ជីវិតគឺការតស៊ូ! ទោះជាពិការដៃទាំងសងខាង ក៏នារីម្នាក់នេះអាចប្រើជើងធ្វើការងារប្រចាំថ្ងៃ រហូតធ្វើឲ្យអ្នកលេងអ៊ីនធើណែតរំជួលចិត្ត (មានវីដេអូ)

ចិន៖ នារីពិការដៃ ដែលនិយម Live វីដេអូនៅក្នុងបណ្តាញសង្គម បានធ្វើឲ្យប្រជាជនចិនជាច្រើនរំជួលចិត្ត ដោយសារតែខ្សែជីវិតដែលពោរពេញដោយការតស៊ូ និងវិធីដែលនាងព្យាយាមជំនះឧបសគ្គ ដែលកើតមានចំពោះនាង។

យោងទៅតាមសារព័ត៌មាន China.com បានឲ្យដឹងថា កញ្ញា Yang Li បានជួបគ្រោះថ្នាក់ចរាចរណ៍ដ៏សាហាវមួយ កាលពីនាងមានអាយុ៣ឆ្នាំ ដែលបានធ្វើឲ្យនាងដាច់ដៃទាំងសងខាងតែម្តង។

ចំនែកឯសារព័ត៌មាន AsiaOne វិញ បានឲ្យដឹងថា ចាប់តាំងពីនាងបានជួបគ្រោះថ្នាក់ចរាចរណ៍ដ៏អាក្រក់នោះមក នាងបានបង្រៀន និងហ្វឹកហាត់ខ្លួនឯងអំពីវិធីសាស្ត្រនៃការប្រើជើងទាំងពីរ ជំនួសដៃ ដើម្បីធ្វើសកម្មភាពប្រចាំថ្ងៃផ្សេងៗដូចជា ការតុបតែងមុខ ការញ៉ាំអាហារដោយប្រើចង្កឹះ និងការថតរូប selfie ជាដើម។ 

ក្រោយមក នាងក៏បានប្រើឧបករណ៍ជំនួយពិសេស ដែលនាងអាចយកមកពាក់នឹងក ដើម្បីធ្វើការLive វីដេអូ ឲ្យមានភាពងាយស្រួលជាងមុន។

នៅក្នុងវីដេអូមួយ កញ្ញា Li បានបង្ហាញឲ្យអ្នកទស្សនាទាំងអស់ ឃើញពីរបៀបនៃការរស់នៅប្រចាំថ្ងៃរបស់នាង។ 

ក្រៅពីការ Live វីដេអូ នាងក៏ចូលចិត្តលេងកីឡា និងជជែកលេងជាមួយមិត្តភក្តិតាមរយៈទូរស័ព្ទដៃផងដែរ។

នាងបាននិយាយថា៖

“ជីវិតរបស់ជនពិការ មើលទៅដូចជាពិបាក ឬគ្មានភាពអស្ចារ្យ ប៉ុន្តែខ្ញុំអាចជួប និងរាប់អានមិត្តភក្តិជាច្រើន តាមរយៈការLive វីដេអូ”។

ថ្វីត្បិតតែកញ្ញា Li ត្រូវបានមនុស្សភាគច្រើនស្គាល់នៅតាមបណ្តាញសង្គម និងមានអ្នក follow ដល់ទៅជាង ៩០០០០០នាក់ក៏ពិតមែន ប៉ុន្តែការ Live វីដេអូ មិនមែនជាប្រភពចំនូលដ៏សំខាន់បំផុតសម្រាប់នាងនោះទេ ព្រោះសព្វថ្ងៃនាងកំពុងបម្រើការងារផ្នែករដ្ឋបាល៕

សូមទស្សនាវីដេអូខាងក្រោម៖​

• ជីវិត
• ជំរុញទឹកចិត្ត
• វីដេអូ