អ្នកណាមិនយំ! ទង្វើរបស់កូនប្រុសនៅដង្ហើមចុងក្រោយ អាចឲ្យឪពុកស្លាប់ដោយអស់ចិត្ត

ម៉ាឡេស៊ី៖  លោក Ayul Rahman ជាជាងថតរូបមួយរូប ដែលបានចូលរួមក្នុងពិធីរៀបការដ៏សោកសៅមួយ។ លោកបានចែករំលែករូបភាព និងពាក្យពេចន៍មួយចំនួនអំពីកម្មវិធីនោះចូលទៅក្នុងបណ្តាញសង្គម។

លោកបានសរសេរថា៖

“ខ្ញុំបានប្រឡូកក្នុងវិស័យថតរូបនេះជាង៧ឆ្នាំហើយ ប៉ុន្តែរឿងហេតុដែលបានកើតឡើងនៅក្នុងថ្ងៃនេះ គឺជាប្រវត្តិសាស្ត្រថ្មីមួយសម្រាប់ខ្ញុំ។ ខ្ញុំទទួលបានការងារមួយ គឺទៅថតរូបក្នុងកម្មវិធីរៀបការនៅឯមន្ទីរពេទ្យ Selayang ដែលកម្មវិធីនោះរៀបនឹងដល់ពេលចាប់ផ្តើមទៅហើយ។ កម្មវិធីនេះ ត្រូវបានគេធ្វើឡើងដោយប្រញ៉ាប់ប្រញ៉ាល់បំផុត ដោយសារតែស្ថានភាពជំងឺរបស់ឪពុកកូនកម្លោះ។”

កម្មវិធីដ៏មានន័យនេះ បានប្រព្រឹត្តទៅនៅក្នុងមន្ទីរពេទ្យ Selayang កាលពីថ្ងៃទី ២០ កញ្ញា ២០១៧កន្លងទៅ។ បន្ទប់អ្នកជំងឺត្រូវបានតុបតែងដោយផ្កាស្រស់ វាំងននដ៏ស្រស់ស្អាត និងកៅអីបែបបុរាណខ្លះៗទៀត។ សូម្បីតែឪពុករបស់កូនកម្លោះដែលកំពុងដេកឈឺនៅលើគ្រែ ក៏ត្រូវបានដណ្តប់ដោយភួយយ៉ាងស្រស់ស្អាតដែរ។

ជាអកុសល ពេលវេលាដ៏រីករាយនោះ ពិតជាខ្លីខ្លាំងណាស់។ លោកថា៖

“បន្ទាប់ពីកម្មវិធីបានចប់សព្វគ្រប់ភ្លាម ក្រុមគ្រួសារនេះបានទទួលទូរស័ព្ទមួយពីគ្រូពេទ្យ ឲ្យពួកគេត្រលប់មកបន្ទប់របស់អ្នកជំងឺវិញជាបន្ទាន់ ដោយសារអ្នកជំងឺកំពុងស្ថិតនៅក្នុងស្ថានភាពគ្រោះថ្នាក់បំផុត។ ប៉ុន្មាននាទីក្រោយមក ឪពុករបស់កូនកម្លោះ ក៏បានដាច់ដង្ហើមស្លាប់បាត់ទៅ។ នេះពិតជាការចងចាំ ដែលមិនអាចបំភ្លេចបានរបស់គូសេ្នហ៍មួយគូនេះ!”

ចំនែកឯរូបថត ដែលលោក Ayul បានថតវិញ គឺមានលាយឡំទាំងភាពរីករាយ និងភាពសោកសៅ។ ក្នុងរយៈពេល ១៣ម៉ោងប៉ុណ្ណោះ រូបភាព និងពាក្យពេចន៍ដែលលោកបានបង្ហោះទៅនោះ ទទួលបានការចុចប៊ូតុងបង្ហាញអារម្មណ៍ (Reaction) ដល់ទៅ ៨ ១០០ដង និងការចែករំលែកដល់ទៅ ៣ ៥០០ដងឯណោះ។ លើសពីនេះ អ្នកលេងបណ្តាញសង្គមមួយចំនួន  បានបង្ហាញអារម្មណ៍សោកសៅ និងការជូនពរដល់គូស្នេហ៍មួយគូនេះ។ ក្នុងនោះមានម្ចាស់គណនីបណ្តាញសង្គមមួយបានសរសេរថា៖

“វាបានធ្វើឲ្យខ្ញុំស្រក់ទឹកភ្នែក។ ខ្ញុំសូមចូលរួមរំលែកទុក្ខផង។ សូមឲ្យអ្នកដែលបានចែកឋានទៅ បានចាប់កំណើតជាថ្មីជាមួយមនុស្សស្មោះត្រង់ និងសុចរិត ហើយក៏សូមជូនពរឲ្យគូស្នេហ៍នេះ ជួបតែរឿងសប្បាយជារៀងរហូត និងពេញចិត្តជាមួយជីវិតគ្រួសាររបស់ពួកគេ”

សម្រាប់មិត្តអ្នកអានវិញ មានអារម្មណ៍យ៉ាងណាដែរ ចំពោះហេតុការណ៍ដ៏ក្រៀមក្រំនេះ?

សូមទស្សនារូបភាពខាងក្រោម៖

• គ្រួសារ
• ជីវិត