គ្រូ Arsenal បង្ហើបថាការបាត់បង់កីឡាករម្នាក់នេះ ធ្វើឲ្យគាត់ឈឺចាប់ជាងការបាត់បង់កីឡាករ Chamberlain ទៅទៀត

អង់គ្លេស៖ ក្នុងទីផ្សារដោះដូរកីឡាករនាដើមរដូវកាលនេះ ក្រុមកាំភ្លើងធំ Arsenal បានលក់កីឡាករសំខាន់ៗជាច្រើន។ ទន្ទឹមគ្នានឹងនេះដែរ Arsenal បានលក់កីឡាករឆ្នើមម្នាក់របស់គេគឺកីឡាករ Oxlade-Chamberlain ទៅកាន់ដៃគូរប្រជែងរបស់ខ្លួនគឺក្លឹបហង្សក្រហម Liverpool ក្នុងតម្លៃខ្លួន ៣៥លានផោន។

យ៉ាងណាមិញលោក Arsene Wenger ក៏បានបង្ហើបដែរថា ការបាត់បង់កីឡាករ Kieran Gibbs គឺមានការឈឺចាប់ជាងការបាត់បង់កីឡាករ Oxlade-Chamberlain ទៅទៀត។ 

Arsenal បានលក់ Gibbs ទៅក្លឹប West Brom នៅរដូវនេះក្នុងតម្លៃខ្លួន ៧លានផោន។ ខ្សែការពារស្លាបឆ្វេង Kieran Gibbs បានចូលលេងក្នុងកីឡាករឈុតធំរបស់ក្រុមកាំភ្លើងធំក្នុងអាយុ ១៨ឆ្នាំ និងបានបង្ហាញខ្លួនចំនួន ២៣០ប្រកួតផងដែរ។

លោក Wenger បានបញ្ជាក់ថា ការបាត់បង់ Gibbs ពិតជាឈឺចាប់ជាងការបាត់បង់កីឡាករ Chamberlain ព្រោះកីឡាករ Gibbs បានហ្វឹកហាត់នៅក្នុងក្រុម Arsenal តាំងពីអាយុ ១០ឆ្នាំមកម្លេះ។

លោក Wenger បានបន្តទៀតថា ការបាត់បង់កីឡាករ Gibbs ប្រៀបដូចជាការបាត់បង់សមាជិកគ្រួសារម្នាក់អ៊ីចឹង។ គាត់មិនបានសុំចាកចេញពីក្លឹបនោះទេ ប៉ុន្តែក្លឹបយល់ព្រមឲ្យគាត់ចាកចេញព្រោះកីឡាករដែលមានអាយុ ២៧ឆ្នាំឬ ២៨ឆ្នាំត្រូវការលេងឲ្យបានច្រើន។ 

គួរបញ្ជាក់ផងដែរថា Arsenal មានខ្សែការពារស្លាបឆ្វេងឆ្នើមចំនួន ២នាក់គឺកីឡាករ Kolasinac និងកីឡាករ Nacho Monreal ដូច្នេះការលក់កីឡាករ Gibbs អាចជារឿងមួយដ៏ត្រឹមត្រូវសម្រាប់ក្លឹបនិង Kieran Gibbs ផ្ទាល់៕

ប្រភព៖ The Sun