អាហារពេលយប់នឹងធ្វើឱ្យអ្នកឡើងទម្ងន់ សាច់តាមរាងកាយចាប់ផ្តើមយារធ្លាក់គួរឱ្យខ្លាចរអារបើសិនជាអ្នកបរិភោគអាហារមិនបានត្រឹមត្រូវ។ របបអាហារ និងសកម្មភាពប្រចាំថ្ងៃមួយចំនួនអាចធ្វើឱ្យអ្នកកាន់តែធាត់ឡើងៗដោយមិនអាចចៀសបាន បើសិនជាអ្នកមិនសិក្សាឱ្យច្បាស់ពីផលប៉ះពាល់អស់ទាំងនោះទេ។
តែកុំបារម្ភអី ថ្ងៃនេះយើងនឹងលើកយកសកម្មភាពទាំង១០ ដែលអាចឱ្យអ្នកទទួលបានរាងដ៏ស្រស់ស្អាតពេញចិត្តជាមិនខានដូចខាងក្រោមនេះ៖
១. បរិភោគស៊ុតសម្រាប់អាហារពេលព្រឹក
អាហារដែលអាចជួយផ្តល់កម្លាំង និងថាមពេលសម្រាប់អ្នកពេញមួយថ្ងៃនោះ គឺជាអាហរពេលព្រឹក ។ ប៉ុន្តែការបន្ថែមអាហារពេលព្រឹកជាមួយស៊ុតមិនត្រឹមតែផ្តល់ថាមពលប៉ុណ្ណោះទេ ថែមទាំងធ្វើឱ្យអ្នកមិនសូវឃ្លាន ទប់ទល់ និងកាត់បន្ថយចំណង់នៃការឃ្លានអាហារបានរយៈពេល ២៤ម៉ោងទៀតផង។
២. មិនត្រូវទិញនំចំណីឆ្ងាញ់ៗទុកជាដាច់ខាត
បើទោះជាអ្នកសម្រេចចិត្តយ៉ាងមុតមាំក្នុងការតមអាហារពេលយប់ក៏ដោយ ការដែលមាននំចំណីឆ្ងាញ់ៗក្នុងទូទឹកកកជាប្រចាំ នឹងធ្វើឱ្យអារម្មណ៍អ្នកវិលវល់នឹកឃើញចង់តែស្ទុះទៅបើកទូទឹកកកយកមកបរិភោគភ្លាមៗជាមិនខាន។
៣. មិនត្រូវបរិភោគអាហារដែលមានជាតិកាបូហាយឌ្រេត
រាល់អាហារដែលមានជាតិកាបូហាយឌ្រេត (Carbohydrate ) ខ្ពស់ដូចជា អាហារចៀន ឬបំពង , អាហារចម្អិនស្រាប់ (Fast Food ) , ភេសជ្ជៈកំប៉ុងផ្អែមៗ , នំខេក, គ្រឿងស្រវឹងជាដើម វានឹងធ្វើឱ្យអ្នកមានចំណង់អាហារកាន់តែខ្លាំង។ ដូច្នេះគួរចៀងវាងអាហារអស់ទាំងនោះជាដាច់ខាត ជាពិសេសពេលយប់មុនចូលគេងតែម្តង។
៤. កាត់បន្ថយជាតិប្រៃនៅក្នុងរបបអាហារ
ការបរិភោគរបបអាហារប្រៃៗមិនត្រឹមតែប៉ះពាល់ដល់សុខភាពរាងកាយប៉ុណ្ណោះទេ វាថែមទាំងធ្វើឱ្យមាត់ចេះតែឃ្លានមិនឈប់ ជាហេតុបណ្តាលឱ្យអ្នកធាត់ដោយមិនដឹងខ្លួន។ ដូច្នេះក្នុងរបបអាហារប្រចាំថ្ងៃ អ្នកគួរតែកាត់បន្ថយអាហារមានជាតិអំបិលខ្ពស់ ដោយបែរមកបង្កើនរសជាតិតាមបែបធម្មជាតិវិញ ដូចជាការធ្វើម្ហូបជាមួយនឹងខ្ទឹមបារាំង និងគ្រឿងទេសធម្មជាតិផ្សេងៗទើបប្រសើរជាង។
៥. បន្ថែមផ្កាខាត់ណាខៀវនៅក្នុងរបបអាហារ
ការយកផ្កាខាត់ណាខៀវជាគ្រឿងផ្សំបន្ថែមនៅក្នុងរបបអាហារទទួលទានរបស់អ្នកជាប្រចាំ ជាពិសេសគឺអាហារពេលយប់ អាចជួយធ្វើឱ្យអ្នកឆាប់ឆ្អែត និងសម្រន់ការឃ្លានអាហារបានយូរថែមទៀតផង។
៦. ហាត់ប្រាណបន្ថែម
ការហាត់ប្រាណមិនត្រឹមតែអាចជួយដុតបំផ្លាញជាតិកាឡូរីប៉ុណ្ណោះទេ វាថែមទាំងធ្វើឱ្យអ្នកមិនសូវឃ្លានអាហារថែមទៀតផង។ ដូច្នេះហាត់ប្រាណឱ្យបានទៀងទាត់ជាពិសេសរាល់ពេលល្ងាច។
៧.ងូតទឹកត្រជាក់
វាជារឿងចម្លែកតែជាការពិតណាស់ដែលការងូតទឹកត្រជាក់ៗនៅពេលយប់មុនពេលចូលគេង ជួយធ្វើឱ្យអ្នកអាចទប់ទល់នឹងការស្រេកឃ្លានអាហារនៅពេលយប់បានយ៉ាងល្អប្រសើរ។ ការងូតទឹកត្រជាក់ បូកផ្សំនឹងសីតុណ្ហភាព 17-18 ° C ក៏អាចធ្វើឱ្យរាងកាយអាចដុតបំផ្លាញកាឡូរីប្រមាណជា 7% បានផងដែរ ។
៨. ផឹកទឹកធម្មតា
ជំនួសឱ្យការឃ្លានអាហារ មនុស្សជាច្រើនតែងតែផឹកទឹកដោះគោ ឬទឹកដោះគោជូរដើម្បីបំពេញការស្រេកឃ្លាន។ វាមិនមានផលប៉ះពាល់នោះទេ តែការមានទឹកធម្មតានៅជិតគ្រែគេង ប្រសើរជាងការឡើងទៅយកភេសជ្ជៈទាំងនោះនៅចង្ក្រានបាយ។ ការឃើញអាហារនៅក្នុងផ្ទះបាយអាចទាញអារម្មណ៍របស់អ្នកឱ្យស្រេកឃ្លានកាន់តែខ្លាំង ហើយទប់អារម្មណ៍មិនបានដោយការញ៉ាំអាហារអស់ទាំងនោះ។
៩.ដុសសម្អាតធ្មេញ
ការដុសធ្មេញនៅពេលល្ងាច ឬយប់ជាសញ្ញាដាស់តឿនថា អ្នកនឹងបញ្ឈប់ការបរិភោគអាហារចាប់ពីវិនាទីនេះទៅហើយ។ បន្ថែមពីនេះថ្នាំដុសធ្មេញដែលមានជាតិជីរអង្កាម និងជាតិមេនថុលហឹរៗនោះអាចធ្វើឱ្យអ្នកលែងមានអារម្មណ៍ឃ្លានអាហារថែមទៀតផង។
១០. ចូលគេងមុនម៉ោង ១១យប់
ការចូលគេងឱ្យបានទៀងទាត់ និងឱ្យបានមុនកណ្តាលអធ្រាតមិនត្រឹមតែធ្វើឱ្យអ្នកមានសុខភាពល្អនោះទេ ថែមទាំងធ្វើឱ្យអ្នកមិនសូវមានអារម្មណ៍ថាឃ្លានអាហារថែមទៀតផង។ ចូលគេងកាន់តែយប់ជ្រៅ កាន់តែប៉ះពាល់ដល់សុខភាព ថែមទាំងអាចរំញោចអារម្មណ៍របស់អ្នកងើបឡើងមកបរិភោគអាហារថែមទៀតផង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]