រាជធានីភ្នំពេញ ៖ បុរសម្នាក់កំពុងតែជិះម៉ូតូធ្វើដំណើរតាមផ្លូវ ក៏ស្រាប់តែរថយន្តសណ្តោងដឹកដែកមួយគ្រឿងបានធ្វើដំណើរមកក្នុងទិសដៅស្របគ្នាជ្រុលទៅបុកនឹងកិនលើពីក្រោយម៉ូតូ បណ្តាលឲ្យអ្នកបើកម៉ូតូ ធ្លាយពោះវៀនស្លាប់នៅនឹងកន្លែង។
ហេតុការណ៍នេះកើតឡើងនៅវេលាម៉ោង៧ និង១០នាទីយប់ ថ្ងៃទី២៨ ខែកញ្ញា ឆ្នាំ២០១៧ ជិតបុរីហាយលែន ផ្លូវ៣៧១ ភូមិត្នោតជ្រុំ៤ សង្កាត់បឹងទំពន់២ ខណ្ឌមានជ័យ ។
សពជនរងគ្រោះមានឈ្មោះ ថេង ឡាយ ភេទប្រុស អាយុ៤៨ឆ្នាំ មានទីលំនៅផ្ទះលេខ១០៩DE1 ផ្លូវ១០៧ សង្កាត់អូឫស្សី៤ ខណ្ឌ៧មករា មានស្រុកកំណើតនៅភូមិត្បូងឃ្មុំ ឃុំត្បូងឃ្មុំ ស្រុកត្បូងឃ្មុំ ខេត្តកំពងចាម។ ចំណែកអ្នកបើករថយន្តមានឈ្មោះ ជា គឹមរ៉ុង ភេទប្រុស អាយុ៣៥ឆ្នាំ មុខរបបរបើករថយន្ត ស្នាក់នៅអ្នកលឿង មានស្រុកកំណើតឃុំអូរាំង ស្រុកបារាយណ៍ ខេត្តកំពង់ធំ។
រីឯព្រូរថយន្តមានឈ្មោះ ឈុំ មករា ភេទប្រុស អាយុ១៨ឆ្នាំ មុខរបបរជំនួយការរថយន្ត មានស្រុកកំណើតភូមិត្និតថ្មី ស្រុកបារាយណ៍ ខេត្តកំពង់ធំ។ តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសរងគ្រោះខាងលើ មិនដឹកថាគោលបំណងទៅណានោះទេ គឺបានជិះម៉ូតូម៉ាក YAMAHA FINO ពណ៌ស ពាក់ស្លាកលេខ ភ្នំពេញ 1BZ.7552 បានធ្វើដំណើរតាមផ្លូវ៣៧១ ក្នុងទិសដៅពីកើតទៅលិច ខណៈមកដល់ចំណុចកើតហេតុ ក៏ស្រាប់តែមានរថយន្តសណ្តោងដឹកដែក មួយគ្រឿង ពណ៌ទឹកក្រូច ពាក់ស្លាកលេខកំពង់ធំ 3A.1320 បានធ្វើដំណើរតាមផ្លូវ៣៧១ ក្នុងទិសដៅស្របទិសគ្នា ហើយក្នុងល្បឿនលឿន បានជ្រុលទៅបុកនឹងម៉ូតូដែលជិះដោយបុរសម្នាក់ ចំពីក្រោយ ហើយរថយន្តនោះបានបើកកិនពីលើម៉ូតូ និងជនរងគ្រោះ បណ្តាលឲ្យធ្លាយពោះវៀនស្លាប់នៅក្រោមម៉ូតូយ៉ាងអាណាចអាធម័បំផុត។
ដោយឡែកខាងរថយន្តវិញ នៅពេលដែលបង្កគ្រោះថ្នាក់ហើយ មិនបានឈប់ដោះស្រាយនៅនៅកន្លែងកើតហេតុនោះទេ គឺគឺព្យាយាមបើករថយន្តរត់គេចខ្លួនពីកន្លែងកើតហេតុប្រហែល ៣០០ម៉ែត្រ ចូលទៅផ្លូវបេតុងបឹងតាម៉ាត ភូមិម័ល សង្កាត់ដង្កោ ខណ្ឌដង្កោ ទើបប្រជាពលរដ្ឋ និងសមត្ថកិច្ចដេញឃាត់រថយន្តនិងអ្នកបើកបាន រួចហើយបាននាំខ្លួនយកទៅសាកសួរនៅប៉ុស្តិ៍នគរបាលបឹងទំពុន។ នៅពេលសាកសួរ អ្នកបើកបរបាននិយាយថា រូបគាត់មិនបានបើករថយន្តបុកជនរងគ្រោះនោះទេ គឺជនរងគ្រោះបានជិះម៉ូតូមកដល់ ចាប់ហ្រាំងដួលចូលកង់ក្រោយរថយន្តខ្លួនឯង។
បើតាមសម្ដីអ្នកឃើញហេតុការណ៍ផ្ទាល់ភ្នែក តែសុំមិនបញ្ចេញឈ្មោះបានឲ្យដឹងថា រូបគាត់បានឃើញម៉ូតូជិះមកស្របទិសគ្នាជាមួយរថយន្ត ហើយមកដល់ចំណុចកើតហេតុ ខាងម៉ូតូបម្រុងវ៉ារថយន្ត តែដោយសារតែវាក់ជាមួយរថយន្តមួយគ្រឿងទៀតមកពីមុខ ទើបខាងម៉ូតូចាប់ហ្រាំង បណ្តាលឲ្យម៉ូតូដួលចូលកង់ក្រោយរថយន្តតែម្តងទៅ។
ក្រោយពេលកើតហេតុ សមត្ថកិច្ចជំនាញខណ្ឌ និងក្រុងទៅដល់ បានធ្វើកំណត់ហេតុប្រគល់ឲ្យរថយន្តដឹកសពជនរងគ្រោះយកទៅតម្កល់ទុកនៅវត្តទឹកថ្លា ដើម្បីស្វែងរកសាច់ញាតិបងប្អូនមកយកទៅធ្វើបុណ្យ។
ចំណែកម៉ូតូ និងរថយន្តព្រមទាំងអ្នកបើកបរ ត្រូវសមត្ថកិច្ចធ្វើការវាស់វែងយកទៅរក្សារទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយបន្ត៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
