ខេត្តកំពង់ស្ពឺ ៖ អ្នកទៅលេងនៅទឹកធ្លាក់ជ្រាវ ស្ថិតក្នុងឃុំអមលាំង ស្រុកថ្ពង ម្នាក់ៗភ័យព្រលឹងចុងសក់ ខណៈកំពុងមុជទឹកលេងយ៉ាងសប្បាយ ស្រាប់តែទឹកបានហូរធ្លាក់មកយ៉ាងគំហុក និងហូរកួចមនុស្សប្រុស-ស្រីក្មេងចាស់ទៅតាមទឹកផងដែរ តែសំណាងល្អដែលអ្នកទាំងនោះ មិនមានគ្រោះថ្នាក់ដល់អាយុជីវិត ។ ហេតុការណ៍បែបនេះ មិនមែនទើបតែកើតមានជាលើកទី១នោះឡើយ ដែលមុនៗ សុទ្ធតែមានមនុស្សស្លាប់ក្នុងករណីដូចគ្នានេះ ។
ហេតុការណ៍ទឹកហូរកួចមនុស្សនេះ កើតឡើងកាលពីរសៀលថ្ងៃទី២៣ កញ្ញា កន្លងទៅ ប៉ុន្តែអ្នកដែលត្រូវទឹកហូរកួចទាំងនោះ មិនត្រូវបានគេស្គាល់ឈ្មោះ និងទីលំនៅឡើយ ព្រោះក្រោយកើតហេតុបាននាំគ្នាត្រឡប់ទៅផ្ទះរៀងៗខ្លួនអស់ទៅ ។
បើតាមស្ត្រីម្នាក់ដែលជាអ្នកលក់បាយសម្លនៅទីនោះរៀបរាប់ថា មុនពេលកើតហេតុមានមនុស្សជាច្រើនបានមកកម្សាន្តនៅទីនេះ។
អ្នកខ្លះហូបបាយនៅលើតូបខាងលើ រីឯអ្នកខ្លះទៀតនាំគ្នាចុះមុជទឹកតាមជម្រាលថ្ម(ល្បាក់)យ៉ាងសប្បាយ ។ ស្រាប់តែរំពេចនោះ ទឹកបានហូរធ្លាក់មកយ៉ាងគំហុក អ្នកខ្លះក៏រត់ឡើងគោកទាន់ ហើយអ្នកខ្លះទៀតឡើងមិនទាន់ក៏ត្រូវទឹកហូរកួចធ្លាក់ទៅផ្នែកខាង ក្រោមបាត់អស់ទៅ ។ ក្រោយកើតហេតុ ប្រជាការពារនិងអាជ្ញាធរបានជួយអន្តរាគមន៍តាមរកឃើញអ្នកដែលត្រូវទឹកហូរកួចយកទៅនោះមកវិញ ដោយអ្នកទាំងនោះមិនមានរងគ្រោះថ្នាក់ដល់អាយុជីវិតឡើយគ្រាន់តែរងរបួសបន្តិចបន្តួចប៉ុណ្ណោះ ។
តាមមន្ត្រីអាជ្ញាធរដែលប្រចាំការនៅទីនោះរៀបរាប់ដែរថា សមត្ថកិច្ចនគរបាលក៏ដូចជាប្រជាការពារ និងខាងបរិស្ថាន បានណែនាំដោយមានទាំងដាក់ស្លាកសញ្ញាតំបន់គ្រោះថ្នាក់ទៀតផង ហើយពេលមេឃស្រទំក៏មានបន្លឺសំឡេងសុឺរ៉ែនជាសញ្ញាសម្គាល់ឱ្យមានការប្រុងប្រយ័ត្ន និងឱ្យអ្នកកំពុងមុជទឹកឡើងគោកផងដែរ តែមនុស្សមួយចំនួនមិនព្រមស្តាប់តាមការណែនាំទើបជួបរឿងបែបនេះ ។
ជារឿយៗ អាជ្ញាធរតែងតែប្រាប់ដល់ភ្ញៀវ ដែលមកលេងទឹកសុំឱ្យមានការប្រុងប្រយ័ត្ន ព្រោះថានេះជាតំបន់ភ្នំ កាលណាមានភ្លៀងគឺទឹកងាយនឹងហូរធ្លាក់មកខ្លាំងណាស់ ។ មុននេះ ក្មេងប្រុសម្នាក់ជាកូនមន្ត្រីអាវុធហត្ថខេត្តបានស្លាប់ ដែលក្រុមគ្រួសារបានត្រឹមតែសោកស្តាយអាយុជីវិតកូនតែប៉ុណ្ណោះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
