អាការពុលចំណីអាហារជាអ្វី? តោះ! មកដឹងអំពីមូលហេតុ វិធីការពារ និងព្យាបាលទាំងអស់គ្នា!

មនុស្សភាគច្រើនសុទ្ធតែធ្លាប់ឆ្លងកាត់បទពិសោធន៍ពុលចំណីអាហារ​ គ្រាន់តែស្ថិតនៅក្នុងកម្រិតធ្ងន់  ឬស្រាលប៉ុណ្ណោះ។  នោះក៏ដោយសារការទទួលម្ហូបអាហារដែលសម្បូរទៅដោយមេរោគ  មិនមានអនាម័យត្រឹមត្រូវ ជាពិសេសម្ហូបចំណីអាហារ បន្លែ ផ្លែឈើដែលមានជាតិគីមីតែម្តង។

ដើម្បីផ្តល់ជាចំណេះដឹងបន្ថែម  ថ្ងៃនេះខ្មែរឡូតនឹងលើកឡើងពីមូលហេតុ វិធីបង្ការ និងព្យាបាលពីការពុលចំណីអាហារ ចែករំលែកទៅមិត្តអ្នកអានដូចខាងក្រោម៖  

# មូលហេតុបណ្តាលឱ្យពុលចំណីអាហារ

មូលហេតុចម្បងនៃអាការពុលចំណីអាហារបណ្តាលមកពីបាក់តេរី  បារ៉ាសិតលើចំណីអាហារ  អាហារដែលមិនបានលាងសម្អាតឱ្យបានស្អាតល្អ  ជាពិសេសកង្វះខាតអនាម័យលើម្ហូបចំណីតែម្តងដូចជា៖

- ទទួលទានចំណីអាហារដែលចាស់ ឬសល់

- ប្រើប្រាស់ទឹកកខ្វក់  និងទឹកដែលគ្មានអនាម័យយកមកចម្អិនម្ហូបអាហារ

- ទទួលទានអាហារដែលមានរុយរោម

- ការលាងបន្លែ ផ្លែឈើមិនបានស្អាតល្អ ដែលអាចឱ្យជាប់មេរោគ ជាពិសេសឥទ្ធិពលនៃថ្នាំគីមីដែលមានគ្រោះថ្នាក់បំផុតសម្រាប់សុខភាព

- ទទួលទានចំណីអាហារដោយមិនបានលាងដៃឱ្យបានស្អាត  ឬប្រើប្រាស់សំភារៈសម្រាប់ទទួលទានដូចជា ចាន សម ស្លាបព្រា ដែលជាប់មេរោគ។  

# រោគសញ្ញានៃអាការពុលចំណីអាហារ

- ចេះតែក្អួតចង្អោរមិនឈប់

- ឈឺចុកចាប់ក្នុងពោះ

- ឈឺក្បាល វិលមុខ

- រាគមិនឈប់ឈរ

- រាងកាយទន់ខ្សោយ អស់កម្លាំង ល្ហិតល្ហៃ...ល។ 

# វិធីបង្ការ និងការពារពីការពុលចំណីអាហារ

ការពុលចំណីអាហារយើងអាចការពារ និងបង្ការបានដោយមូលហេតុចម្បងតែម្យ៉ាងគត់នោះគឺ រក្សាអនាម័យចំណីអាហារដែលមានដូចជា៖

- លាងសំអាតដៃឱ្យបានស្អាតល្អរាល់ពេលមុន និងក្រោយទទួលទានចំណីអាហារ។

- លាយសម្អាតបន្លែ ​ផ្លែឈើឱ្យបានស្អាតល្អ  ចៀសវាងជាប់មេរោគបាក់តេរីមកជាមួយ ​ជាពិសេសថ្នាំគីមីតែម្តង។

- សម្អាតសំភារៈផ្ទះបាយឱ្យបានស្អាតល្អ ដូចជាចាន ឆ្នាំង សម ស្លាបព្រា ចង្កឹះ និងឧបករណ៍សម្រាប់ចម្អិនម្ហូបអាហារជាដើម។

- មិនត្រូវទទួលទានទឹកឆៅ   ឬទឹកដែលមិនបានដាំឱ្យបានពុះល្អ ជាពិសេសមិនត្រូវទទួលទានផលិតផលទឹកដោះគោដែលមិនបានសម្លាប់មេរោគឱ្យបានត្រឹមត្រូវ។

- ត្រូវចម្អិនម្ហូបអាហារឱ្យបានឆ្អិនល្អក្នុងសីតុណ្ហភាពដែលមានសុវត្ថិភាព។

- មិនត្រូវរក្សាម្ហូបអាហារនៅក្នុងទូទឹកកកយូរថ្ងៃពេកទេ ជាពិសេសគួរតែប្រើប្រាស់តែបន្លែ ផ្លែឈើដែលនៅស្រស់ៗបានហើយសម្រាប់ទទួលទាន ។ 

- ត្រូវតែប្រមូលចំណីអាហារ បន្លែ ផ្លែឈើបោះចោលជាដាច់ខាតរាល់ពេលដែលវាផ្លាស់ប្តូររូបរាង ពណ៌សម្បុរ និងក្លិនជាដើម។  

# ការព្យាបាលអាការពុលចំណីអាហារ

អ្នកអាចប្រើប្រាស់ប្រភេទថ្នាំ អង់ទីប៊ីយ៉ូទិច សម្រាប់ព្យាបាលមេរោគដែលប៉ះពាល់ដល់ ក្រពះពោះវៀនដូចជាក្អួតចង្អោរ រាគរូសជាដើម។ តែភាគច្រើនការប្រើប្រាស់ថ្នាំមិនសូវជាទទួលបានការពេញនិយម និងប្រសិទ្ធភាពឆាប់រហ័សដូចជាការបញ្ចូលជាតិទឹកនៅក្នុងខ្លួនតាមរយៈការដាក់សឺរ៉ូមបង្គ្រប់ជាតិទឹកនោះទេ។ ដោយអាការពុលចំណីអាហារភាគច្រើនធ្វើឱ្យអ្នកបាត់បង់ជាតិទឹក និងអាឡិចត្រូលីត្រពីរាងកាយយ៉ាងច្រើននោះក៏ដោយសារការរាគរូស និងក្អួតចង្អោរ។ ដូច្នេះមានតែវិធីបន្ថែមជាតិទឹកប៉ុណ្ណោះទើបអាចធ្វើឱ្យអ្នកឆាប់ជាសះស្បើយពីអាការពុលចំណីអាហារទាំងនោះ។ អ្នកអាចទទួលទានម្ហូប ចំណីអាហារដែលសម្បូរជាតិទឹកបន្ថែមដូចជា ផឹកទឹកស្អាតធម្មតាឱ្យបានច្រើន,  ទឹកអូរ៉ាលីត្រ  និងទឹកស៊ុបជាដើម។ ប៉ុន្តែគួរចៀងវាងទទួលទានទឹកតែ, កាហ្វេ,  គ្រឿងស្រវឹង,  ទឹកសូដា  និងរាល់ភេសជ្ជៈផ្សេងៗជាដើម។

ចំណាំ៖ អ្នកត្រូវតែទៅមន្ទីរពេទ្យជាបន្ទាន់បើសិនអាការពុលចំណីអាហារអ្នកកាន់ទៅធ្ងន់ធ្ងរទៅដូចជា៖

- បន្តក្អួតមិនឈប់លើសពី ២ថ្ងៃ

- មានឈាមជាប់ជាមួយរាល់ពេលក្អួតម្តងៗ, រាគកាន់តែធ្ងន់ធ្ងរមិនបាត់លើសពី ២ថ្ងៃ

- មានអារម្មណ៍ថារាងកាយខ្សោះជាតិទឹក អស់កម្លាំងល្ហិតល្ហៃខ្លាំង

- ការឈឺចាប់ក្នុងពោះខ្លាំង និងរមួលក្នុងក្រពះស្ទើរតែទ្រាំមិនបាន៕