បន្ទាប់ពីការលេងមិនសូវបានល្អនៅក្នុងពូល។

យ៉ាងណាមិញ បន្ទាប់ពីឈីលីបានចាញ់ប្រទេសប្រេស៊ីលយ៉ាងចាស់ដៃក្នុងលទ្ធផល ៣ទល់នឹង០ ហើយមក លោកស្រី Carla Pardo ដែលជាភរិយារបស់កីឡាករ Claudio Bravo បានបង្ហោះពាក្យពេចន៍នៅលើទំព័រ Instagram ដោយបង្ហើបពីមូលហេតុដែលធ្វើឲ្យទម្រង់លេងរបស់ឈីលីធ្លាក់បែបនេះ។

ភរិយារបស់កីឡាករ Bravo បានសរសេរនៅលើបណ្តាញទំនាក់ទំនងសង្គមថា «ខ្ញុំសូមថ្លែងអំណរគុណចំពោះក្រុមជម្រើសជាតិសម្រាប់ពេលវេលាពិសេសៗទាំងអស់ដែលអ្នកបានផ្តល់ឲ្យពួកយើង។ ប៉ុន្តែនៅពេលដែលអ្នកពាក់អាវកីឡាហើយ អ្នកត្រូវតែមានវិជ្ជាជីវៈជាកីឡាករជាប់ខ្លួនជានិច្ច។ ខ្ញុំដឹងថាកីឡាករជម្រើសជាតិភាគច្រើនព្យាយាមខ្លាំងណាស់ ប៉ុន្តែក្នុងនោះក៏មានកីឡាករមួយចំនួនទៀតបានដើរលេង ជប់លៀងនិងស្រវឹងដល់ថ្នាក់មិនអាចធ្វើការហ្វឹកហាត់ទៀតផង។»

យ៉ាងណាមិញ ពាក្យចោទប្រកាន់ទាំងនេះត្រូវបានច្រានចោលដោយកីឡាករ Gary Medel ដែលជាខ្សែបម្រើដ៏សំខាន់របស់ក្រុមជម្រើសជាតិឈីលីផងដែរ។ Gary Medel បានប្រាប់ថា គាត់មិនដែលឃើញមិត្តរួមក្រុមណាម្នាក់ស្រវឹងឬមកហាត់ទាំងនៅស្រវឹងនោះទេ ហើយកីឡាករជម្រើសជាតិឈីលីទាំងអស់តែងតែមានឥរិយាបថល្អនិងព្យាយាមហ្វឹកហាត់ជានិច្ចផងដែរ៕

គួរបញ្ជាក់ផងដែរថា ទោះបីជាឈីលីខកខានមិនបានចូលរួមក្នុងការប្រកួត World Cup ក្នុងឆ្នាំក្រោយក៏ពិតមែន ប៉ុន្តែក្នុងពេលនេះគេនៅតែមាននាមជាជើងឯកក្នុងតំបន់អាមេរិកឡាទីនដដែល៕

ប្រភព៖ Marca