ខេត្តស្ទឹងត្រែង ៖ ស្ត្រីម្នាក់ដែលត្រូវចរន្តអគ្គិសនីឆក់ស្លាប់ ដោយបន្សល់ទុកកូន៣នាក់ ចំណែកបុរសជាប្តីប្រឈមមុខច្បាប់ ហេតុការណ៍នេះកើតឡើងនៅថ្ងៃទី២៣ ខែកញ្ញា ឆ្នាំ២០១៧ ស្ថិតនៅភូមិសាមឃួយ ឃុំសាមឃួយ ស្រុកសេសាន ខេត្តស្ទឹងត្រែង។
ស្ត្រីរងគ្រោះឈ្មោះ អន ថាហឿង អាយុ៤៤ឆ្នាំ ត្រូវបានស្លាប់ក្រោយឆក់ភ្លើងអគ្គិសនី ចំណែកបុរសជាប្តីឈ្មោះ ស្លេះ អែល អាយុ៣៨ឆ្នាំ មានស្រុកកំណើតនៅភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង ខេត្តក្រចេះ បច្ចុប្បន្នស្នាក់នៅជាមួយប្រពន្ធនៅភូមិសាមឃួយ ឃុំសាមឃួយ ស្រុកសេសាន ខេត្តស្ទឹងត្រែង។
ប្រភពព័ត៌មានអ្នកភូមិក្បែរគ្នានិយាយថា ជនរងគ្រោះជាស្ត្រីមេម៉ាយមានកូន៣នាក់ ហើយទើបនឹងយកប្តីក្រោយជនជាតិខ្មែរឥស្លាមបានជាង២ឆ្នាំប៉ុណ្ណោះ។ គ្រួសារមួយនេះក្រោយពីយកគ្នាជាប្តីប្រពន្ធតែងឈ្លោះប្រកែកគ្នាជាញឹកញាប់ តែមិនដែលឃើញប្រើហិង្សាដាក់គ្នានោះឡើយ។
លោក ហម ប៊ុន ធែល បានស៊ើបអង្កេតឱ្យដឹងថា មុនពេលកើតហេតុស្ត្រីរងគ្រោះបានទៅផ្សារ ដោយបុរសជាប្តីនៅផ្ទះចាំលក់ដូរ។ ក្រោយមកអ្នកភូមិម្នាក់មកទិញស្រាមួយលីត្រក៏បបួលបុរសជាប្តីផឹកកំដរ លុះផឹកស្រាអស់ អ្នកទិញស្រានោះក៏ត្រឡប់ទៅវិញ មួយសន្ទុះក្រោយមកស្ត្រីជាប្រពន្ធត្រឡប់មកដល់ផ្ទះឃើញប្តីស្រវឹងក៏កើតរឿងស្តីបន្ទោសប្តីថា «មួយថ្ងៃៗគ្មានគិតលក់ដូរស្អីទេ គិតតែផឹក» ។ ភ្លាមនោះបុរសជាប្តីខឹងសម្បាចេញពីតូបចូលក្នុងផ្ទះទាញផ្តាច់ខ្សែភ្លើង ព្រមទាំងធាក់ជញ្ជាំងធ្វើឱ្យមុតជើងខាងស្តាំ ក្រោយពីមុតជើងពីរនាក់ប្តីប្រពន្ធក៏ដើរទៅផ្ទះអ្នកជិតខាងរកគេជួយរំរបួស ហើយប្តីប្រាប់ប្រពន្ធថា «អែងកុំចូលក្នុងផ្ទះ ព្រោះខ្ញុំទាញខ្សែភ្លើងដាច់អស់ហើយ» បន្ទាប់រំរបួសហើយប្រពន្ធត្រឡប់ទៅតូបលក់ដូរវិញ ប្តីក៏ប្រាប់ម្តងទៀតថា «អែងទៅសម្រាកនៅតូបលក់ដូរមុខផ្ទះសិនទៅ កុំចូលក្នុងផ្ទះ ព្រោះខ្សែភ្លើងដាច់អស់ហើយប្រយ័ត្នឆក់»។ លុះត្រឡប់ដល់ផ្ទះបានប្រហែលជាជាង១០នាទីមានក្មេងៗ២នាក់មកប្រាប់ថា ប្រពន្ធត្រូវភ្លើងឆក់ស្លាប់បាត់ហើយ។ ក្រោយទទួលព័ត៌មានស្ត្រីរងគ្រោះស្លាប់ កម្លាំងនគរបាលប៉ុស្តិ៍រដ្ឋបាលឃុំសាមឃួយ ក៏ចុះឃាត់ខ្លួនបុរសជាប្តីតែម្តង។
ទាក់ទិនករណីខាងលើមន្ត្រីការិយាល័យព្រហ្មទណ្ឌកម្រិតធ្ងន់ឱ្យដឹងថា ជនសង្ស័យមិនមានការពាក់ព័ន្ធលើបទព្រហ្មទណ្ឌទេ ហើយរឿងរាវនេះយ៉ាងណាទុកឱ្យព្រះរាជអាជ្ញាជាអ្នកវីនិច្ឆ័យលើអង្គហេតុចុះ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
