រោគសញ្ញា និងប្រតិកម្មលើរាងកាយ ក៏អាចជាសញ្ញាបញ្ជាក់ឲ្យដឹងអំពីបញ្ហាសុខភាពរបស់មនុស្សយើងបានផងដែរ។ រោគសញ្ញាទាំងនោះអាចលេចចេញឡើងបានគ្រប់ពេលវេលា ប្រសិនបើមានអ្វីខុសប្រក្រតីលើសុខភាពរាងកាយរបស់យើង។
ដូច្នេះការឧស្សាហ៍សង្កេតមើលប្រតិកម្មលើស្បែក អាចជួយយើងដឹងមុនពីជំងឺ និងរកវិធីព្យាបាលបានទាន់ពេលវេលា។
ថ្ងៃនេះយើងនឹងលើកឡើងអំពីរោគសញ្ញាមួយចំនួន ដែលលេចឡើងលើស្បែកមកជម្រាបមិត្តអ្នកអានឱ្យបានជ្រាប ដើម្បីងាយស្រួលរកវិធីព្យាបាលដូចខាងក្រោម៖
១. ស្នាមអុចខ្មៅដុំៗ
ពេលដែលមានរោគសញ្ញាអុចខ្មៅកើតឡើងលើស្បែក អាចបញ្ជាក់បានថាអ្នកកំពុងមានជំងឺពាក់ព័ន្ធនឹងសរីរាង្គចុះខ្សោយ ឬហៅថាជំងឺ Addison ។ វានឹងធ្វើឱ្យអ្នកមានអាការឈឺចាប់ត្រង់សាច់ដុំ ឈឺសន្លាក់ បាត់បង់ចំណង់ការញ៉ាំអាហារ ស្រកទម្ងន់ អស់កម្លាំង សម្ពាធឈាមខ្សោយ និងជាតិស្ករធ្លាក់ចុះជាដើម។ ជំងឺនេះអាចបង្កជាអាការធ្ងន់ធ្ងរ ដូច្នេះត្រូវប្រញាប់ទៅជួបគ្រូពេទ្យជាបន្ទាន់។
២. ស្បែកប្រែជាឡើង-សដុំៗ
ពេលស្បែកប្រែជាឡើងសដុំៗដោយសារស្បែកបាត់បង់ពណ៌ទ្រង់ទ្រាយដើម គេហៅជំងឺនេះថា Vitiligo ។ នោះក៏ដោយសារប្រព័ន្ធភាពស៊ាំរបស់រាងកាយបានសម្លាប់កោសិកា មេណូកូស៊ីត( Melanocytes ) ដែលមានតួនាទីបង្កើតពណ៌ស្បែក បានជាបណ្តាលឱ្យស្បែកបាត់បង់ពណ៌ដូច្នេះ។ អ្នកគួរតែប្រញាប់ទៅជួបវេជ្ជបណ្ឌិតជំនាញខាងជំងឺនេះ ឬអ្នកឯកទេសខាងជំងឺសើស្បែក។
៣. ស្នាមកន្ទួលលើស្បែក
ការកើតលេចឡើងនៃស្នាមកន្ទួលលើស្បែកអាចបណ្តាលមកពី អាឡែកហ្ស៊ីស្បែក ប្រតិកម្មចំណីអាហារ ប្រតិកម្មសាធាតុគីមី ឥទ្ធិពលពីថ្នាំពេទ្យមួយចំនួន ឬជំងឺស្បែកផ្សេងៗមួយចំនួនទៀត។ អ្នកគួរប្រញាប់ទៅពិគ្រោះជាមួយគ្រូពេទ្យ ព្រោះជំងឺប្រតិកម្មស្បែក ឬអាឡែកហ្ស៊ី អាចវិវឌ្ឍទៅជាជំងឺធ្ងន់ធ្ងរបានផងដែរ។
៤. ស្បែកឡើងហើម
នៅពេលស្បែកចាប់ផ្តើមហើមក្រហមខុសពីប្រក្រតី នេះអាចជារោគសញ្ញានៃជំងឺ Hypothyroidism ។ ជំងឺនេះបណ្តាលមកពី ក្រពេញទីរ៉ូអ៊ីតផលិតអ័រម៉ូនមិនបានគ្រប់គ្រាន់ ដោយវាមានរោគសញ្ញាផ្សេងៗដូចជា៖ ស្បែកស្ងួត មុខនិងរាងកាយមួយចំនួនឡើងខ្លាញ់ ជ្រុះសក់ ក្រចកដៃផុយស្រួយ និងស្រាប់តែឡើងទម្ងន់ខុសពីធម្មតាជាដើម។
៥. ប្រជ្រុយច្រើន
ប្រជ្រុយច្រើន ឬតែងតែដុះមកមិនឈប់ឈរ បណ្តាលមកពីជំងឺតំណពូជ និងម្យ៉ាងទៀតអាចមកពី អតុល្យភាពអាំងតេក្រាលដ៏ច្រើនលើសលប់ ឬអតុល្យភាពអ័រម៉ូនជាដើម ដែលក្នុងករណីមួយនេះមិនមានបង្កគ្រោះថ្នាក់នោះទេ។ តែបើសិនជាវាមានចំនួនច្រើនពេក ឬចេះតែដុះប្រជ្រុយមកមិនឈប់ហើយមានការឈឺចុកចាប់ ប្តូរពណ៌និងទំហំជាដើមនោះ អ្នកគួរតែប្រញាប់ទៅមន្ទីរពេទ្យជាបន្ទាន់។
៦. កើតមុន, មុនក្បាលខ្មៅ និងរន្ធញើសរីកធំ
ចំពោះមូលហេតុទាំងនេះភាគច្រើនបណ្តាលមកពីស្បែករបស់អ្នកមានជាតិប្រេងច្រើន ដែលអាចធ្វើឱ្យស្ទះរន្ធញើសលើផ្ទៃមុខ , អតុល្យភាពអ័រម៉ូន ឬមានបញ្ហាការរំលាយអាហារជាដើម។ ដូច្នេះវាទាមទារឱ្យមានការថែទាំស្បែកឱ្យបានត្រឹមត្រូវ និងរកមូលហេតុចម្បងដើម្បីធ្វើការព្យាបាល និងកម្ចាត់វាចេញ ដែលមានតែអ្នកឯកទេសជំនាញប៉ុណ្ណោះអាចជួយដោះស្រាយបញ្ហាទាំងនេះបាន។
៧. របកស្បែក
របកស្បែកបណ្តាលមកពី កង្វះវីតាមីន, អតុល្យភាពអ័រម៉ូន, ប្រតិកម្មគីមី, អាឡែកហ្ស៊ីស្បែក ដូចជា រលាកស្បែក , ជំងឺ Psoriasis និងជំងឺផ្សេងៗមួយចំនួនទៀត។ ដូច្នេះនៅពេលដែលស្បែករបស់អ្នករបកកាន់តែខ្លាំង និងមានការឈឺចាប់អមជាមួយផងនោះ សូមប្រញាប់ទៅពិគ្រោះជាមួយពេទ្យជំនាញជាបន្ទាន់។
៨. បែកញើសខ្លាំង
ការបែកញើសដោយសារអាកាសធាតុ ឬអ្នកបញ្ចេញកម្លាំងច្រើននោះវាមិនមែនជាបញ្ហាទេ។ តែបើអ្នកស្រាប់តែបែកញើសខុសពីប្រក្រតីវាអាចបណ្តាលមកពីពពួកមេរោគទាក់ទងនឹងបំពង់-ក , ជំងឺ Graves , ជំងឺ Autoimmune ដែលធ្វើឱ្យប៉ះពាល់ដល់ក្រពេញទីរ៉ូអ៊ីត។ វាក៏អាចធ្វើឱ្យស្បែកស្តើង និងរមាស់ថែមទៀតផង ។ ប្រសិនបើមានរោគសញ្ញាស្រដៀងនេះ សូមទៅពិគ្រោះជាមួយគ្រូពេទ្យឱ្យបានឆាប់កាន់តែល្អ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]