មនុស្សមួយចំនួនតែងតែយល់ថាអាការឈឺក្បាលវិលមុខ អស់កម្លាំងល្ហិតល្ហៃបណ្តាលមកពីការធ្វើការលើសកម្លាំងធ្ងន់ហួសប្រមាណ ប៉ុន្តែការពិតទៅក្រៅពីបញ្ហានេះ ការដែលរាងកាយរបស់អ្នកខ្វះខាតសារជាតិចិញ្ចឹម និងវីតាមីនបំប៉នរាងកាយក៏អាចធ្វើឱ្យអ្នកកើតមានអាការអស់ទាំងនេះដែរ។
ជំនួសឱ្យការប្រើប្រាស់ថ្នាំពេទ្យច្រើនហួសហេតុនាំតែខូចសុខភាព ថ្ងៃនេះយើងនឹងលើកយកអាហារមួយចំនួនដែលអាចធ្វើឱ្យអ្នកអស់កង្វល់ពីបញ្ហា ឈឺក្បាល វិលមុខ អស់កម្លាំង និងគេងមិនលក់បានយ៉ាងមានប្រសិទ្ធភាពដោយបំពេញនូវសារធាតុ និងវីតាមីន ២ ដូចខាងក្រោមនេះ៖
# សារធាតុម៉ាញ៉េស្យូម
សារជាតិម៉ាញ៉េស្យូម បង្កើតឱ្យមានប្រតិកម្មគីមីផ្សេងៗគ្នាជាង ៣០០មុខនៅក្នុងរាងកាយរបស់មនុស្ស ដែលអាចជួយបម្លែងចំណីអាហារទៅជាថាមពល និងបង្កើតប្រូតេអ៊ីនថ្មីចេញពីអាស៊ីតអាមីណូ។ ទាំងនេះជាមូលហេតុដែលវាត្រូវបានគេប្រើប្រាស់ដើម្បីបំបាត់អាការតានតឹង ថប់បារម្ភ និងប្រឆាំងការអស់កម្លាំង។
ម្យ៉ាងវិញទៀតម៉ាញ៉េស្យូមអាចការពារអាការឈឺក្បាលញឹកញាប់ និងជួយព្យាបាលការឈឺក្បាលប្រកាំងបានផងដែរ។ ប៉ុន្តែនៅពេលដែលរាងកាយរបស់អ្នកខ្វះជាតិម៉ាញ៉េស្យូមអាចធ្វើឱ្យសារធាតុ Serotonin ថយចុះ ដែលអាចបណ្តាលឱ្យស្ទះសរសៃឈាម និងប៉ះពាល់ដល់មុខងារបញ្ជូនទៅសរសៃប្រសាទជាដើម ហើយថែមទាំងធ្វើឱ្យកើតជំងឺធ្លាក់ទឹកចិត្ត និងមានបញ្ហាគេងមិនលក់ជាដើម។
ប្រភពអាហារ បន្លែ និងផ្លែឈើដែលសម្បូរជាតិម៉ាញ៉េស្យូម រួមមាន៖ ស្ពៃខ្មៅ, គ្រាប់ធុញ្ញជាតិ, អង្ករសម្រូប , នំប៉័ង, ត្រី , សាច់, គ្រឿងសមុទ្រ, និងផ្លៃបឺរជាដើម។
# វីតាមីន K
វីតាមីន K មានតួនាទីដែលអាចជួយធ្វើឱ្យឈាមកក និងទប់ស្កាត់កុំឱ្យឈាមហូរក្នុងរាងកាយ។ វីតាមីន K នេះថែមទាំងអាចជួយការពារអ្នកពីការកើតមានអាការឈាមកកនៃសសៃអាក់ទែ សសៃវ៉ែន ថែមទាំងអាចកាត់បន្ថយហានិភ័យនៃការកើតជំងឺភ្លេចភ្លាំង និងមហារីកក្រពេញប្រូស្តាតបានផងដែរ។ វីតាមីន K ថែមទាំងបានចូលរួមដំណើរការជាមួយវីតាមីន D ដើម្បីនាំយកជាតិកាល់ស្យូមទៅចិញ្ចឹមឆ្អឹងរបស់អ្នកឱ្យមានភាពរឹងមាំ។ ដូច្នេះកង្វះវីតាមីន K អាចធ្វើឱ្យឆ្អឹងរបស់អ្នកឆាប់បាក់ ពុក ឬខូចបានយ៉ាងងាយ។ ហើយម្យ៉ាងទៀត បើសិនជារាងកាយរបស់អ្នកខ្វះវីតាមីន K នឹងធ្វើឱ្យកើតមានអាការជាំ ហូរឈាមក្នុងរាងកាយ ឧស្សាហ៍រមួលក្រពើ អស់កម្លាំងល្ហិតល្ហៃ និងមានអាការលើសឈាមជាដើម។
ខាងក្រោមនេះជាប្រភពចំណីអាហារដែលសម្បូរមីតាមីន K មានដូចជា៖
- ឱសថធម្មជាតិមានដូចជា៖ ជីរនាងវង, ជីរវ៉ាន់ស៊ុយ, ផ្កា និងស្លឹកកាឆាយ...ជាដើម។
- ពពួកបន្លៃបៃតង និងសាឡាត់រួមមាន៖ ខាត់ណា, ផ្ទី, សាឡាត់, ស្ពៃបូកគោ, ស្ពៃខៀវ, ស្លឹកខ្ទឹម, ភ្លៅកង្កែប, ផ្កាខាត់ណា ផ្កាខាត់ណាខៀវ, ត្រសក់ និងពពួកបន្លែដែលមានពណ៌បៃតងផ្សេងៗទៀតជាដើម។
- ពពួកគ្រឿងផ្សំដែលហឹររួមមាន៖ ម្ទេស, ម្រេច, ម្សៅម្ទេស ម្ទេសហ្មត់ និងម្សៅម្រេចជាដើម...។
- អាហារផ្សេងៗទៀតរួមមាន ទឹកសណ្តែក ប្រេងល្ង ប្រេងអូលីវ និងពពួកផ្លែឈើក្រៀមជាដើម។
ប្រសិនជាក្នុងករណីដែលអ្នកចង់ប្រើប្រាស់ថ្នាំដែលមានជាតិម៉ាញ៉េស្យូម និងវីតាមីន K យកល្អគួរតែសាកសួរ និងពិភាក្សាជាមួយវេជ្ជបណ្ឌិតជំនាញជាមុនសិន ព្រោះការប្រើប្រាស់ថ្នាំលើសកម្រិត និងមិនត្រឹមត្រូវអាចប៉ះពាល់ផល់សុខភាពរាងកាយរបស់អ្នកបាន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]